Asebter amenzawi

Lbak 2015: 456 n liḥalat n lexdeɛ

LDZAYER TAMANEƔT – Taneɣlaft n ussegmi aɣelnaw, Nouria Benghebrit txebber-d ass n ssebt deg Ldzayer Tamaneɣt dakken 456 n liḥalat n lexdeɛ ay d-yellan deg ukayad n lbak n 2015, yerna tenna-d inelmaden ixeddaɛen teqwa-d fell-asen tɛessast.

Massa Benghebrit tekcef-d isali-a deg yiwen n usarag n tɣemsa ay d-yellan i lmend n Wass n ugrud afriqi, am wakken ay d-tenna dakken tikli ay d-wwin d yinelmaden ixeddaɛen d tikli taqurant.

Taneɣlaft tenna-d dakken aɣlif-nnes ad yernu ad yessejhed taɛessast deg lbak n 2016 akken ad iqabel ugur n lexdeɛ s teknussniwin timaynutin n usselɣu d teɣwalt.

Dɣa deg temsalt-a, ad d-yebdu uskasi deg Yulyu-a ɣef ussuddes n yikayaden d wamek ara d-ttwaheyyin yisental i lmend n uqeyyem n yinelmaden.

« Ula ma aɣerbaz d tamsalt ay aɣ-yerzan akken ma nella, aɣlif yeddem tamasit-nnes akken iwata yerna ur yeqbil ara ad yettwaddem ṛṛay ara yeffɣen kan ɣef medden yili yezmer ad iḍurr, am wakken ur yeqbil ara tikli ara d-yawin lmaḍerra neɣ ad yeg abrid i lexdeɛ », ɣef wakken d-tenna Massa Benghebrit.

Taneɣlaft tɛuhed daɣ ad d-teg « abeddel n tidet » deg kra n yisekkiyen isnegmanen akken ad snernin tizemmar n lbal n ubalmud.

Dɣa tenna-d deg temsalt-a dakken awanak yeddem tamasit-nnes deg wayen yerzan tasemmeskelt n ussegmi yerna aselway n tegduda Abdelaziz Bouteflika yessebded-d taseqqamut i uḍman n « tgadda d tɣara ».