Asebter amenzawi
« Ulac abrid niḍen menɣir tifrat tasertit deg Libya » (Messahel)
BERLIN – Aneɣlaf n tɣawsiwin n Lmeɣreb, Tadukli Tafriqit d Temɣunt Taɛṛabt, Abdelkader Messahel, yenna-d d akken « ulac abrid niḍen » menɣir win n ussefɛel « uɛjil » n tifrat tasertit deg Libya.
Mi t-tetter Tnegga n Yisalan n Lezzayer ɣef wayen ay d-yefrurin seg temlilit ay d-yellan ass n laṛebɛa deg Berlin ɣef Libya, Mass Messahel yenna-d d akken yumar (yefṛeḥ) imi « ay iban ass-a d akken amɣiwan agraɣlan teddukkel tmuɣli-nnes deg wayen yerzan taluft-a d tegnit yellan deg Libya, yerna adduden ay d-bedren wid ay yettekkan deg temlilit-a d wid yellan i lmend n ussefɛel s tɣawla n tifrat tasertit ayseg ulac tarewla ».
Mass Messahel yumar daɣ s « lebɣi n umɣiwan agraɣlan akken ad yerr amciweṛ d netta ay d abrid awḥid i lmend n tifrat tasertit ay yessaram uɣref alibi, yerna s temlilit-a, Ilibiyen sseknen-d d akken ḍḍfen deg lebɣi-nsen akken ad tefru taluft-nsen s tsertit, am wakken ay ɛewwlen ɣef waya s uttekki-nsen, s ubrid n yigensasen-nsen, deg yikalaten isertiyen yemgerraden ay la d-yettilin ussan-a ddaw leɛnaya n Yiɣlanen Yeddukklen ».
Ɣef leḥsab n Mass Messahel, « issumar n umqarab d umciweṛ d-yellan sɣur kra n yidisan ilibiyen d ayen ay d-yesskanayen tikli yelhan daxel tmurt-a, yerna tikli-a tetteddu ɣer yidis n lmejhud ay ttgent tmura tinaragin (tijiratin) d umɣiwan agraɣlan s umata i lmend n usserbeḥ n ukala n tifrat taluft-a, d tifrat ara ibeɛden ɣef tgermant tabeṛṛanit ».
Dɣa deg temsalt-a, Mass Messahel yenna-d d akken tifrat tasertit « ur tezmir ara ad teqqel d tidet arma ssawḍen yidisan ilibiyen ad d-kken nnig wayen ayɣef mgerraden », am wakken ay d-yenna d akken « yessefk akk wid ay yettekkan deg temsalt-a ad ddun, deg unadi-nsen ɣef tifrat, s ṛṛuḥ n umciweṛ, n tegmat d umsuɣal imi talwit, tadukli n Libya, amsefham gar Yilibiyen d uzekka n warraw-nsen d ayen ay yeḥwajen tukci n usfel d tijjin seg lḥeqq ».
Mass Messahel yesmekti-d daɣ d akken Lezzayer, seg wass amezwaru ay tdufeɛ ɣef tifrat tasertit, am wakken ay d-yenna d akken iḥar lḥal akken ad d-yettwassebded unabaḍ n tdukli taɣelnawt deg ara ttekkin akk yidisan, d win ay izemren ad yessers llsas i lebni n uwanak atrar yerna ad iqabel akk uguren, ama d wid n tɣellist (rrebrab d tejrimt yuddsen), ama d wid n tsertit, n tdamsa neɣ n lexṣaṣ iḥuzan medden.
