Asebter amenzawi

Tamɣunt 1: RC Laṛebɛa tejja Seddiki ad yeddu ɣer JSK yerna ur tugi ara ad yeddu Mokdad ɣer MC Ldzayer (Amani)

LDZAYER – Aselway n RC Laṛebɛa, Djamel Amani, ay la yessewjaden ad yejj amkan-nnes i Ahmed Hamza, yenna-d dakken yejja amari Elyes Seddiki ad yeddu ɣer Yilemẓiyen Inaddalen n Leqbayel, am wakken ay d-yenna dakken ur as-ireggel ara abrid i Abdelmalek Mokdad mi yestenya d MC Ldzayer « ula ma mazal leɛqed-nnes » d RC Laṛebɛa ur yemmut ara.

« Seddiki ad asen-nserreḥ akken ad yeddu ɣer Yilemẓiyen Inaddalen n Leqbayel ay yellan tebɣa ad t-tawi. Deg RC Laṛebɛa, ur njemmeɛ ara imariren s ukmar. S waya, ṛṛaḥ-nnes ur yettciwwil ara taɣlamt yerna ur nettɛeḍḍil ara ad d-naf wayeḍ deg umkan-nnes », ɣef wakken ay d-yenna Amani i Tnegga n Yisalan n Ldzayer.

Uqbel ma Seddiki yudef ad yurar deg Laṛebɛa, yella yetturar deg yiwet n teɣlamt n taẓunt tamazdart n Fṛansa. Ɣef leḥsab n yimanayen, Seddiki yurar akken yelha deg uḥric wis sin n tsemhuyt.

« Amarir-a yella yebɣa ad yurar deg kra n teɣlamt mechuṛen. Cikkeɣ yeɛjeb-as lḥal aṭas imi ara yurar deg Yilemẓiyen Inaddalen n Leqbayel, yerna ur as-nreggel ara abrid ɣef waya », ɣef wakken ay d-yenna Amani yellan d amarir agraɣlan n Ldzayer.

Deg wayen yerzan Mokdad, Amani yenna-d dakken leɛqed-nnes d RC Laṛebɛa mazal-as 6 n wayyuren akken ad ifak.

« Leɛqed-nnes amezwaru n 18 n wayyuren yestenya-t yid-neɣ deg Yennayer n 2014, maca tugi-t Temɣint n tkurt n uḍar tamsadurt ay d-icerḍen leɛqed n sin n yiseggasen », ɣef wakken ay d-yenna.

ɣas akken, Amani iwekked-d dakken ur as-ireggel ara abrid i umarir-a n 28 n yiseggasen, yerna yessaram-as « afud igerrzen » i MC Ldzayer, d taɣlamt wukud yestenya Mokdad, ass n ttlata, leɛqed n sin n yiseggasen.