Asebter amenzawi

Tasemyuddest n yimussa n Uzawad ad testenyi amtawa n talwit d umsuɣal aɣelnaw deg 20 Yunyu deg Bamako (Bilal Ag Acherif)

LDZAYER – Tasemyuddest n yimussa n Uzawad (CMA) ad testenyi amtawa n talwit d umsuɣal n Mali ass n 20 Yunyu deg Bamako, ɣef wakken ay d-yenna ass n ljemɛa deg Ldzayer uɣella n tmagla d ugensas n Tsemyuddest-a, Bilal Ag Acherif.

« Ma yella kullec yedda akken yelha, ad nestenyi amtawa n talwit ass n 20 Yunyu deg Bamako (Mali) », ɣef waken ay d-yenna Ag Acherif deg yiwet n tseɣrut i tɣemsa deg yijifeṛ n temlilit ay d-yellan ɣef umciweṛ ɣef ussefɛel n umtawa n talwit d umsuɣal deg Mali.

Amtawa n talwit d umsuɣal aɣelnaw deg Mali yestenya-t ass n 15 Mayu unabaḍ amali, imussa isertiyen-iserdasiyen n ugafa n Mali ay yettekkan deg « Tɣerɣert n Ldzayer » d teɣlamt n tebdammast tagraɣlant ay tenheṛ Ldzayer.

Deg Tsemyuddest n yimussa n Uzawad (CMA) aydeg llant 5 n tegrawin, ala 2 seg tegrawin-a (Tasemyuddest i uɣref n Uzawad – CPA – d Tsemyuddest n yimussa d terniwin tiferfanin n uzbu – CM-FPR-) ay yestenyan amtawa-a.