Asebter amenzawi
Burundi: anabaḍ yenna-d amciweṛ aserti ad ikemmel dduṛt ay d-yetteddun
BUJUMBURA – Aneɣlaf aburundi n tɣawsiwin n daxel, Edouard Nduwimana, yenna-d ass n lexmis dakken amciweṛ aserti ad ikemmel dduṛt ay d-yetteddun ddaw leɛnaya n Tuɣdaḍt n wannay n tefranin n Yiɣlanen Yeddukklen deg Burundi (MENUB).
« Iswi n umciweṛ-a netta d afaki n ccwal deg tmurt-a, yerna amciweṛ-a ad ikemmel dduṛt ay d-yetteddun, ass n letniyen neɣ ttlata, s uqader n lewɣaya n tqacuct tamnaḍant ay d-yellan deg Dar-es-Salaam, deg Tanzanya, ass n 31 Mayu », ɣef wakken ay d-yenna Mass Nduwimana deg yiwen n ulɣu.
Nduwimana yessefhem-d dakken imttekkiyen ad ssiwlen ladɣa ɣef temsal ayɣef ur msefhamen ara, gar-asent tamsalt n tselwit tis 3 n uselway aburundi, Pierre Nkurunziza, ay yebɣan ad yettekki deg tefranin tiselwayanin n 26 Yunyu, d tmesbaniyin mgal timezwert n Nkurunziza.
« Ad nkemmel amciweṛ ddaw leɛnaya n Tuɣdaḍt n wannay n tefranin n Yiɣlanen Yeddukklen deg Burundi, Tadukli Tafriqit, Amɣiwan n Tefriqt n Ugmuḍ d Usarag agraɣlan n temnaḍt n Yigelmimen Imeqranen (CIRGL). Ur nettɛeḍḍil ara ad nxebber amɣiwan agraɣlan ɣef wass swaswa aydeg ara d-yili umciweṛ-a », ɣef wakken ay d-yenna Mass Nduwimana.
Amciweṛ-a yeḥbes deg tgara n dduṛt yezrin ɣef ljal n tqacuct-nni tafeɣnamit n tmura n Tefriqt Tagmuḍant ɣef Burundi.
Deg Dar-es-Salaam, imḍebbren n tmura n Tefriqt n Ugmuḍ ssumren-d ɣef yiduba n Burundi ad wexxren tifranin (ula d tid n tselwit) s wayyur d uzgen akken ad d-tili tegnit iwatan i tefranin-a, am wakken ara yettwakkes leslaḥ i tigrawin-nni timsellḥin n yilemẓiyen.
Burundi tudef yiwet n taluft tasertit d tameqrant mi d-yeffeɣ yisali dakken aselway Nkurunziza yessers-d iman-nnes ɣer tefranin tiselwayanin ay d-yetteddun. Tanmegla d tuddsiwin n tmetti taɣarimt ttwalint dakken imi Mass Nkurunziza yeḥkem tamurt snat n tikkal, ur yesɛi ara azref ad iɛawed ad d-yessers iman-nnes ɣer tefranin, ladɣa imi tamenḍawt d umtawa n talwit n 2000 nnan-d dakken aselway n tegduda yettalas kan ad yeḥkem snat n tikkal.
Timesbaniyin deg tmurt-a ur ḥbisent ara, ladɣa deg tmaneɣt Bujumbura, ula ma timezwert n uselway Nkurunziza yeqbel-itt Uxxam n ccṛeɛ amenḍawan.
