ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵉⵎⴻⵏⵖⵉ ⵎⴳⴰⵍ ⵔⵔⴻⴱⵔⴰⴱ: ⵙⴻⵍⵍⴰⵍ ⵉⵡⴻⴽⴽⴻⴷ-ⴷ ⴷⴰⴽⴽⴻⵏ « ⵢⴻⵙⵙⴻⴼⴽ » ⴰⴷ ⵢⴻⵜⵜⵡⴰⵙⵙⴻⵊⵀⴻⴷ ⵓⵅⴻⴷⴷⵉⵎ ⵓⵛⵔⵉⴽ ⴳⴰⵔ ⵜⵎⵓⵔⴰ ⵜⵉⴼⵔⵉⵇⵉⵢⵉⵏ
ⵊⵓⵀⴰⵏⴻⵣⴱⵓⵔⴳ – ⴰⵏⴻⵖⵍⴰⴼ ⴰⵎⴻⵏⵣⵓ ⴰⴱⴷⴻⵍⵎⴰⵍⴻⴽ ⵙⴻⵍⵍⴰⵍ ⵉⵡⴻⴽⴽⴻⴷ-ⴷ ⴰⵙⵙ ⵏ ⵙⵙⴻⴱⵜ ⴷⴻⴳ ⵊⵧⵀⴰⵏⵏⴻⵙⴱⵓⵔⴳ ⴷⴰⴽⴽⴻⵏ « ⵢⴻⵙⵙⴻⴼⴽ ⴰⴷ ⵢⴻⵜⵜⵡⴰⵙⵙⴻⵊⵀⴻⴷ ⵓⵎⴰⵀⵉⵍ (ⴰⵅⴻⴷⴷⴻⵎ) ⵓⵛⵔⵉⴽ ⴳⴰⵔ ⵜⵎⵓⵔⴰ ⵜⵉⴼⵔⵉⵇⵉⵢⵉⵏ ⴷⴻⴳ ⵢⵉⵎⴻⵏⵖⵉ ⵎⴳⴰⵍ ⵔⵔⴻⴱⵔⴰⴱ, ⴰⵎ ⵡⴰⴽⴽⴻⵏ ⴰⵢ ⴷ-ⵉⴳⴻⵔ ⵜⵉⵖⵔⵉ ⵉ ⵓⵎⴰⵀⵉⵍ ⵉ ⵍⵎⴻⵏⴷ ⵏ ⵓⵅⵏⴰⵇ ⵏ ⵜⵍⵉⵡⴰ ⴰⵢⵙⴻⴳ ⴰⵢ ⴷ-ⵢⴻⵜⵜⴰⴳⴻⵎ ⵔⵔⴻⴱⵔⴰⴱ ⵉⴷⵔⵉⵎⴻⵏ ⵉⵎⵉ, ⵖⴻⴼ ⵍⴻⵃⵙⴰⴱ-ⵏⵏⴻⵙ, ⴷ ⴰⵢⴰ ⴰⵢ ⴷ ⵍⵍⵙⴰⵙ ⴰⵎⴻⵇⵔⴰⵏ ⴷⴻⴳ ⵢⵉⵎⴻⵏⵖⵉ ⵎⴳⴰⵍ ⵓⵅⴻⵚⵚⴰⵔ-ⴰ.
« ⵓⵍⴰ ⵎⴰ ⵔⵔⴻⴱⵔⴰⴱ ⵍⴰ ⵢⴻⵜⵜⴰⵖ ⵜⵉⵢⵜⵉⵡⵉⵏ ⵉⵊⴻⵀⴷⴻⵏ, ⵎⴰⵣⴰⵍ-ⵉⵜ ⵢⴻⵍⵍⴰ ⴷⴻⴳ ⵡⴰⵟⴰⵙ ⵏ ⵜⴻⵎⵏⴰⴹⵉⵏ ⵏ ⵜⴻⴼⵔⵉⵇⵜ, ⵍⴰⴷⵖⴰ ⵜⴰⵎⵏⴰⴹⵜ ⵏ ⵙⵙⴰⵃⴻⵍ ⴷ ⵓⵏⴻⵥⵔⵓⴼ ⴰⵎⴻⵇⵔⴰⵏ, ⵢⴻⵔⵏⴰ ⵎⴰⵣⴰⵍ ⵍⴰ ⵉⴳⴻⵍⵍⵓ ⵙ ⵡⵓⴳⴰⵔ ⵏ ⵜⵎⴻⴷⴷⵓⵔⵉⵏ ⴰⵎ ⵡⴰⴽⴽⴻⵏ ⴰⵢ ⵢⴻⵙⵡⴰⵖ ⴰⵔⴽⴰⴷ ⴷ ⵜⵏⴻⴼⵍⵉⵜ ⵏ ⵓⵎⴻⵏⵥⴰⵡ-ⵏⵏⴻⵖ. ⵖⴻⴼ ⵡⴰⵢⴰ, ⵢⴻⵙⵙⴻⴼⴽ ⴰⴷ ⵢⴻⵜⵜⵡⴰⵙⵙⴻⵊⵀⴻⴷ ⵓⵎⴰⵀⵉⵍ ⵓⵛⵔⵉⴽ ⴷⴻⴳ ⵡⴰⴽⴽ ⵉⵙⵡⵉⵔⴻⵏ ⵢⴻⵔⵏⴰ ⴷⴻⴳ ⵡⴰⴽⴽ ⵉⵏⵓⵔⴰⵔ ⴰⴽⴽⴻⵏ ⴰⴷ ⵢⴻⵜⵜⵡⴰⵙⵙⴻⵏⴳⴻⵔ ⵓⵅⴻⵚⵚⴰⵔ-ⴰ ⵢⴻⵍⵍⴰⵏ ⴷ ⴰⴱⴻⵕⵕⴰⵏⵉ ⵖⴻⴼ ⵜⵎⴻⵜⵜⵉⵢⵉⵏ-ⵏⵏⴻⵖ, ⵉⴷⴻⵍⵙⴰⵏ ⴷ ⴷⴷⵢⴰⵏⴰⵜ-ⵏⵏⴻⵖ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷⴻⴳ ⵜⴻⵎⵍⵉⵍⵉⵜ ⵏ ⵢⵉⵖⴼⴰⵡⴻⵏ ⵏ ⵓⵡⴰⵏⴰⴽ ⴷ ⵓⵏⴰⴱⴰⴹ ⵏ ⵓⵙⴻⵇⵇⴰⵎⵓ ⵏ ⵜⴰⵍⵡⵉⵜ ⴷ ⵜⵖⴻⵍⵍⵉⵙⵜ ⵏ ⵜⴷⵓⴽⵍⵉ ⵜⴰⴼⵔⵉⵇⵉⵜ.
ⵎⴰⵙⵙ ⵙⴻⵍⵍⴰⵍ ⵢⴻⵏⵏⴰ-ⴷ, ⴷⴻⴳ ⵜⴻⵎⵙⴰⵍⵜ-ⴰ, ⴷⴰⴽⴽⴻⵏ ⵢⴻⵙⵙⴻⴼⴽ ⵉⵏⴰⴱⴰⴹⴻⵏ ⵉⴼⵔⵉⵇⵉⵢⴻⵏ ⴰⴷ ⵙⵙⴻⵍⵀⵓⵏ ⵜⵉⵣⴻⵎⵎⴰⵔ-ⵏⵙⴻⵏ ⵏ ⵜⵔⵉⵜⵉⵜ ⵏ ⵜⵢⵉⵜⴰ ⴷ ⵜⵜⴰⵡⵉⵍⴰⵜ-ⵏⵙⴻⵏ ⵏ ⵜⴳⴻⵔⵎⴰⵏⵜ ⴷ ⵓⵏⴰⴷⵉ ⵖⴻⴼ ⵜⵍⵉⵡⴰ ⴰⵢⵙⴻⴳ ⴰⵢ ⴷ-ⵢⴻⵜⵜⴰⴳⴻⵎ ⵔⵔⴻⴱⵔⴰⴱ ⵉⴷⵔⵉⵎⴻⵏ-ⵏⵙⴻⵏ, ⴰⵎ ⵡⴰⴽⴽⴻⵏ ⴰⵔⴰ ⵏⵏⴰⵖⴻⵏ ⵎⴳⴰⵍ ⵜⴻⵙⵏⴰⴽⵜⵉⵡⵉⵏ ⵜⵉⵎⴻⴹⴹⵓⵔⴼⴰ ⵙ ⵓⵙⵙⴻⴱⴷⴻⴷ ⵏ ⵜⵙⴻⵔⵜⵉⵢⵉⵏ ⵜⵉⴷⵓⵎⴰⵏⵉⵏ ⴰⵔⴰ ⵢⴻⵜⵜⵃⴰⵕⴰⴱⴻⵏ ⵜⵉⴹⴹⵓⵔⴼⴰ.
ⴰⵎⴰⵀⵉⵍ ⴰⴼⵔⵉⵇⵉ ⵓⵛⵔⵉⴽ ⴰⵢⵖⴻⴼ ⴷ-ⵜⴳⴻⵔ ⵍⴷⵣⴰⵢⴻⵔ ⵜⵉⵖⵔⵉ ⴷ ⵡⵉⵏ ⴰⵔⴰ ⴷ-ⵢⵉⵍⵉⵏ ⴷⴰⵖ ⵙ « ⵍⴻⵎⵄⴰⵡⵏⴰ ⴰⵔⴰ ⵢⴻⵜⵜⵓⵏⴻⴼⴽⴻⵏ ⵉ ⵜⵎⵓⵔⴰ ⵜⵉⴼⵔⵉⵇⵉⵢⵉⵏ ⴷⴻⴳ ⵍⵎⴻⵊⵀⵓⴷ-ⵏⵙⴻⵏⵜ ⵏ ⵓⵙⵙⵉⵍⴻⵖ ⴷ ⵓⵙⵙⴻⴱⵍⴻⵍ » ⴰⵎⴰ ⴷⴻⴳ ⵓⵏⵔⴰⵔ ⵏ ⵜⴻⵎⵃⴰⴷⴷⵉⵜ, ⴰⵎⴰ ⴷⴻⴳ ⵡⵉⵏ ⵏ ⵍⴻⵅⵚⴰⵚ ⵏ ⵜⵜⴻⵊⵕⵉⴱⴰ ⴷⴻⴳ ⵢⵉⵏⵓⵔⴰⵔ ⵢⴻⵎⴳⴻⵔⵔⴰⴷⴻⵏ ⵢⴻⵇⵇⵏⴻⵏ ⵖⴻⵔ ⵢⵉⵎⴻⵏⵖⵉ ⵎⴳⴰⵍ ⵔⵔⴻⴱⵔⴰⴱ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵙⴻⵍⵍⴰⵍ.
ⵖⴻⵔ ⵢⵉⴷⵉⵙ ⵏ ⵓⵎⴰⵀⵉⵍ ⴰⵔⴰ ⵢⴻⵔⵥⴻⵏ ⵉⴼⴰⴷⴷⴻⵏ ⵉ ⵔⵔⴻⴱⵔⴰⴱ ⴷⴻⴳ ⵓⵏⵔⴰⵔ, ⵎⴰⵙⵙ ⵙⴻⵍⵍⴰⵍ ⵢⴻⵏⵏⴰ-ⴷ ⴷⴰⴽⴽⴻⵏ ⴰⵅⵏⴰⵇ ⵏ ⵜⵍⵉⵡⴰ ⴰⵢⵙⴻⴳ ⴰⵢ ⴷ-ⵢⴻⵜⵜⴰⴳⴻⵎ ⵔⵔⴻⴱⵔⴰⴱ ⵉⴷⵔⵉⵎⴻⵏ ⴷ ⵍⵍⵙⴰⵙ ⵏⵉⴹⴻⵏ ⴰⵎⴻⵇⵔⴰⵏ ⴷⴻⴳ ⵢⵉⵎⴻⵏⵖⵉ ⵓⵛⵔⵉⴽ ⵎⴳⴰⵍ ⵓⵅⴻⵚⵚⴰⵔ-ⴰ ⴰⵢ ⵉⵃⵓⵣⴰⵏ ⴰⴽⴽ ⴰⵎⴰⴹⴰⵍ.
ⵖⴻⴼ ⵍⴻⵃⵙⴰⴱ ⵏ ⵓⵏⴻⵖⵍⴰⴼ ⴰⵎⴻⵏⵣⵓ, ⴰⵜⵜⴻⴽⴽⵉ ⵓⵙⵔⵉⴷ ⵏ ⵜⴻⴳⵔⴰⵡⵉⵏ ⵜⵉⵔⴻⴱⵔⴰⴱⵉⵏ ⴷⴻⴳ ⵓⵙⵙⴻⵜⵜⵉ ⵏ ⵜⴻⵀⵢⵓⴼⵉⵏ (ⵍⴻⵀⵢⵓⴼ) ⴷ ⵓⵅⴻⵍⵍⴻⵚ ⵏ ⵢⵉⴷⵔⵉⵎⴻⵏ ⵉ ⴼⴻⴷⴷⵓ ⵏ ⵢⵉⵎⴻⵕⵀⴰⵏ ⴷ ⴰⵢⴻⵏ ⴰⵢ « ⵉⵔⴻⵏⵏⵓⵏ » ⵜⵉⵣⴻⵎⵎⴰⵔ ⵏ ⵜⴻⴳⵔⴰⵡⵉⵏ-ⴰ ⴷⴻⴳ ⵓⵙⵙⵉⴷⴻⴼ ⵏ ⵢⵉⵔⴻⴱⵔⴰⴱⴻⵏ ⵉⵎⴰⵢⵏⵓⵜⴻⵏ, ⵜⵉⵖⵉⵏ ⵏ ⵍⴻⵙⵍⴰⵃ ⴷ ⵜⵜⴰⵡⵉⵍⴰⵜ, ⵍⴰⴷⵖⴰ ⵜⵜⴰⵡⵉⵍⴰⵜ ⵏ ⵜⴻⵖⵡⴰⵍⵜ.
ⵎⴰⵙⵙ ⵙⴻⵍⵍⴰⵍ ⵉⵃⴻⵜⵜⴻⵜ-ⴷ ⴷⴰⵖ, ⴷⴻⴳ ⵜⴻⵎⵙⴰⵍⵜ-ⴰ, ⵖⴻⴼ ⵡⴰⵣⴰⵍ ⴰⵢ ⵢⴻⵙⵄⴰ ⵓⵎⴰⵀⵉⵍ ⵓⵛⵔⵉⴽ ⵏ ⵜⵎⵓⵔⴰ ⵜⵉⴼⵔⵉⵇⵉⵢⵉⵏ ⴰⴽⴽⴻⵏ ⴰⴷ ⵙⵏⴻⵔⵏⵉⵏⵜ ⴰⵎⵄⴰⵡⴻⵏ ⴰⴳⵔⴰⵖⵍⴰⵏ ⵉⵊⴻⵀⴷⴻⵏ ⵓⴳⴰⵔ ⴷⴻⴳ ⵢⵉⵎⴻⵏⵖⵉ ⵎⴳⴰⵍ ⵜⴻⵀⵢⵓⴼⵉⵏ, ⵉⵎⵉ ⴷ ⵜⵉ ⴰⵢ ⴷ ⵜⴰⵍⴰ ⵜⴰⵎⴻⵇⵔⴰⵏⵜ ⴰⴽⴽ ⴰⵢⵙⴻⴳ ⴰⵢ ⴷ-ⵢⴻⵜⵜⴰⴳⴻⵎ ⵔⵔⴻⴱⵔⴰⴱ ⵉⴷⵔⵉⵎⴻⵏ.
ⴷⵖⴰ ⴷⵉⵎⴰ ⴷⴻⴳ ⵜⴻⵎⵙⴰⵍⵜ-ⴰ, ⵎⴰⵙⵙ ⵙⴻⵍⵍⴰⵍ ⵢⴻⵙⵎⴻⴽⵜⵉ-ⴷ ⴷⴰⴽⴽⴻⵏ ⴰⴷ ⴷ-ⵢⵉⵍⵉ ⴷⴻⴳ ⵡⴰⵢⵢⵓⵔ-ⴰ ⵏ ⵢⵓⵍⵢⵓ ⴷⴻⴳ ⵍⴷⵣⴰⵢⴻⵔ ⵢⵉⵡⴻⵏ ⵏ ⵓⵙⴰⵔⴰⴳ ⵏ ⵓⵙⵡⵉⵔ ⵓⵏⵏⵉⴳ ⵖⴻⴼ ⵜⴻⵎⵙⴰⵍⵜ-ⴰ ⵉ ⵍⵎⴻⵏⴷ ⵏ ⵓⵀⴻⵢⵢⵉ ⵏ ⵜⵙⵓⴷⴷⴻⵙⵜ ⵜⵓⵛⵔⵉⴽⵜ ⵉ ⵢⵉⵎⴻⵏⵖⵉ ⵎⴳⴰⵍ ⵡⴰⵢⴰ.
