Asebter amenzawi

Takurt n uḍar: Bentaleb (Tottenham) tebɣa ad t-tawi Paris St Germain (taɣemsa)

PARIS – Amarir agraɣlan adzayri, Nabil Bentaleb, la yetturaren deg Tottenham, yezmer lḥal ad t-tawi Paris St German, ay yellan d talɣuɣt n Fṛansa, ɣef wakken ay d-tenna tɣemsa tadigant.

Ussan-a, Bentaleb ur yemsefham ara d tmehla n teɣlamt n Tottenham ay la yetturaren deg Premier League (Tamɣunt Tamezwarut) n Langliz, imi taɣlamt-a mazal-itt tugi ad as-ternu deg lexlaṣ.

ɣef waya, amarir-a (yesɛan 20 n yiseggasen) la yettxemmim ad yeddu ad yurar anda niḍen, ula ma leɛqed-nnes d teɣlamt-a n London ad yeqqim arma d 2018.

Aṭas n teɣlamin, am tin n Arsenal (Langliz) d Juventus (Ṭṭalyan) ay yebɣan ad awint amarir-a ay d-ilulen deg temdint tafṛensist n Lille, ɣef wakken ay d-tenna tɣemsa yemmuzzgen (yetxeṣṣeṣen).

Bentaleb yurar 35 n temliliyin deg tsemhuyt-a deg teɣlamt n Tottenham, yerna yessadef yiwen n yiswi, am wakken ay yesɛedda takurt snat n tikkal i ussidef n yiswi.

Amarir-a d amḥaddi n tlemmast yerna ass n lḥedd ad yebdu annan d teɣlamt taɣelnawt n Ldzayer akken ad uraren d Seychelles deg 13 Yunyu deg Leblida deg ukatar n wass amezwaru n temliliyin n waffas n Teqbuct n Tefriqt n yiɣlanen (CAN-2015).