ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⴰⴼⴰⵙⴽⴰ ⵜⵉⵙ 9 ⵏ ⵓⴷⵉⵡⴰⵏ ⵏ ⴱⴻⵛⵛⴰⵕ ⴳⴰⵔ 8 ⴷ 13 ⵢⵓⵏⵢⵓ

ⵍⴷⵣⴰⵢⴻⵔ ⵜⴰⵎⴰⵏⴻƔⵜ – ⵜⴰⵎⴷⵉⵏⵜ ⵏ ⴱⴻⵛⵛⴰⵕ ⴰⴷ ⵜⴻⵎⵎⴰⴳⴻⵔ ⴳⴰⵔ 8 ⴷ 13 ⵢⵓⵏⵢⵓ ⵜⴰⴼⴰⵙⴽⴰ ⵜⴰⵖⴻⵍⵏⴰⵡⵜ ⵜⵉⵙ 9 ⵏ ⵓⵥⴰⵡⴰⵏ ⵏ ⵓⴷⵉⵡⴰⵏ.

ⵜⴰⴼⴰⵙⴽⴰ-ⴰ ⵜⵊⴻⴱⴱⴻⴷ-ⴷ ⴰⵟⴰⵙ ⵏ ⵍⵖⴰⵛⵉ ⴰⵢ ⵉⵃⴻⵎⵎⵍⴻⵏ ⴰⵥⴰⵡⴰⵏ ⵢⴻⵔⵏⴰ ⵜⴻⵜⵜⵉⵍⵉ-ⴷ ⵢⴰⵍ ⴰⵙⴻⴳⴳⴰⵙ. ⵜⵉⵏ ⵏ ⵓⵙⴻⴳⴳⴰⵙ-ⴰ ⴰⴷ ⵜⵜⴻⴽⴽⵉⵏⵜ ⴷⴻⴳ-ⵙ ⵜⴻⴳⵔⴰⵡⵉⵏ ⵙⴻⴳ ⵜⴻⵎⵏⴰⴹⵉⵏ ⵢⴻⵎⴳⴻⵔⵔⴰⴷⴻⵏ ⵏ ⵜⵎⵓⵔⵜ, ⴳⴰⵔ-ⴰⵙⴻⵏⵜ « ⴷⵊⵎⴰⵡⵉ ⴰⴼⵔⵉⵛⴰ », « ⵉⴼⵔⵉⵇⵢⴰ ⵙⵒⵉⵔⵉⵜ » ⴷ « ⵍⴻⵙ ⵊⴰⵔⵉⵙⵜⴻⵙ ».

ⵜⵉⵏⴻⴱⴳⵉⵜ ⵏ ⵢⵉⵙⴻⵖ ⴷⴻⴳ ⵜⴻⵥⵔⵉⴳⵜ-ⴰ ⴷ ⵜⴰⴳⴷⵓⴷⴰ ⵜⴰⵄⵕⴰⴱⵜ ⵜⴰⵚⴻⵃⵔⴰⵡⵉⵜ ⵜⴰⵎⴻⴳⴷⴰⵢⵜ (ⴰⵏⴻⵥⵔⵓⴼ ⵓⵜⵔⵉⵎ), ⵢⴻⵔⵏⴰ ⴷ ⵜⴰⴳⵔⴰⵡⵜ ⵜⴰⵚⴻⵃⵔⴰⵡⵉⵜ ⵏ « ⴻⵍ ⴰⵎⴻⵍ » ⴰⵔⴰ ⵉⵔⴻⵥⵎⴻⵏ ⵜⴰⴼⴰⵙⴽⴰ-ⴰ ⴷⴻⴳ ⵓⵙⴰⵔⵉⵔ ⵏ ⴻⵏⵏⴰⵙⵔ.

ⴰⵎ ⴷⴻⴳ ⵢⵉⵙⴻⴳⴳⴰⵙⴻⵏ ⵢⴻⵣⵔⵉⵏ, ⵜⴰⴼⴰⵙⴽⴰ-ⴰ ⴰⴷ ⴷ-ⵜⵉⵍⵉ ⴷⴻⴳ-ⵙ ⵜⴻⵎⵙⵉⵣⵡⴻⵔⵜ ⴳⴰⵔ 12 ⵏ ⵜⴻⴳⵔⴰⵡⵉⵏ ⵏ ⵓⴷⵉⵡⴰⵏ. ⵜⵉⴳⵔⴰⵡⵉⵏ-ⴰ ⵓⵙⴰⵏⵜ-ⴷ ⵙⴻⴳ ⵓⵜⴰⵔⴰⵎ (ⵍⵖⴻⵔⴱ) ⵏ ⵜⵎⵓⵔⵜ, ⵙⴻⴳ ⵓⴳⴰⴼⴰ ⵏ ⵓⵏⴻⵥⵔⵓⴼ, ⵙⴻⴳ ⵇⵙⴻⵏⵟⵉⵏⴰ, ⵍⴻⴱⵍⵉⴷⴰ ⴷ ⵜⴻⵎⵏⴰⴹⵉⵏ ⵏⵉⴹⴻⵏ, ⵢⴻⵔⵏⴰ ⵜⵉⴷ ⴰⵔⴰ ⴷ-ⵢⴻⵣⴳⴻⵏ ⴷⴻⴳ 3 ⵏ ⵢⵉⵎⵓⴽⴰⵏ ⵉⵎⴻⵣⵡⵓⵔⴰ ⴰⴷ ⵣⴻⵎⵔⴻⵏⵜ ⴰⴷ ⵜⵜⴻⴽⴽⵉⵏⵜ ⴷⴻⴳ ⵜⴼⴰⵙⴽⴰ ⵜⴰⴳⵔⴰⵖⵍⴰⵏⵜ ⵏ ⵓⵥⴰⵡⴰⵏ ⵏ ⵓⴷⵉⵡⴰⵏ ⴰⵔⴰ ⴷ-ⵢⵉⵍⵉⵏ ⴷⴻⴳ ⵍⴷⵣⴰⵢⴻⵔ ⵜⴰⵎⴰⵏⴻⵖⵜ ⵙⴻⴳ 25 ⵢⵓⵏⵢⵓ ⴷ ⴰⵙⴰⵡⴻⵏ.

ⵜⴰⴼⴰⵙⴽⴰ-ⴰ ⴰⴷ ⵜⵜⴻⴽⴽⵉⵏ ⴷⴻⴳ-ⵙ ⴷⴰⵖ ⵡⵉⴷ ⴰⵢ ⵉⵔⴻⴱⵃⴻⵏ ⵙⴻⵏⴷⵉⵍⵉⵏⴷⵉ, ⴷ ⵜⴻⴳⵔⴰⵡⵉⵏ ⵏ ⵜⴻⵎⵏⴰⴹⵜ-ⴰ ⴰⵢ ⵢⴻⵇⵇⵍⴻⵏ ⵎⴻⵛⵀⵓⵕⵉⵜ ⵎⵍⵉⵃ ⴰⵎⴰ ⴷⴻⴳ ⵜⴻⵎⵏⴰⴹⵜ-ⴰ, ⴰⵎⴰ ⴰⵏⴷⴰ ⵏⵉⴹⴻⵏ, ⴳⴰⵔ-ⴰⵙⴻⵏⵜ ⵜⴰⴳⵔⴰⵡⵜ ⵏ « ⴻⵙⵙⴻⴷ ».

ⴰⴷ ⴷ-ⵉⵍⵉⵏ ⴷⴰⵖ ⵢⵉⵙⴰⵔⴰⴳⴻⵏ ⴰⵔⴰ ⴷ-ⴳⴻⵏ ⵢⵉⵎⵏⴰⴷⵉⵢⴻⵏ ⵏ ⵡⴰⵎⵎⴰⵙ ⴰⵖⴻⵍⵏⴰⵡ ⵏ ⵓⵏⴰⴷⵉ ⴷⴻⴳ ⵓⵣⴰⵔⵎⴻⵣⵔⵓⵢ, ⵜⴰⵙⵏⴻⵎⴷⴰⵏⵜ ⴷ ⵓⵎⴻⵣⵔⵓⵢ (ⵛⵏⵔⵒⴰⵀ) ⴷ ⵢⵉⵙⴷⴰⵡⴰⵏⴻⵏ ⴷ ⵜⵉⵎⵣⵉⴽⴽⴻⵏⵜ ⵏ ⵡⴰⵍⵍⴰⵍⴻⵏ ⵏ ⵓⵥⴰⵡⴰⵏ ⴰⵢ ⵙⵙⴻⵇⴷⴰⵛⴻⵏ ⴷⴻⴳ ⵓⴷⵉⵡⴰⵏ.