ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

« ⵓⵍⴰⵛ ⴰⴱⵔⵉⴷ ⵏⵉⴹⴻⵏ ⵎⴻⵏⵖⵉⵔ ⵜⵉⴼⵔⴰⵜ ⵜⴰⵙⴻⵔⵜⵉⵜ ⴷⴻⴳ ⵍⵉⴱⵢⴰ » (ⵎⴻⵙⵙⴰⵀⴻⵍ)

ⴱⴻⵔⵍⵉⵏ – ⴰⵏⴻⵖⵍⴰⴼ ⵏ ⵜⵖⴰⵡⵙⵉⵡⵉⵏ ⵏ ⵍⵎⴻⵖⵔⴻⴱ, ⵜⴰⴷⵓⴽⵍⵉ ⵜⴰⴼⵔⵉⵇⵉⵜ ⴷ ⵜⴻⵎⵖⵓⵏⵜ ⵜⴰⵄⵕⴰⴱⵜ, ⴰⴱⴷⴻⵍⴽⴰⴷⴻⵔ ⵎⴻⵙⵙⴰⵀⴻⵍ, ⵢⴻⵏⵏⴰ-ⴷ ⴷ ⴰⴽⴽⴻⵏ « ⵓⵍⴰⵛ ⴰⴱⵔⵉⴷ ⵏⵉⴹⴻⵏ » ⵎⴻⵏⵖⵉⵔ ⵡⵉⵏ ⵏ ⵓⵙⵙⴻⴼⵄⴻⵍ « ⵓⵄⵊⵉⵍ » ⵏ ⵜⵉⴼⵔⴰⵜ ⵜⴰⵙⴻⵔⵜⵉⵜ ⴷⴻⴳ ⵍⵉⴱⵢⴰ.

ⵎⵉ ⵜ-ⵜⴻⵜⵜⴻⵔ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ ⵖⴻⴼ ⵡⴰⵢⴻⵏ ⴰⵢ ⴷ-ⵢⴻⴼⵔⵓⵔⵉⵏ ⵙⴻⴳ ⵜⴻⵎⵍⵉⵍⵉⵜ ⴰⵢ ⴷ-ⵢⴻⵍⵍⴰⵏ ⴰⵙⵙ ⵏ ⵍⴰⵕⴻⴱⵄⴰ ⴷⴻⴳ ⴱⴻⵔⵍⵉⵏ ⵖⴻⴼ ⵍⵉⴱⵢⴰ, ⵎⴰⵙⵙ ⵎⴻⵙⵙⴰⵀⴻⵍ ⵢⴻⵏⵏⴰ-ⴷ ⴷ ⴰⴽⴽⴻⵏ ⵢⵓⵎⴰⵔ (ⵢⴻⴼⵕⴻⵃ) ⵉⵎⵉ « ⴰⵢ ⵉⴱⴰⵏ ⴰⵙⵙ-ⴰ ⴷ ⴰⴽⴽⴻⵏ ⴰⵎⵖⵉⵡⴰⵏ ⴰⴳⵔⴰⵖⵍⴰⵏ ⵜⴻⴷⴷⵓⴽⴽⴻⵍ ⵜⵎⵓⵖⵍⵉ-ⵏⵏⴻⵙ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⴰⵍⵓⴼⵜ-ⴰ ⴷ ⵜⴻⴳⵏⵉⵜ ⵢⴻⵍⵍⴰⵏ ⴷⴻⴳ ⵍⵉⴱⵢⴰ, ⵢⴻⵔⵏⴰ ⴰⴷⴷⵓⴷⴻⵏ ⴰⵢ ⴷ-ⴱⴻⴷⵔⴻⵏ ⵡⵉⴷ ⴰⵢ ⵢⴻⵜⵜⴻⴽⴽⴰⵏ ⴷⴻⴳ ⵜⴻⵎⵍⵉⵍⵉⵜ-ⴰ ⴷ ⵡⵉⴷ ⵢⴻⵍⵍⴰⵏ ⵉ ⵍⵎⴻⵏⴷ ⵏ ⵓⵙⵙⴻⴼⵄⴻⵍ ⵙ ⵜⵖⴰⵡⵍⴰ ⵏ ⵜⵉⴼⵔⴰⵜ ⵜⴰⵙⴻⵔⵜⵉⵜ ⴰⵢⵙⴻⴳ ⵓⵍⴰⵛ ⵜⴰⵔⴻⵡⵍⴰ ».

ⵎⴰⵙⵙ ⵎⴻⵙⵙⴰⵀⴻⵍ ⵢⵓⵎⴰⵔ ⴷⴰⵖ ⵙ « ⵍⴻⴱⵖⵉ ⵏ ⵓⵎⵖⵉⵡⴰⵏ ⴰⴳⵔⴰⵖⵍⴰⵏ ⴰⴽⴽⴻⵏ ⴰⴷ ⵢⴻⵔⵔ ⴰⵎⵛⵉⵡⴻⵕ ⴷ ⵏⴻⵜⵜⴰ ⴰⵢ ⴷ ⴰⴱⵔⵉⴷ ⴰⵡⵃⵉⴷ ⵉ ⵍⵎⴻⵏⴷ ⵏ ⵜⵉⴼⵔⴰⵜ ⵜⴰⵙⴻⵔⵜⵉⵜ ⴰⵢ ⵢⴻⵙⵙⴰⵔⴰⵎ ⵓⵖⵔⴻⴼ ⴰⵍⵉⴱⵉ, ⵢⴻⵔⵏⴰ ⵙ ⵜⴻⵎⵍⵉⵍⵉⵜ-ⴰ, ⵉⵍⵉⴱⵉⵢⴻⵏ ⵙⵙⴻⴽⵏⴻⵏ-ⴷ ⴷ ⴰⴽⴽⴻⵏ ⴹⴹⴼⴻⵏ ⴷⴻⴳ ⵍⴻⴱⵖⵉ-ⵏⵙⴻⵏ ⴰⴽⴽⴻⵏ ⴰⴷ ⵜⴻⴼⵔⵓ ⵜⴰⵍⵓⴼⵜ-ⵏⵙⴻⵏ ⵙ ⵜⵙⴻⵔⵜⵉⵜ, ⴰⵎ ⵡⴰⴽⴽⴻⵏ ⴰⵢ ⵄⴻⵡⵡⵍⴻⵏ ⵖⴻⴼ ⵡⴰⵢⴰ ⵙ ⵓⵜⵜⴻⴽⴽⵉ-ⵏⵙⴻⵏ, ⵙ ⵓⴱⵔⵉⴷ ⵏ ⵢⵉⴳⴻⵏⵙⴰⵙⴻⵏ-ⵏⵙⴻⵏ, ⴷⴻⴳ ⵢⵉⴽⴰⵍⴰⵜⴻⵏ ⵉⵙⴻⵔⵜⵉⵢⴻⵏ ⵢⴻⵎⴳⴻⵔⵔⴰⴷⴻⵏ ⴰⵢ ⵍⴰ ⴷ-ⵢⴻⵜⵜⵉⵍⵉⵏ ⵓⵙⵙⴰⵏ-ⴰ ⴷⴷⴰⵡ ⵍⴻⵄⵏⴰⵢⴰ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ».

Ɣⴻⴼ ⵍⴻⵃⵙⴰⴱ ⵏ ⵎⴰⵙⵙ ⵎⴻⵙⵙⴰⵀⴻⵍ, « ⵉⵙⵙⵓⵎⴰⵔ ⵏ ⵓⵎⵇⴰⵔⴰⴱ ⴷ ⵓⵎⵛⵉⵡⴻⵕ ⴷ-ⵢⴻⵍⵍⴰⵏ ⵙⵖⵓⵔ ⴽⵔⴰ ⵏ ⵢⵉⴷⵉⵙⴰⵏ ⵉⵍⵉⴱⵉⵢⴻⵏ ⴷ ⴰⵢⴻⵏ ⴰⵢ ⴷ-ⵢⴻⵙⵙⴽⴰⵏⴰⵢⴻⵏ ⵜⵉⴽⵍⵉ ⵢⴻⵍⵀⴰⵏ ⴷⴰⵅⴻⵍ ⵜⵎⵓⵔⵜ-ⴰ, ⵢⴻⵔⵏⴰ ⵜⵉⴽⵍⵉ-ⴰ ⵜⴻⵜⵜⴻⴷⴷⵓ ⵖⴻⵔ ⵢⵉⴷⵉⵙ ⵏ ⵍⵎⴻⵊⵀⵓⴷ ⴰⵢ ⵜⵜⴳⴻⵏⵜ ⵜⵎⵓⵔⴰ ⵜⵉⵏⴰⵔⴰⴳⵉⵏ (ⵜⵉⵊⵉⵔⴰⵜⵉⵏ) ⴷ ⵓⵎⵖⵉⵡⴰⵏ ⴰⴳⵔⴰⵖⵍⴰⵏ ⵙ ⵓⵎⴰⵜⴰ ⵉ ⵍⵎⴻⵏⴷ ⵏ ⵓⵙⵙⴻⵔⴱⴻⵃ ⵏ ⵓⴽⴰⵍⴰ ⵏ ⵜⵉⴼⵔⴰⵜ ⵜⴰⵍⵓⴼⵜ-ⴰ, ⴷ ⵜⵉⴼⵔⴰⵜ ⴰⵔⴰ ⵉⴱⴻⵄⴷⴻⵏ ⵖⴻⴼ ⵜⴳⴻⵔⵎⴰⵏⵜ ⵜⴰⴱⴻⵕⵕⴰⵏⵉⵜ ».

ⴷⵖⴰ ⴷⴻⴳ ⵜⴻⵎⵙⴰⵍⵜ-ⴰ, ⵎⴰⵙⵙ ⵎⴻⵙⵙⴰⵀⴻⵍ ⵢⴻⵏⵏⴰ-ⴷ ⴷ ⴰⴽⴽⴻⵏ ⵜⵉⴼⵔⴰⵜ ⵜⴰⵙⴻⵔⵜⵉⵜ « ⵓⵔ ⵜⴻⵣⵎⵉⵔ ⴰⵔⴰ ⴰⴷ ⵜⴻⵇⵇⴻⵍ ⴷ ⵜⵉⴷⴻⵜ ⴰⵔⵎⴰ ⵙⵙⴰⵡⴹⴻⵏ ⵢⵉⴷⵉⵙⴰⵏ ⵉⵍⵉⴱⵉⵢⴻⵏ ⴰⴷ ⴷ-ⴽⴽⴻⵏ ⵏⵏⵉⴳ ⵡⴰⵢⴻⵏ ⴰⵢⵖⴻⴼ ⵎⴳⴻⵔⵔⴰⴷⴻⵏ », ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷ ⴰⴽⴽⴻⵏ « ⵢⴻⵙⵙⴻⴼⴽ ⴰⴽⴽ ⵡⵉⴷ ⴰⵢ ⵢⴻⵜⵜⴻⴽⴽⴰⵏ ⴷⴻⴳ ⵜⴻⵎⵙⴰⵍⵜ-ⴰ ⴰⴷ ⴷⴷⵓⵏ, ⴷⴻⴳ ⵓⵏⴰⴷⵉ-ⵏⵙⴻⵏ ⵖⴻⴼ ⵜⵉⴼⵔⴰⵜ, ⵙ ⵕⵕⵓⵃ ⵏ ⵓⵎⵛⵉⵡⴻⵕ, ⵏ ⵜⴻⴳⵎⴰⵜ ⴷ ⵓⵎⵙⵓⵖⴰⵍ ⵉⵎⵉ ⵜⴰⵍⵡⵉⵜ, ⵜⴰⴷⵓⴽⵍⵉ ⵏ ⵍⵉⴱⵢⴰ, ⴰⵎⵙⴻⴼⵀⴰⵎ ⴳⴰⵔ ⵢⵉⵍⵉⴱⵉⵢⴻⵏ ⴷ ⵓⵣⴻⴽⴽⴰ ⵏ ⵡⴰⵔⵔⴰⵡ-ⵏⵙⴻⵏ ⴷ ⴰⵢⴻⵏ ⴰⵢ ⵢⴻⵃⵡⴰⵊⴻⵏ ⵜⵓⴽⵛⵉ ⵏ ⵓⵙⴼⴻⵍ ⴷ ⵜⵉⵊⵊⵉⵏ ⵙⴻⴳ ⵍⵃⴻⵇⵇ ».

ⵎⴰⵙⵙ ⵎⴻⵙⵙⴰⵀⴻⵍ ⵢⴻⵙⵎⴻⴽⵜⵉ-ⴷ ⴷⴰⵖ ⴷ ⴰⴽⴽⴻⵏ ⵍⴻⵣⵣⴰⵢⴻⵔ, ⵙⴻⴳ ⵡⴰⵙⵙ ⴰⵎⴻⵣⵡⴰⵔⵓ ⴰⵢ ⵜⴷⵓⴼⴻⵄ ⵖⴻⴼ ⵜⵉⴼⵔⴰⵜ ⵜⴰⵙⴻⵔⵜⵉⵜ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷ ⴰⴽⴽⴻⵏ ⵉⵃⴰⵔ ⵍⵃⴰⵍ ⴰⴽⴽⴻⵏ ⴰⴷ ⴷ-ⵢⴻⵜⵜⵡⴰⵙⵙⴻⴱⴷⴻⴷ ⵓⵏⴰⴱⴰⴹ ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ ⴷⴻⴳ ⴰⵔⴰ ⵜⵜⴻⴽⴽⵉⵏ ⴰⴽⴽ ⵢⵉⴷⵉⵙⴰⵏ, ⴷ ⵡⵉⵏ ⴰⵢ ⵉⵣⴻⵎⵔⴻⵏ ⴰⴷ ⵢⴻⵙⵙⴻⵔⵙ ⵍⵍⵙⴰⵙ ⵉ ⵍⴻⴱⵏⵉ ⵏ ⵓⵡⴰⵏⴰⴽ ⴰⵜⵔⴰⵔ ⵢⴻⵔⵏⴰ ⴰⴷ ⵉⵇⴰⴱⴻⵍ ⴰⴽⴽ ⵓⴳⵓⵔⴻⵏ, ⴰⵎⴰ ⴷ ⵡⵉⴷ ⵏ ⵜⵖⴻⵍⵍⵉⵙⵜ (ⵔⵔⴻⴱⵔⴰⴱ ⴷ ⵜⴻⵊⵔⵉⵎⵜ ⵢⵓⴷⴷⵙⴻⵏ), ⴰⵎⴰ ⴷ ⵡⵉⴷ ⵏ ⵜⵙⴻⵔⵜⵉⵜ, ⵏ ⵜⴷⴰⵎⵙⴰ ⵏⴻⵖ ⵏ ⵍⴻⵅⵚⴰⵚ ⵉⵃⵓⵣⴰⵏ ⵎⴻⴷⴷⴻⵏ.