Asebter amenzawi
Ṣṣyada n umeṛjan teḥwaj tixxamin n wadad n wesbiṭar n Lqala
ṬṬAREF – Ṣṣyada n umeṛjan ur tettɛeḍḍil ara ad tebdu i useggas-a, yerna akken ad d-tili ṣṣyada-a akken iwata, yessefk ad d-swejden tixxamin n wadad deg wesbiṭar n Lqala (Ṭṭaref) akken ad dawin iṣeyyaden n umeṛjan ay izemren ad nḍerren seg wenḍab ddaw waman, ɣef wakken ay d-yenna ass n ttlata unemhal n Uɣerbaz n ussileɣ atekni n ṣṣyada d tkessawt n yiselman (EFTPA), Nadir Touati.
Yiwen n wass uqbel, yella-d yiwen n usehwu d yiwen n umenḍab deg lebḥeṛ n Lqala, dɣa ɣef waya ay d-yenna yemḍebber-a dakken « yessefk ad d-yeqqel weskasi ɣef ussemres n tesnajya n wadad deg Ldzayer, ladɣa imi ay qrib ad d-teqqel ṣṣyada n umeṛjan ».
Amenḍab-nni ilemẓi umi d-yeḍra usehwu-a n wesṛuḥu n wadad yusa-d seg Jijel yerna qrib yemmut mi yenḍeb s telqey deg waman n lebḥeṛ deg tgara n dduṛt yezrin.
Ilemẓi-a yemneɛ seg tmettant mi t-rran ɣer usenduq n wadad n EFTPA ay sseqdacen i ussileɣ n yinelmaden, ɣef wakken ay d-yenna Mass Touati, am wakken ay yesḥassef imi ulac isbiṭaren ay yesɛan isenduqen neɣ tixxamin n wadad.
Akken ad yettwafhem « wazal ay yesɛa ttawilt-a deg yesbiṭaren », imḍebber-a yenna-d dakken ilemẓi-nni ay d-ssukksen ass n ljemɛa iban-d yekref yerna ufan-t yuɣ-itent deg turin mi yewweḍ ɣer wesbiṭar n Lqala acku ur iquder ara ilugan n walluy seg telqey n lebḥeṛ d asawen s yisurifen.
Imi ilemẓi-a yuɣ-itent deg tdawsa-nnes yerna yebda iseɛɛu uguren deg wul d uneffes, wwin-t ɣer uɣerbaz n EFTPA anda ay t-rran ɣer usenduq n wadad, yerna d aɣerbaz-a ay d awḥid ay yesselmaden anḍab amsadur deg tmurt, yerna d netta daɣ ay d aɣerbaz awḥid ay yesɛan isenduqen n wadad deg wegmuḍ (ccerq) n tmurt menɣir tiqeclin (lkaziṛnat) n uḥuddu aɣarim n Lḥamiz (Ldzayer) d Meṛs Lekbir (deg utaram).
Asenduq n wadad n uɣerbaz n EFTPA sseqdacen-t deg wesleɣmu n yimenḍaben, yerna yesɛa yiwet kan n tgelmust n wuksijin, d acu kan, imsujjiyen sqedcen ttawil-a akken ad d-ssukksen ilemẓi-a, ɣef wakken ay d-yenna Mass Touati, ay d-yernan dakken adawi n yilemẓi-a s wuksijin yeḍḍef ugar n 5 n tsaɛtin.
