Asebter amenzawi

Tuzzya tis 3 n umciweṛ gar Yilibiyen: timlilit ad tkemmel ass n lexmis deg Ldzayer

LDZAYER TAMANEƔT – Ixeddimen n tuzzya tis 3 n umciweṛ gar Yilibiyen (aydeg ara ttekkin yimḍebbren d yiɣellaten n yikabaren isertiyen d yimeɣnasen ilibiyen) bdan-d iḍelli, laṛebɛa, deg Ldzayer Tamaneɣt ddaw leɛnaya n Yiɣlanen Yeddukklen, yerna kemmlen ass n lexmis deffir tewwura iɣelqen akken ad ssiwḍen ɣer ferru aserti n taluft deg tmurt-a.

Tuzzya-a tis 3 n Ldzayer d tin aydeg ara ḥedṛen yigensasen igejdanen n tegrawin tisertiyin n Libya akken ad mciwṛen ɣef umtawa n talwit ara ifaken taluft ay iḥuzan tamurt-a.

Amazun uzzig n Yiɣlanen Yeddukklen i Libya, Bernardino Leon, yenna-d ass laṛebɛa, mi bdan yixeddimen n temlilit dakken timlilit-a tis 3 n umciweṛ gar Yilibiyen « tesɛa azal d ameqran », am wakken ay d-yenna dakken yessefk ad ssiwḍen yidisan ay terza temsalt ɣer usenfar n umtawa ara qeblen akk Yilibiyen.

Seg yidis-nnes, aneɣlaf n tɣawsiwin n Lmeɣreb, n Tdukli tafriqit d Temɣunt taɛṛabt, Abdelkader Messahel, iɛawed iwekked-d addad ur yettbeddilen n Ldzayer ay la ixeddmen akken « ad tɛawen aytmaten ilibiyen wakk tigrawin akken ad ddun deg ubrid n umciweṛ ara ten-yesdukklen akken ma llan, menɣir tigrawin ay ḥesben Yiɣlanen Yeddukklen d tirebrabin », am wakken ay d-yenna dakken « taɣellist (laman) n Libya d taɣellist daɣ n Ldzayer ».

Ixeddimen n tuzzya tis 3 n umciweṛ gar Yilibiyen la d-ttinin seg yiḍelli, laṛebɛa, deffir tewwura iɣelqen, s uḥdaṛ n yinmuhal n tmura icerken tilisa d Libya yerna xeddmen deg Ldzayer.