Asebter amenzawi

Ugar n 200 n yikilumitren n yibriden deg wakal n tfellaḥt deg Tɣerdayt

TAɣERDAYT – Ugar n 200 n yikilumitren n yibriden n tfellaḥt ay d-gan deg twilayt n Tɣerdayt deg ukatar n wahil n tneflit n tmurt, ɣef wakken ay aɣ-d-ixebber ass n lexmis umagaẓ n tẓegwa n twilayt-a.

Ahil-a ad yejj imezdaɣen n tmiwa tuɛzilin ad ttawḍen s wugar n tefses ɣer temnaḍin-nsen n tfellaḥt yerna ad ttekkin deg tneflit tanmettit-tadamsant n twilayt-a yerna ad tt-rren d tamnaḍt ay d-ijebbden imseftiyen n tfellaḥt, ɣef wakken ay d-yenna Mass Mohamed Abbas.

Ahil-a heyyan-t-id s umciweṛ d yigensasen n yifellaḥen, imeksawen d yimezdaɣen, yerna yella-d daɣ deg-s lebni n 27 n lebyur n tkessawt, imeswen (anda ara ttessen lmal) d tregwa n ussway n wakal n tfellaḥt, ɣef wakken ay d-yerna.

Ɣef leḥsab n yimḍebber-a, llant daɣ 8 n tenqiḍin n waman deg tmiwa n tkessawt gan-asent ttawil n trisiti n tafukt, am wakken ay sqeɛden snat n tenqiḍin niḍen n waman deg Metlili d Daya Ben Dehwa, yerna bnan sin n yiḥebbasen n waman.

Azal n 144 n tegrummiwin n trisiti n tafukt ay yettwaferqen ɣef twaculin n yifellaḥen deg wakk timiwa n twilayt-a i lmend n usselhu n tmeddurt n uɣerman, ɣef wakken ay d-yenna umagaẓ-a.

Seg yidis niḍen, bnan 60 n yikilumitren n yissefrag yettḥuddun seg waḍu. Gan daɣ lecɣal lecɣal i usserked n yigidan n yijdi deg 78 n yiqeṭṭaren, am wakken ay ẓẓan 263 n yiqeṭṭaren n yisekla n lfakya, ɣef wakken ay d-ixebber Mass Abbas.

Ahil-a n uɛawen i ussenqes n uɛzal n tmiwa n tmurt d win yesɛan iswi n usselhu n tegnatin n tudert n yimezdaɣen-nsen, am wakken ara d-yessider aya timnaḍin n tfellaḥt akken ur d-rewwlen ara medden seg-sent ɣer temdinin.