Asebter amenzawi

Tukci n ttesriḥ i ussekcem n sselɛa: tuzwirt i Yidzayriyen (Benyounes)

LDZAYER TAMANEƔT – Aneɣlaf n Tnezzut, Amara Benyounes, iwekked-d ass n lḥedd tameddit, dakken ttesriḥat n ussijjew d wajjaw n sselɛa – ara yettwasfeɛlen deg 2016 – d nitni ay d abrid awḥid ara yejjen tamurt ad teḥkem tanezzut (ttjaṛa) tabeṛṛanit, am wakken ay d-yenna dakken tuzwirt ad tettunefk i Yidzayriyen deg wayen yerzan tukci n ttesriḥat-a.

Aneɣlaf yenna-d aya mi d-yerra ɣef tuttriwin n yimazanen deg Wegraw aɣerfan aɣelnaw ɣef usenfar n lqanun ara ibeddlen yerna ad yessmed lewṣaya 04-03 yerzan ilugan imuta yettwasfeɛlen deg wajjaw d ussijjew n sselɛa. Dɣa i lmend n waya, Mass Benyounes yenna-d dakken ttesriḥat-a n wajjaw d ussijjew ad ttunefken ladɣa i tkebbaniyin tidzayriyin « akken ad ifak umunupul n tkebbaniyin tibeṛṛaniyin deg wayen yerzan ajjaw n kra n yifarisen ».

Aneɣlaf ixebber-d dakken aɣlif-nnes la yessefray ad iṣeggem ajjaw n sselɛa seg uzɣar s ussebded n yiwen n unagraw n ummuzzeg (atxeṣṣeṣ) akken ay yella lḥal deg tmura niḍen.

Mass Benyounes yesmekti-d daɣ dakken deg tgara n 2014, Ldzayer tella tesɛa 42.000 n tkebbaniyin n wajjaw n sselɛa seg uzɣar, d acu kan, ur d-yelli ara akk uṣeggem deg yixeddimen-nsent.

Ma iɛedda lqanun-a, ad d-sbedden taseqqamut gar yeɣlifen, d tin aydeg ara yettekki weɣlif n tedrimt, win n temguri d win n tfellaḥt, yerna d aɣlif n tnezzut ara tt-yesselwin. Taseqqamut-a ad d-telhu s usseddu n tukci n ttesriḥat n wajjaw d ussijjew, ɣef wakken ay d-yenna uneɣlaf.