Asebter amenzawi

Yaman: ttewten aṭas n yimukan au ḍḍfen Yiḥutiyen

ṢENƐA – Isafagen n temsisit taɛṛabt yellan ddaw ṛṛay n Tgelda Tasaɛudit wten aṭas seg yimukan iserdasiyen ay ḍḍfen yiɣewwaɣen iḥutiyen deg Ṣenɛa ttewten s lbumbat ass n lḥedd, ɣef leḥsab n yinagan, ɣef wakken ay d-xebbrent tneggiwin n yisalan.

Tamsisit taɛṛabt twet, taṣebḥit n wass n lḥedd, amazir n Jumaineh deg wegmuḍ n Ṣenɛa, d win ay yettewten 7 n tikkal, terna twet lxezna n leslaḥ d rrṣaṣ n al-Nahdain (deg wenẓul), d win ay d-yezgan deg yiwet n tiɣilt nnig tmaneɣt, am wakken ay twet leqṣer n uselway, ɣef wakken ay d-nnan yimezdaɣen.

Ammas n yemḍebbren n yiɣallen imsellḥen, ay d-yezgan deg tlemmast n tmaneɣt yerna ḍḍfent yiɣewwaɣen, wten-t daɣ yisafagen n temsisit deg tfejrit n wass n lḥedd, yerna mi yeṭṭerḍeq, ula d ixxamen ay d-iqerben ɣer-s ttwaɣen, yerna rewlent-d twaculin ɣer yizenqan, ɣef wakken ay d-tenna AFP.

Aṭas n yideggen ay ḍḍfen yiɣewwaɣen d wid yeddan yid-sen deg ugafa n Yaman, ladɣa deg tnebḍiyin n Haija, Amrane d Saada (ul n temnaḍt n Yiḥutiyen) ay yettewten s lhejd deg yiḍ d tfejrit n lḥedd, ɣef wakken ay d-nnan yinagan.

Deg wenẓul, isafagen wten aṭas seg yimukan ay ḍḍfen yiɣewwaɣen deg yigmanen n ḍḍerf n temdint n Ɛaden (deg ugafa d utaram), akken ad ɛawnen iɣallen yeddan d unabaḍ ay la iɛerrḍen ad ḥebsen tiddit n Yiḥutiyen d yemsisan-nsen akken ur ttadfen ara ɣer Al-Mansoura, Dar Saad, Cheikh Othman d al-Buraiqa, ɣef wakken ay d-yenna ujiniṛal Fadhl Baech, d yiwen seg yemḍebbren iserdasiyen n yiɣallen yeddan d unabaḍ, ɣef wakken d-tenna AFP.

« Mmuten yerna jerḥen aṭas n Yiḥutiyen d yemsisan-nsen », ɣef wakken ay d-tenna teɣbalut-a, war ma tebder-d acḥal.