Asebter amenzawi

Lḥijj: yella-d uxemmem ɣef uḥuddu n wacḥal n Yidzayriyen ara yeddun ɣer lḥijj

LDZAYER TAMANEƔT – Aneɣlaf n tɣawsiwin n ddin d lḥubus, Mohamed Aissa, yenna-d ass n lexmis deg Ldzayer dakken yella-d uxemmem d umciweṛ ɣef uḥuddu n wacḥal n Yidzayriyen izedɣen deg uzɣar ara yetteddun ɣer lḥijj, yerna amciweṛ-a la d-yettili d wakk idisan ay terza temsalt.

« Aɣlif n tɣawsiwin n ddin la ixeddem, s umɛawen d Tnarit taɣelnawt n lḥijj d lɛumṛa d yiḥricen ay terza temsalt n lḥijj akken ad d-lhun s temsalt-a », ɣef wakken ay d-yenna uneɣlaf ay d-yerran ɣef yiwert n tuttra timawit n yiwet n tmazant n ukabar n RND (Amsegraw aɣelnaw amegday) deg yiwet n tɣimit n Wegraw aɣerfan aɣelnaw ay d-yellan i tuttriwin timawiyin.

Aneɣlaf iger-d tiɣri i yimazanen ay d-yettgensisen Idzayriyen ay izedɣen deg uzɣar akken ad d-gen isumar deg wayen yerzan tamsalt-a, am wakken ay d-yenna dakken aḥuddu n wacḥal n Yidzayriyen iminigen ara iḥijjen d ayen ay yeḥwajen iḥezziben d ulmisen.

Mohamed Aissa yenna-d dakken idzayriyen ay izedɣen deg uzɣar sɛan izerfan d waɣanen (lwajbat) swaswa am wid ay sɛan warraw n tmurt-nsen ay izedɣen deg Ldzayer, yerna lḥijj yerza akk Idzayriyen, akken bɣun ilin.

I lmend n tijjin n Yidzayriyen ay izedɣen deg uzɣar ad ḍḍfen deg ddin n Lislam, aneɣlaf yenna-d daɣ dakken aɣlif-nnes « la ixeddem akken ad yettḍafar lecɣal n ddin yerna ad yazen limamat d tselmadin n ddin ɣer uzɣar, am wakken ay d-iwekked dakken Tamesgida Tameqrant n Paris tesɛa azal d dduṛ d imeqranen deg ussuddes d uḍfar n tẓallit d ttṛawiḥ deg wayyur imqeddes n Remḍan d tijjin n Yidzayriyen iminigen ad ɛebden Ṛebbi deg tegnatin igerrzen ».