ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⴰⵍⵓⴼⵜ ⵏ ⵙⵓⵔⵢⴰ: ⵡⵉⴷ ⵢⴻⵍⵍⴰⵏ ⵎⴳⴰⵍ ⵓⵏⴰⴱⴰⴹ ⵄⴻⵔⴹⴻⵏ ⴰⴷ ⴷ-ⵙⴱⴻⴷⴷⴻⵏ ⵜⴰⴳⵔⴰⵡⵜ « ⵎⴻⵖⵖⵔⴻⵏ » ⴷⴻⴳ ⵍⵇⴰⵀⵉⵔⴰ
ⵍⵇⴰⵀⵉⵔⴰ – ⵉⴳⴻⵏⵙⴰⵙⴻⵏ ⵏ ⵜⴻⵏⵎⴻⴳⵍⴰ ⵜⴰⵙⵓⵔⵉⵜ ⴱⴷⴰⵏ ⵜⵉⵎⵍⵉⵍⵉⵜ ⵏ ⵙⵉⵏ ⵏ ⵡⵓⵙⵙⴰⵏ ⴰⵙⵙ ⵏ ⵍⴻⵜⵏⵉⵢⴻⵏ ⴷⴻⴳ ⵍⵇⴰⵀⵉⵔⴰ ⴰⴽⴽⴻⵏ ⴰⴷ ⵄⴻⵔⴹⴻⵏ ⴰⴷ ⴷ-ⵙⴱⴻⴷⴷⴻⵏ ⴰⵎⵙⴻⴳⵔⴰⵡ ⴰⵎⴰⵢⵏⵓ « ⴰⵎⴻⵇⵔⴰⵏ » ⵢⴻⵔⵏⴰ ⴷ « ⵉⵎⵣⵉⵔⴻⴳ » ⵏ ⵜⵣⴻⵎⵎⴰⵔⵜ ⵜⵉⴱⴻⵕⵕⴰⵏⵉⵢⵉⵏ, ⴰⵎ ⵡⴰⴽⴽⴻⵏ ⴰⵢ ⴱⵖⴰⵏ ⴰⴷ ⴷ-ⴳⴻⵏ ⴰⵔⴽⴰⵡⴰⵍ (ⵍⵎⵉⵜⴰⵇ) ⴰⵖⴻⵍⵏⴰⵡ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵏⵏⴰⵏ ⵜⵜⴰⵡⵉⵍⴰⵜ ⵏ ⵢⵉⵙⴰⵍⴰⵏ.
ⵉⵙⵡⵉ ⵏ ⵓⵙⴰⵔⴰⴳ-ⴰ ⴰⴳⵔⴰⵖⵍⴰⵏ ⵖⴻⴼ ⵙⵓⵔⵢⴰ ⵏⴻⵜⵜⴰ ⴷ ⵜⵉⴼⵉⵏ ⵏ ⵜⵉⴼⵔⴰⵜ ⵉ ⵓⴽⴻⵎⵎⴻⵍ ⵏ ⵓⵅⴻⴷⴷⵉⵎ ⴷⴻⴳ ⵡⴻⵎⴽⴰⵏ ⵏ ⵜⴻⵎⵙⵉⵙⵉⵜ ⵏ ⵜⴻⵏⵎⴻⴳⵍⴰ ⵢⴻⵍⵍⴰⵏ ⴷ ⵏⴻⵜⵜⴰⵜ ⴰⵢ ⴷ ⴰⵎⵙⴻⴳⵔⴰⵡ ⴰⵎⴻⵇⵔⴰⵏ ⴰⴽⴽ ⵏ ⵜⴻⵏⵎⴻⴳⵍⴰ ⵜⴰⵙⵓⵔⵉⵜ ⴰⵢ ⵜⵜⵄⴰⵡⴰⵏⴻⵏⵜ ⵜⵎⵓⵔⴰ ⵜⵓⵜⵔⵉⵎⵉⵏ (ⵜⵉⵖⴻⵔⴱⵉⵢⵉⵏ) ⴷ ⵜⵎⵓⵔⴰ ⵜⴰⵄⵕⴰⴱⵉⵏ ⴰⵎ ⵇⴰⵟⴰⵔ, ⵜⴰⴳⴻⵍⴷⴰ ⵜⴰⵙⴰⵄⵓⴷⵉⵜ ⴷ ⵟⵟⴻⵔⴽ. ⵜⴰⵎⵙⵉⵙⵉⵜ-ⴰ ⴱⵖⴰⵏ ⴰⴷ ⵜⵜ-ⵙⵎⴻⵖⵔⴻⵏ ⴰⴽⴽⴻⵏ ⴰⴷ ⴷ-ⵜⵜⴻⴽⴽⵉⵏⵜ ⴷⴻⴳ-ⵙ ⵜⴻⴳⵔⴰⵡⵉⵏ ⵏⵉⴹⴻⵏ ⵢⴻⵔⵏⴰ ⴱⵖⴰⵏ ⴷⴰⵖ ⴰⴷ ⵜⵜ-ⵔⵔⴻⵏ ⴷ « ⵜⵉⵎⵣⵉⵔⴻⴳⵜ » ⵙⴻⴳ ⵢⵉⴷⵉⵙ ⵏ ⵢⴻⴷⵔⵉⵎⴻⵏ ⴷ ⵜⵙⴻⵔⵜⵉⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵀⴰⵢⵜⵀⴰⵎ ⵎⴰⵏⵏⴰ, ⵢⵉⵡⴻⵏ ⵙⴻⴳ ⵢⵉⵏⵎⴻⴳⵍⴰⵢⴻⵏ ⵢⴻⵍⵍⴰⵏ ⵎⴳⴰⵍ ⵓⵏⴰⴱⴰⴹ ⴰⵙⵓⵔⵉ ⵢⴻⵔⵏⴰ ⴷ ⵢⵉⵡⴻⵏ ⵙⴻⴳ ⵢⴻⵎⵙⵓⴷⴷⵙⴻⵏ ⵏ ⵓⵙⴰⵔⴰⴳ-ⴰ.
ⵎⴰⵚⴻⵔ ⵜⴻⵙⵙⵓⴷⴷⴻⵙ « ⴰⵙⴰⵔⴰⴳ-ⴰ ⵢⴻⵜⵜⵡⴰⵙⵎⴻⵖⵔⴻⵏ ⵉ ⵢⵉⵖⴰⵍⵍⴻⵏ ⵏ ⵜⴻⵏⵎⴻⴳⵍⴰ ⵜⴰⵙⵓⵔⵉⵜ ⴰⴽⴽⴻⵏ ⴰⴷ ⴷ-ⵜⴱⴰⵏ ⵜⵎⵓⵖⵍⵉ ⴰⵔⴰ ⵉⵛⴻⵔⴽⴻⵏ ⴰⵎⴹⴰⵏ ⴰⵎⴻⵇⵔⴰⵏ ⴰⴽⴽ ⵏ ⵜⴻⴳⵔⴰⵡⵉⵏ ⵏ ⵜⴻⵏⵎⴻⴳⵍⴰ ⵜⴰⵙⵓⵔⵉⵜ ».
ⴰⵣⴰⵍ ⵏ 150 ⵏ ⵢⵉⴳⴻⵏⵙⴰⵙⴻⵏ ⵏ ⵜⴻⴳⵔⴰⵡⵉⵏ ⵜⵉⵙⵓⵔⵉⵢⵉⵏ ⵢⴻⵎⴳⴻⵔⵔⴰⴷⴻⵏ ⴰⵢ ⵉⵃⴻⴷⵕⴻⵏ ⴷⴻⴳ ⵢⵉⵏⴰⵡ ⵏ ⵡⴻⵔⵥⴰⵎ ⵏ ⵓⵙⴰⵔⴰⴳ-ⴰ ⴷⴻⴳ ⵓⵙⴻⵏⵙⵓ ⵏ ⵍⵇⴰⵀⵉⵔⴰ, ⴷ ⵉⵏⴰⵡ ⴰⵢ ⴷ-ⵢⴻⵖⵔⴰ ⵓⵏⴻⵖⵍⴰⴼ ⴰⵎⴰⵚⵔⵉ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ, ⵙⴰⵎⴻⵀ ⵙⵀⵧⵓⴽⵔⵢ.
