ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴱⵓⵔⵓⵏⴷⵉ: ⴰⵏⴰⴱⴰⴹ ⵢⴻⵏⵏⴰ-ⴷ ⴰⵎⵛⵉⵡⴻⵕ ⴰⵙⴻⵔⵜⵉ ⴰⴷ ⵉⴽⴻⵎⵎⴻⵍ ⴷⴷⵓⵕⵜ ⴰⵢ ⴷ-ⵢⴻⵜⵜⴻⴷⴷⵓⵏ
ⴱⵓⵊⵓⵎⴱⵓⵔⴰ – ⴰⵏⴻⵖⵍⴰⴼ ⴰⴱⵓⵔⵓⵏⴷⵉ ⵏ ⵜⵖⴰⵡⵙⵉⵡⵉⵏ ⵏ ⴷⴰⵅⴻⵍ, ⴻⴷⵧⵓⴰⵔⴷ ⵏⴷⵓⵡⵉⵎⴰⵏⴰ, ⵢⴻⵏⵏⴰ-ⴷ ⴰⵙⵙ ⵏ ⵍⴻⵅⵎⵉⵙ ⴷⴰⴽⴽⴻⵏ ⴰⵎⵛⵉⵡⴻⵕ ⴰⵙⴻⵔⵜⵉ ⴰⴷ ⵉⴽⴻⵎⵎⴻⵍ ⴷⴷⵓⵕⵜ ⴰⵢ ⴷ-ⵢⴻⵜⵜⴻⴷⴷⵓⵏ ⴷⴷⴰⵡ ⵍⴻⵄⵏⴰⵢⴰ ⵏ ⵜⵓⵖⴷⴰⴹⵜ ⵏ ⵡⴰⵏⵏⴰⵢ ⵏ ⵜⴻⴼⵔⴰⵏⵉⵏ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴷⴻⴳ ⴱⵓⵔⵓⵏⴷⵉ (ⵎⴻⵏⵓⴱ).
« ⵉⵙⵡⵉ ⵏ ⵓⵎⵛⵉⵡⴻⵕ-ⴰ ⵏⴻⵜⵜⴰ ⴷ ⴰⴼⴰⴽⵉ ⵏ ⵛⵛⵡⴰⵍ ⴷⴻⴳ ⵜⵎⵓⵔⵜ-ⴰ, ⵢⴻⵔⵏⴰ ⴰⵎⵛⵉⵡⴻⵕ-ⴰ ⴰⴷ ⵉⴽⴻⵎⵎⴻⵍ ⴷⴷⵓⵕⵜ ⴰⵢ ⴷ-ⵢⴻⵜⵜⴻⴷⴷⵓⵏ, ⴰⵙⵙ ⵏ ⵍⴻⵜⵏⵉⵢⴻⵏ ⵏⴻⵖ ⵜⵜⵍⴰⵜⴰ, ⵙ ⵓⵇⴰⴷⴻⵔ ⵏ ⵍⴻⵡⵖⴰⵢⴰ ⵏ ⵜⵇⴰⵛⵓⵛⵜ ⵜⴰⵎⵏⴰⴹⴰⵏⵜ ⴰⵢ ⴷ-ⵢⴻⵍⵍⴰⵏ ⴷⴻⴳ ⴷⴰⵔ-ⴻⵙ-ⵙⴰⵍⴰⴰⵎ, ⴷⴻⴳ ⵜⴰⵏⵣⴰⵏⵢⴰ, ⴰⵙⵙ ⵏ 31 ⵎⴰⵢⵓ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵏⴷⵓⵡⵉⵎⴰⵏⴰ ⴷⴻⴳ ⵢⵉⵡⴻⵏ ⵏ ⵓⵍⵖⵓ.
ⵏⴷⵓⵡⵉⵎⴰⵏⴰ ⵢⴻⵙⵙⴻⴼⵀⴻⵎ-ⴷ ⴷⴰⴽⴽⴻⵏ ⵉⵎⵜⵜⴻⴽⴽⵉⵢⴻⵏ ⴰⴷ ⵙⵙⵉⵡⵍⴻⵏ ⵍⴰⴷⵖⴰ ⵖⴻⴼ ⵜⴻⵎⵙⴰⵍ ⴰⵢⵖⴻⴼ ⵓⵔ ⵎⵙⴻⴼⵀⴰⵎⴻⵏ ⴰⵔⴰ, ⴳⴰⵔ-ⴰⵙⴻⵏⵜ ⵜⴰⵎⵙⴰⵍⵜ ⵏ ⵜⵙⴻⵍⵡⵉⵜ ⵜⵉⵙ 3 ⵏ ⵓⵙⴻⵍⵡⴰⵢ ⴰⴱⵓⵔⵓⵏⴷⵉ, ⵒⵉⴻⵔⵔⴻ ⵏⴽⵓⵔⵓⵏⵣⵉⵣⴰ, ⴰⵢ ⵢⴻⴱⵖⴰⵏ ⴰⴷ ⵢⴻⵜⵜⴻⴽⴽⵉ ⴷⴻⴳ ⵜⴻⴼⵔⴰⵏⵉⵏ ⵜⵉⵙⴻⵍⵡⴰⵢⴰⵏⵉⵏ ⵏ 26 ⵢⵓⵏⵢⵓ, ⴷ ⵜⵎⴻⵙⴱⴰⵏⵉⵢⵉⵏ ⵎⴳⴰⵍ ⵜⵉⵎⴻⵣⵡⴻⵔⵜ ⵏ ⵏⴽⵓⵔⵓⵏⵣⵉⵣⴰ.
« ⴰⴷ ⵏⴽⴻⵎⵎⴻⵍ ⴰⵎⵛⵉⵡⴻⵕ ⴷⴷⴰⵡ ⵍⴻⵄⵏⴰⵢⴰ ⵏ ⵜⵓⵖⴷⴰⴹⵜ ⵏ ⵡⴰⵏⵏⴰⵢ ⵏ ⵜⴻⴼⵔⴰⵏⵉⵏ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴷⴻⴳ ⴱⵓⵔⵓⵏⴷⵉ, ⵜⴰⴷⵓⴽⵍⵉ ⵜⴰⴼⵔⵉⵇⵉⵜ, ⴰⵎⵖⵉⵡⴰⵏ ⵏ ⵜⴻⴼⵔⵉⵇⵜ ⵏ ⵓⴳⵎⵓⴹ ⴷ ⵓⵙⴰⵔⴰⴳ ⴰⴳⵔⴰⵖⵍⴰⵏ ⵏ ⵜⴻⵎⵏⴰⴹⵜ ⵏ ⵢⵉⴳⴻⵍⵎⵉⵎⴻⵏ ⵉⵎⴻⵇⵔⴰⵏⴻⵏ (ⵛⵉⵔⴳⵍ). ⵓⵔ ⵏⴻⵜⵜⵄⴻⴹⴹⵉⵍ ⴰⵔⴰ ⴰⴷ ⵏⵅⴻⴱⴱⴻⵔ ⴰⵎⵖⵉⵡⴰⵏ ⴰⴳⵔⴰⵖⵍⴰⵏ ⵖⴻⴼ ⵡⴰⵙⵙ ⵙⵡⴰⵙⵡⴰ ⴰⵢⴷⴻⴳ ⴰⵔⴰ ⴷ-ⵢⵉⵍⵉ ⵓⵎⵛⵉⵡⴻⵕ-ⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵏⴷⵓⵡⵉⵎⴰⵏⴰ.
ⴰⵎⵛⵉⵡⴻⵕ-ⴰ ⵢⴻⵃⴱⴻⵙ ⴷⴻⴳ ⵜⴳⴰⵔⴰ ⵏ ⴷⴷⵓⵕⵜ ⵢⴻⵣⵔⵉⵏ ⵖⴻⴼ ⵍⵊⴰⵍ ⵏ ⵜⵇⴰⵛⵓⵛⵜ-ⵏⵏⵉ ⵜⴰⴼⴻⵖⵏⴰⵎⵉⵜ ⵏ ⵜⵎⵓⵔⴰ ⵏ ⵜⴻⴼⵔⵉⵇⵜ ⵜⴰⴳⵎⵓⴹⴰⵏⵜ ⵖⴻⴼ ⴱⵓⵔⵓⵏⴷⵉ.
ⴷⴻⴳ ⴷⴰⵔ-ⴻⵙ-ⵙⴰⵍⴰⴰⵎ, ⵉⵎⴹⴻⴱⴱⵔⴻⵏ ⵏ ⵜⵎⵓⵔⴰ ⵏ ⵜⴻⴼⵔⵉⵇⵜ ⵏ ⵓⴳⵎⵓⴹ ⵙⵙⵓⵎⵔⴻⵏ-ⴷ ⵖⴻⴼ ⵢⵉⴷⵓⴱⴰ ⵏ ⴱⵓⵔⵓⵏⴷⵉ ⴰⴷ ⵡⴻⵅⵅⵔⴻⵏ ⵜⵉⴼⵔⴰⵏⵉⵏ (ⵓⵍⴰ ⴷ ⵜⵉⴷ ⵏ ⵜⵙⴻⵍⵡⵉⵜ) ⵙ ⵡⴰⵢⵢⵓⵔ ⴷ ⵓⵣⴳⴻⵏ ⴰⴽⴽⴻⵏ ⴰⴷ ⴷ-ⵜⵉⵍⵉ ⵜⴻⴳⵏⵉⵜ ⵉⵡⴰⵜⴰⵏ ⵉ ⵜⴻⴼⵔⴰⵏⵉⵏ-ⴰ, ⴰⵎ ⵡⴰⴽⴽⴻⵏ ⴰⵔⴰ ⵢⴻⵜⵜⵡⴰⴽⴽⴻⵙ ⵍⴻⵙⵍⴰⵃ ⵉ ⵜⵉⴳⵔⴰⵡⵉⵏ-ⵏⵏⵉ ⵜⵉⵎⵙⴻⵍⵍⵃⵉⵏ ⵏ ⵢⵉⵍⴻⵎⵥⵉⵢⴻⵏ.
ⴱⵓⵔⵓⵏⴷⵉ ⵜⵓⴷⴻⴼ ⵢⵉⵡⴻⵜ ⵏ ⵜⴰⵍⵓⴼⵜ ⵜⴰⵙⴻⵔⵜⵉⵜ ⴷ ⵜⴰⵎⴻⵇⵔⴰⵏⵜ ⵎⵉ ⴷ-ⵢⴻⴼⴼⴻⵖ ⵢⵉⵙⴰⵍⵉ ⴷⴰⴽⴽⴻⵏ ⴰⵙⴻⵍⵡⴰⵢ ⵏⴽⵓⵔⵓⵏⵣⵉⵣⴰ ⵢⴻⵙⵙⴻⵔⵙ-ⴷ ⵉⵎⴰⵏ-ⵏⵏⴻⵙ ⵖⴻⵔ ⵜⴻⴼⵔⴰⵏⵉⵏ ⵜⵉⵙⴻⵍⵡⴰⵢⴰⵏⵉⵏ ⴰⵢ ⴷ-ⵢⴻⵜⵜⴻⴷⴷⵓⵏ. ⵜⴰⵏⵎⴻⴳⵍⴰ ⴷ ⵜⵓⴷⴷⵙⵉⵡⵉⵏ ⵏ ⵜⵎⴻⵜⵜⵉ ⵜⴰⵖⴰⵔⵉⵎⵜ ⵜⵜⵡⴰⵍⵉⵏⵜ ⴷⴰⴽⴽⴻⵏ ⵉⵎⵉ ⵎⴰⵙⵙ ⵏⴽⵓⵔⵓⵏⵣⵉⵣⴰ ⵢⴻⵃⴽⴻⵎ ⵜⴰⵎⵓⵔⵜ ⵙⵏⴰⵜ ⵏ ⵜⵉⴽⴽⴰⵍ, ⵓⵔ ⵢⴻⵙⵄⵉ ⴰⵔⴰ ⴰⵣⵔⴻⴼ ⴰⴷ ⵉⵄⴰⵡⴻⴷ ⴰⴷ ⴷ-ⵢⴻⵙⵙⴻⵔⵙ ⵉⵎⴰⵏ-ⵏⵏⴻⵙ ⵖⴻⵔ ⵜⴻⴼⵔⴰⵏⵉⵏ, ⵍⴰⴷⵖⴰ ⵉⵎⵉ ⵜⴰⵎⴻⵏⴹⴰⵡⵜ ⴷ ⵓⵎⵜⴰⵡⴰ ⵏ ⵜⴰⵍⵡⵉⵜ ⵏ 2000 ⵏⵏⴰⵏ-ⴷ ⴷⴰⴽⴽⴻⵏ ⴰⵙⴻⵍⵡⴰⵢ ⵏ ⵜⴻⴳⴷⵓⴷⴰ ⵢⴻⵜⵜⴰⵍⴰⵙ ⴽⴰⵏ ⴰⴷ ⵢⴻⵃⴽⴻⵎ ⵙⵏⴰⵜ ⵏ ⵜⵉⴽⴽⴰⵍ.
ⵜⵉⵎⴻⵙⴱⴰⵏⵉⵢⵉⵏ ⴷⴻⴳ ⵜⵎⵓⵔⵜ-ⴰ ⵓⵔ ⵃⴱⵉⵙⴻⵏⵜ ⴰⵔⴰ, ⵍⴰⴷⵖⴰ ⴷⴻⴳ ⵜⵎⴰⵏⴻⵖⵜ ⴱⵓⵊⵓⵎⴱⵓⵔⴰ, ⵓⵍⴰ ⵎⴰ ⵜⵉⵎⴻⵣⵡⴻⵔⵜ ⵏ ⵓⵙⴻⵍⵡⴰⵢ ⵏⴽⵓⵔⵓⵏⵣⵉⵣⴰ ⵢⴻⵇⴱⴻⵍ-ⵉⵜⵜ ⵓⵅⵅⴰⵎ ⵏ ⵛⵛⵕⴻⵄ ⴰⵎⴻⵏⴹⴰⵡⴰⵏ.
