Asebter amenzawi

Tamɣunt 1: Salim Boumechra (USMH) d amarir amaynu wis 5 n JSK

LDZAYER TAMANEƔT – Alemmas n wenrar n USM Lḥeṛṛac, Salim Boumechra, yestenya leɛqed n sin n yiseggasen d Yilemẓiyen Inaddalen n Leqbayel (Tamɣunt 1ut tamsadurt n tkurt n uḍar), ɣef wakken ay aɣ-d-xebbren ass n ttlata seg teɣlamt n Jeṛjeṛ.

Salim Boumechra d netta ay d amarir amaynu wis 5 ara d-tessekcem teɣlamt n Yilemẓiyen Inaddalen n Leqbayel deg 4 n wussan, am wakken ay as-tɛawed daɣ leɛqed i umarir-nnes awḥid umi ifuk leɛqed, Kamel Yesli.

Imariren imaynuten n Yilemẓiyen Inaddalen n Leqbayel nitni d alemmas n wenrar Salim Boumechra (seg USM Lḥeṛṛac, 2 n yiseggasen), amḥaddi imidis Amar Benmelouka (2 n yiseggasen), Mohamed Boulaouidet (seg O Lemdeyya, 2 n yiseggasen), Lyes Seddiki (seg Laṛebɛa, 2 n yiseggasen) d Ahmed Gagaa (seg USMBA, aseggas).

Assidef n yimariren imaynuten ad ikemmel dduṛt-a yerna ma ulac, d dduṛt aydeg ara d-yernu, ma ulac, yiwen n umarir amaynu ɣer teɣlamt-a, imi ay d-xebbren dakken Fawzi Rahal (n MOB) yezmer mliḥ ad d-yernu ɣer Yilemẓiyen Inaddalen n Leqbayel, ula ma aneggaru-a ikukra cwiṭ imi ula d ES Sḍif d USM Ldzayer ssumrent-as-d ad yurar ɣer-sent.

Deg tgara, yessefk ad d-nesmekti dakken tamehla n Yilemẓiyen Inaddalen n Leqbayel theyya-d ahil n ussewjed n yimariren deg tallit gar tsemhuyin yerna ad d-yeqqel umahil (axeddim) seg wass n 25 Yunyu d asawen. Sakkin, Ikanaṛiyen ad d-bdun annan-nsen amezwaru gar tsemhuyin deg Ḥemmam Bourguiba deg Tunes (seg 2 ɣer 14 Yulyu), ma d annan-nsen wis sin ad d-yili deg Ṭṭerk deg tezwara n wayyur n ɣuct.