ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵢⴻⵊⵔⴻⵃ ⵢⵉⵡⴻⵏ ⵏ ⵓⵎⵙⴰⵍⵜⵓ ⵙ ⵔⵔⵚⴰⵚ ⴷⴻⴳ ⵟⵟⴰⵔⴻⴼ ⵎⵉ ⵍⵍⴰⵏ ⵙⵙⴻⴷⵔⴰⵎⴻⵏ ⵉⵅⵅⴰⵎⴻⵏ ⵢⴻⵜⵜⵡⴰⴱⵏⴰⵏ ⵡⴰⵔ ⵜⵜⴻⵙⵔⵉⵃ
ⵟⵟⴰⵔⴻⴼ – ⵢⴻⵜⵜⵡⴰⵊⵔⴻⵃ ⵢⵉⵡⴻⵏ ⵏ ⵓⵎⵙⴰⵍⵜⵓ (ⵔ.ⵏ., 39 ⵏ ⵢⵉⵙⴻⴳⴳⴰⵙⴻⵏ) ⵙ ⵔⵔⵚⴰⵚ ⴰⵙⵙ ⵏ ⵍⴰⵕⴻⴱⵄⴰ ⴷⴻⴳ ⵟⵟⴰⵔⴻⴼ, ⵎⵉ ⵢⴻⵜⵜⴻⴽⴽⴰ ⴷⴻⴳ ⵛⵛⵖⴻⵍ ⵏ ⵓⵙⵙⴻⴷⵔⴻⵎ ⵏ ⵢⵉⵅⵅⴰⵎⴻⵏ ⵢⴻⵜⵜⵡⴰⴱⵏⴰⵏ ⵡⴰⵔ ⵜⵜⴻⵙⵔⵉⵃ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵅⴻⴱⴱⵔⴻⵏ ⵙⴻⴳ ⵓⵙⴱⵉⵟⴰⵔ.
ⴰⵎⵙⴰⵍⵜⵓ-ⴰ ⵢⴻⵜⵜⴻⴽⴽⴰ ⴷⴻⴳ ⵜⴻⴳⵔⴰⵡⵜ ⵏ ⵢⵉⵎⴻⵥⵍⴰ (ⵙⵙⵔⴰⴱⴻⵙ) ⵏ ⵜⵖⴻⵍⵍⵉⵙⵜ ⴰⵢ ⴷ-ⵢⵓⵙⴰⵏ ⴰⴷ ⵄⴰⵙⵙⴻⵏ ⵛⵛⵖⴻⵍ-ⴰ, ⵢⴻⵔⵏⴰ ⵢⴻⵊⵔⴻⵃ ⴷⴻⴳ ⵜⴻⵎⴳⴻⵔⴹⵜ ⴷ ⵜⴳⴻⵛⵔⴰⵔ ⵎⵉ ⵉⵇⴻⵔⵔⴻⵙ ⴼⴻⵍⵍ-ⴰⵙ ⵢⵉⵡⴻⵏ ⵏ ⵓⵖⴻⵔⵎⴰⵏ ⵙ ⵓⴱⴻⵛⴽⵉⴹ ⵏ ⵚⵚⵢⴰⴷⴰ ⵉⵎⵉ ⵓⵔ ⵢⴻⵙⵜⴻⵄⵕⴻⴼ ⴰⵔⴰ ⵙ ⵍⴽⴰⵖⴻⴹ ⴰⵢ ⴷ-ⵢⴻⴼⴼⵖⴻⵏ ⴰⴽⴽⴻⵏ ⴰⴷ ⴰⵙ-ⵙⴷⴻⵔⵎⴻⵏ ⵚⵚⵓⵔ-ⵏⵏⴻⵙ ⴰⵢ ⵢⴻⴱⵏⴰ ⴱⴻⵕⵕⴰ ⵉ ⵍⵇⴰⵏⵓⵏ ⴰⴽⴽⴻⵏ ⴰⴷ ⴷ-ⵉⵥⴻⵔⵔⴻⴱ ⴰⵅⵅⴰⵎ-ⵏⵏⴻⵙ ⴷⴻⴳ ⵓⵖⴰⵔⴰⵎ ⵏ ⵜⵔⵉⴽⵉ ⵎⵧⵀⴰⵎⴻⴷ, ⴷⴻⴳ ⵜⴻⵎⴷⵉⵏⵜ ⵏ ⵟⵟⴰⵔⴻⴼ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵜⴻⵏⵏⴰ ⵜⴻⵎⵙⵓⵍⵜⴰ.
ⵎⵉ ⴷ-ⵜⴻⴹⵔⴰ ⴷⴰⵖ ⵜⵅⴻⵚⵚⴰⵔ-ⴰ, ⵢⵉⵡⴻⵏ ⵙⴻⴳ ⵢⵉⵔⴳⴰⵣⴻⵏ ⵏ ⵓⵃⵓⴷⴷⵓ ⴰⵖⴰⵔⵉⵎ ⵢⴻⴼⴼⴻⵖ-ⵉⵜ ⵍⴻⵄⵇⴻⵍ, ⴷⵖⴰ ⵓⵍⴰ ⴷ ⵏⴻⵜⵜⴰ ⵢⴻⵖⵍⵉ, ⵢⴻⵊⵔⴻⵃ, ⵎⴰⵛⴰ ⵓⵔ ⵢⴻⵏⴹⴻⵔⵔ ⴰⵔⴰ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵏⵏⴰⵏ ⵙⴻⴳ ⵓⵙⴱⵉⵟⴰⵔ, ⴰⵎ ⵡⴰⴽⴽⴻⵏ ⴰⵢ ⴷ-ⵔⵏⴰⵏ ⴷⴰⴽⴽⴻⵏ ⴰⵎⵙⴰⵍⵜⵓ-ⵏⵏⵉ ⴰⵎⴻⵊⵔⵓⵃ ⵡⵡⵉⵏ-ⵜ ⵖⴻⵔ ⵜⵣⴻⵖⵖⴰ ⵏ ⵜⵓⵄⵊⵉⵍⵉⵏ ⵏ ⵓⵙⴱⵉⵟⴰⵔ ⵏ ⵟⵟⴰⵔⴻⴼ, ⵢⴻⵔⵏⴰ ⵉⵎⵉⵔ-ⴰ ⵓⵍⴰ ⴷ ⵏⴻⵜⵜⴰ ⵓⵔ ⵢⴻⵏⴹⴻⵔⵔ ⴰⵔⴰ.
ⴰⵖⴻⵔⵎⴰⵏ-ⴰ ⴰⵢ ⵢⴻⵜⵄⴻⴷⴷⴰⵏ ⵖⴻⴼ ⵓⵎⵙⴰⵍⵜⵓ ⵙ ⵍⴻⵙⵍⴰⵃ ⵏ ⵜⵎⴻⵙ ⵢⴻⵜⵜⵡⴰⴹⴹⴻⴼ ⵢⴻⵔⵏⴰ ⵓⵔ ⵢⴻⵜⵜⵄⴻⴹⴹⵉⵍ ⴰⵔⴰ ⴰⴷ ⵉⵄⴻⴷⴷⵉ ⵙⴷⴰⵜ ⵢⵉⵎⵡⴻⴽⴽⴻⵍ ⵏ ⵜⴻⴳⴷⵓⴷⴰ ⴷⴻⴳ ⵓⵅⵅⴰⵎ ⵏ ⵛⵛⵕⴻⵄ ⵏ ⵟⵟⴰⵔⴻⴼ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⴻⵎⵙⵓⵍⵜⴰ.
ⴷ ⵡⴰ ⴰⵢ ⴷ ⵛⵛⵖⴻⵍ ⵡⵉⵙ ⵙⵉⵏ ⵏ ⵓⵙⵙⴻⴷⵔⴻⵎ ⵏ ⵍⴱⴻⵏⵢⴰⵏⴰⵜ ⵢⴻⴼⴼⵖⴻⵏ ⵉ ⵍⵇⴰⵏⵓⵏ ⴷⴻⴳ ⵟⵟⴰⵔⴻⴼ, ⵢⴻⵔⵏⴰ ⵛⵛⵖⴻⵍ-ⴰ ⵉⵃⵓⵣⴰ-ⴷ 14 ⵏ ⵍⴱⴻⵏⵢⴰⵏⴰⵜ ⵏ ⵚⵚⴻⵏⴼ-ⴰ.
