ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⵍⴻⵎⵙⴰⵏ: 35 ⵏ ⵢⵉⵏⴻⵎⵣⵉⴽⴽⵏⴻⵏ ⵙⴻⴳ 13 ⵏ ⵜⵡⵉⵍⴰⵢⵉⵏ ⴷⴻⴳ ⵜⵎⴻⵙⵔⵉⵜ ⵜⴰⵖⴻⵍⵏⴰⵡⵜ ⵏ ⵓⴼⴻⵅⵅⴰⵔ ⴰⵎⴻⵏⵙⴰⵢ
ⵜⵍⴻⵎⵙⴰⵏ – 35 ⵏ ⵢⵉⵏⴻⵎⵣⵉⴽⴽⵏⴻⵏ ⵙⴻⴳ 13 ⵏ ⵜⵡⵉⵍⴰⵢⵉⵏ ⵏ ⵜⵎⵓⵔⵜ ⴰⵢ ⵢⴻⵜⵜⴻⴽⴽⴰⵏ ⴷⴻⴳ ⵜⴻⵥⵔⵉⴳⵜ ⵜⵉⵙ ⵙⵏⴰⵜ ⵏ ⵜⵎⴻⵙⵔⵉⵜ ⵜⴰⵖⴻⵍⵏⴰⵡⵜ ⵏ ⵓⴼⴻⵅⵅⴰⵔ ⴰⵎⴻⵏⵙⴰⵢ ⴰⵢ ⵉⵔⴻⵥⵎⴻⵏ ⴰⵙⵙ ⵏ ⵍⴰⵕⴻⴱⵄⴰ ⴷⴻⴳ ⵡⴻⴳⵏⵉ ⵏ « ⵍⴰⵍⵍⴰ ⵙⴻⵜⵜⵉ » ⴷⴻⴳ ⵜⵍⴻⵎⵙⴰⵏ, ⵙ ⵡⴻⵃⴷⴰⵕ ⵏ ⵢⵉⴷⵓⴱⴰ ⵉⴷⵉⴳⴰⵏⴻⵏ ⴷ ⵡⴰⵟⴰⵙ ⵏ ⵢⴻⵏⴹⴻⵏ ⵏ ⵚⵚⴻⵏⵄⴰ-ⴰ.
ⵜⴰⵥⵔⵉⴳⵜ-ⴰ ⵜⴻⵍⵍⴰ-ⴷ ⵙ ⵓⴱⴻⵔⵔⵉⵃ ⵏ « ⴰⴼⴻⵅⵅⴰⵔ ⴰⵎⴻⵏⵙⴰⵢ, ⵜⴰⴷⴰⵡⵙⴰ ⴷ ⵜⵥⵓⵔⵉ », ⵢⴻⵔⵏⴰ ⵡⵉⴷ ⴰⵢ ⵜⵜ-ⵉⴷ-ⵉⴳⴰⵏ ⴱⵖⴰⵏ-ⵜⵜ ⴰⴷ ⵜⵉⵍⵉ ⴷ « ⵜⴰⵍⵍⵓⵏⵜ ⵏ ⵡⴻⵎⴱⴰⴷⴷⴻⵍ » ⴰⵢⴷⴻⴳ ⴰⵔⴰ ⴷ-ⵎⵍⵉⵍⴻⵏ ⵢⴻⵏⴹⴻⵏ ⵙⴻⴳ ⵜⵡⵉⵍⴰⵢⵉⵏ ⵏ ⵜⵉⵣⵉ ⵡⴻⵣⵣⵓ, ⴱⴳⴰⵢⴻⵜ, ⴱⵓⵎⴻⵔⴷⴰⵙ, ⵜⵉⴱⴻⵙⴽⴻⵔⵜ, ⵍⴷⵣⴰⵢⴻⵔ, ⵇⵙⴻⵏⵟⵉⵏⴰ, ⵛⵛⵍⴻⴼ, ⵡⴻⵀⵕⴰⵏ, ⵜⵓⴱⵉⵔⴻⵜ, ⵡⴰⵔⴻⴳⵍⴰ, ⵜⵉⵒⴰⵣⴰ, ⵄⵉⵏ ⵜⵉⵎⵓⵛⴻⵏⵜ ⴷ ⵜⵍⴻⵎⵙⴰⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵎⵀⴰⵍ ⵏ ⵜⴻⵅⵅⴰⵎⵜ ⵏ ⵚⵚⴻⵏⵄⴰⵜ ⵏ ⵜⵍⴻⵎⵙⴰⵏ.
ⵉⵏⴹⴻⵏ-ⴰ ⵡⵡⵉⵏ-ⴷ ⵉⴼⴰⵔⵉⵙⴻⵏ ⵢⴻⵎⴳⴻⵔⵔⴰⴷⴻⵏ, ⴰⵎⴰ ⴷ ⵉⵊⴻⵇⴷⵓⵔⴻⵏ ⵏ ⵓⵙⵙⴻⵡⵡⵉ ⵏⴻⵖ ⴷ ⵡⵉⴷ ⵏ ⵓⵛⴻⴱⴱⴻⵃ, ⵢⴻⵔⵏⴰ ⴷ ⵡⵉⴷ ⴰⵢⴷⴻⴳ ⴷ-ⵜⴱⴰⵏ ⵜⵎⵓⵙⵙⵏⵉ-ⵏⵙⴻⵏ ⵜⵓⵥⵡⵉⵔⵜ ⴷⴻⴳ ⵚⵚⴻⵏⵄⴰ-ⴰ ⴰⵢ ⴷ-ⵡⴻⵕⵜⴻⵏ ⵙⵖⵓⵔ ⵍⴻⵊⴷⵓⴷ.
ⴷⴻⴳ ⵜⵉⵏⴰⵡⵜ-ⵏⵏⴻⵙ ⵏ ⵡⴻⵔⵥⴰⵎ, ⴰⵏⴻⵎⵀⴰⵍ ⵏ ⵜⴻⵅⵅⴰⵎⵜ ⵜⴰⴷⵉⴳⴰⵏⵜ ⵏ ⵚⵚⴻⵏⵄⴰⵜ, ⴷⵊⵉⵍⴰⵍⵉ ⵀⴰⵎⵉⵜⵧⵓⵛⵀⴻ, ⵢⴻⵏⵏⴰ-ⴷ ⴷⴰⴽⴽⴻⵏ ⵜⴰⵎⵏⴰⴹⵜ ⵏ ⴱⵉⴷⴻⵔ (ⴷⴻⴳ ⵜⵡⵉⵍⴰⵢⵜ ⵏ ⵜⵍⴻⵎⵙⴰⵏ) ⵜⴻⵜⵜⵡⴰⵙⵙⴻⵏ ⵙ ⵓⴼⴻⵅⵅⴰⵔ-ⵏⵏⴻⵙ ⴰⵎⴻⵏⵙⴰⵢ, ⵢⴻⵔⵏⴰ ⴷⴻⴳ ⵢⵉⵙⴻⴳⴳⴰⵙⴻⵏ-ⴰ ⵉⵏⴻⴳⴳⵓⵔⴰ, ⵍⴰ ⵜⵅⴻⴷⴷⴻⵎ ⵖⴻⵔ ⵢⵉⴷⵉⵙ ⵏ ⵜⴻⵅⵅⴰⵎⵜ ⵏ ⵚⵚⴻⵏⵄⴰⵜ ⴰⴽⴽⴻⵏ ⴰⴷ ⵜⵄⴰⵡⴻⵏ ⵉⵏⴹⴻⵏ ⵢⴻⵔⵏⴰ ⴰⴷ ⵜⴻⵏ-ⵜⴻⵙⵙⵉⵍⴻⵖ ⴰⴽⴽⴻⵏ ⴰⴷ ⴳⴻⵏ ⵍⴻⵇⵔⴰⵔ ⵉ ⵚⵚⴻⵏⵄⴰ-ⴰ ⵜⴰⵇⴱⵓⵔⵜ, ⴰⵎ ⵡⴰⴽⴽⴻⵏ ⴰⵔⴰ ⴷ-ⵙⵏⵓⵍⴼⵓⵏ ⵉⴼⴰⵔⵉⵙⴻⵏ ⵉⵎⴰⵢⵏⵓⵜⴻⵏ ⴰⵔⴰ ⵉⵡⴰⵜⵉⵏ ⴰⵢⴻⵏ ⵢⴻⵃⵡⴰⵊ ⵙⵙⵓⵇ.
ⵜⴰⵥⵔⵉⴳⵜ ⵜⵉⵙ ⵙⵏⴰⵜ ⵏ ⵜⵎⴻⵙⵔⵉⵜ ⵜⴰⵖⴻⵍⵏⴰⵡⵜ ⵏ ⵓⴼⴻⵅⵅⴰⵔ ⴰⵎⴻⵏⵙⴰⵢ ⴷ ⵜⵉⵏ ⴰⵢⴷⴻⴳ ⴰⵔⴰ ⴷ-ⵢⵉⵍⵉ ⵡⴰⵙⵙ ⵜⴻⵣⵔⴰⵡⵜ ⴰⵢⴷⴻⴳ ⴰⵔⴰ ⴷ-ⵎⵍⵉⵍⴻⵏ ⵢⵉⵎⴰⵣⵣⴰⵢⴻⵏ ⵏ ⵢⴻⵃⵔⵉⵛⴻⵏ ⵢⴻⵎⴳⴻⵔⵔⴰⴷⴻⵏ ⴰⴽⴽⴻⵏ ⴰⴷ ⵏⴰⴷⵉⵏ ⵉⴱⵔⵉⴷⴻⵏ ⵉ ⵜⵔⵉⵔⵉⵜ ⵏ ⵡⴰⵣⴰⵍ ⵉ ⵚⵚⴻⵏⵄⴰⵜ ⵏ ⵜⴻⵏⴹⵉ ⴰⵔⴰ ⵢⴻⵊⵊⴻⵏ ⵉⵎⴻⵣⴷⴰⵖⴻⵏ ⵏ ⵜⴻⵎⵏⴰⴹⵉⵏ-ⴰ ⴰⴷ ⴷⴷⵔⴻⵏ ⴷⴻⴳ ⵓⵏⵏⴻⵔⵏⵉ ⴰⴷⵓⵎⴰⵏ, ⴰⴷ ⴰⴼⴻⵏ ⴰⵎⴰⵀⵉⵍ (ⴰⵅⴻⴷⴷⵉⵎ) ⵢⴻⵔⵏⴰ ⴰⴷ ⵔⴻⴱⵃⴻⵏ ⵉⴷⵔⵉⵎⴻⵏ.
ⵉⵜⵍⴻⵎⵙⴰⵏⵉⵢⴻⵏ ⴰⴷ ⵙⵄⵓⵏ ⴰⵔⵎⴰ ⴷ 15 ⵢⵓⵏⵢⵓ ⵜⴰⴳⵏⵉⵜ ⴰⴽⴽⴻⵏ ⴰⴷ ⵔⵣⵓⵏ ⵖⴻⴼ ⵜⵎⴻⵙⵔⵉⵜ-ⴰ ⴰⴽⴽⴻⵏ ⴰⴷ ⵙⵙⵏⴻⵏ ⵍⴻⵚⵏⴰⴼ ⵢⴻⵎⴳⴻⵔⵔⴰⴷⴻⵏ ⵏ ⵓⴼⴻⵅⵅⴰⵔ ⴰⵢ ⴷ-ⵢⴻⵔⵙⴻⵏ ⴷⴻⴳ ⵜⴻⵎⴷⵉⵏⵜ-ⵏⵙⴻⵏ, ⴷ ⵉⴼⴰⵔⵉⵙⴻⵏ ⵉⵛⴻⴱⵃⴻⵏ ⴰⵢ ⴷ-ⵢⴻⵙⵙⴽⴰⵏⴰⵢⴻⵏ ⵜⴰⵏⴹⴰ ⴷ ⵜⵏⴻⵚⵍⵉⵜ ⵏ ⵜⴻⵏⴹⵉ ⴷ ⵜⴳⴻⵎⵎⵉ ⴷ ⵜⴰⴷⵣⴰⵢⵔⵉⵜ.
ⵜⴰⵎⴻⵙⵔⵉⵜ-ⴰ ⵜⴻⵍⵍⴰ-ⴷ ⴷⴰⵖ ⴷ ⵜⴰⴳⵏⵉⵜ ⵉⴼⴰⵣⴻⵏ ⵉ ⵢⴻⵏⴹⴻⵏ ⴰⴽⴽⴻⵏ ⴰⴷ ⵙⵙⴻⵏⵣⴻⵏ ⵉⴼⴰⵔⵉⵙⴻⵏ-ⵏⵙⴻⵏ ⴷⴻⴳ ⵡⵓⵙⵙⴰⵏ-ⴰ ⴰⵢⴷⴻⴳ ⵍⴰ ⴷ-ⵢⴻⵜⵜⵇⴻⵔⵔⵉⴱ ⵡⴰⵢⵢⵓⵔ ⵏ ⵔⴻⵎⴹⴰⵏ.
