Asebter amenzawi

Tirzi n Sellal ɣef Ccinwa ad teglu s « lateṛ yelhan » i wemɛawen gar snat-a n tmura

LezZAYER – Aselway n Wegraw aɣerfan aɣelnaw, Mohamed Larbi Ould Khelifa, yenna-d ass n laṛebɛa dakken tirzi ay iga seg melmi kan uneɣlaf amenzu Abdelmalek Sellal ɣef Ccinwa d tin ara d-yeglun s « lateṛ yelhan » i wemɛawen gar Ldzayer d tmurt-a, ɣef wakken ay d-yenna yiwen n welɣu n tsudut-a.

Mass Ould Khelifa, deg yiwet n tɣimit aydeg yemmuger anmahal n Tegduda taɣerfant n Ccinwa deg Ldzayer, Yang Yuanggu, yeckeṛ-d « igmaḍ ay d-yefrurin seg terzi taneggarut n uneɣlaf amenzu, Abdelmalek Sellal, ɣef Ccinwa, » am wakken ay d-yenna dakken igmaḍ-a « ad sɛun lateṛ yelhan ɣef uzekka n wemɛawen gar snat-a n tmura », ɣef wakken ay d-tebder teɣbalut-a.

Ma d anmahal n Ccinwa yeckeṛ-d « lmejhud ay d-yellan i ussejhed n wassaɣen ucriken », yerna iɛawed iwekked-d dakken « imseftiyen icinwaten ɛewwlen ad sjehden tillin-nsen deg Ldzayer ladɣa deg yeḥricen n tfellaḥt, tamguri d teẓwert d-yetteqqalen ».

Mass Yuanggu yenna-d daɣ dakken « tamurt-nnes tewjed ad tessalqey amɛawen d Ldzayer deg wakk inurar yerna ula deg teknussniwin yeddan ɣer sdat, imi ay yella laman deg wassaɣen ay icerken snat-a n tmura ».

Ɣef leḥsab n welɣu-a, anmahal n Ccinwa « ifuṛes tagnit n wemyager-a akken ad yefk i Mass Ould Khelifa aneɛruḍ n uselway n Wegraw aɣerfan aɣelnaw n Ccinwa akken ad yerzu ɣef Ccinwa ».

Sin-a n yidisan bedren-d daɣ, deg wemyager-a « assaɣen imezruyanen n weswir unnig ay icerken snat-a n tmura deg ukatar asuddsan amatu, am wakken ay d-ssukken tiṭ ɣef wamek ay nnernan wassaɣen-a deg yinurar yemgerraden, ladɣa deg yiseggasen-a ineggura », ɣef wakken ay d-yerna welɣu-a.

Sin-a n yidisan msefhamen dakken yessefk « ad sjehden assaɣen-a deg wakk iswiren », ɣef wakken ay tt-id-yextem welɣu-a.