Asebter amenzawi
Tamḥaddit n Abdelmoumene Khelifa tesɛa ccek deg wamek ay d-yella ucaṛeɛ n temsalt-a
LEBLIDA – Abugaṭu n Rafik Abdelmoumene Khelifa, Akerwa Meroaune Medjehouda, yenna-d, ass n ssebt deg uxxam n ccṛeɛ n tejrimin n Leblida, dakken yesɛa ccek deg « llsas n lqanun » ayɣef yettwabna umur meɣɣren n tsekkirin yeqqnen ɣer uttham n Khelifa.
Abugaṭu-a yenna-d dakken tasekkirt yerzan aheyyi n lewṣaya n tuḍḍfa n Abdelmoumene Khelifa « ur tesɛi ara llsas » deg lqanun, yerna iwala dakken attham n Khelifa s tukerḍa n yidrimen usligen d « ayen ay d-yessadafen ccek deg uxeddim n teɣdemt ».
Deg tɣuri-nnes n temḥaddit, abugaṭu-a yebder-d acḥal n ttbutat ay d-yesskanayen, ɣef leḥsab-nnes, amek ay d-lhan s temsalt-a « war ttbut », yerna, deg temsalt-a, yebder-d imwekklen ay d-yegren tiɣri i teɣtast (wid yeḍruran) d yikataren n tegrawt n Khalifa akken ad ccetkin ɣef Abdelmoumene Khelifa
Deg wayen yerzan amecwaṛ ay d-tewwi Tbanka n Khalifa, abugaṭu yenna-d dakken tikli ay d-yewwi Khelifa d « tin n umdan yesɛan tabɣest deg tegnit aydeg Ldzayer tella tedder deg yiwet n tegnit tadamsant ayɣef ur yelli ara lettkal ».
Abugaṭu yerna-d daɣ dakken Tabanka n Khalifa « tella-d, sakkin, d taɣtest n unbac ay tt-tenbec » Tbanka n Ldzayer. Dɣa ɣef waya ay d-yenna ubugaṭu-a dakken « ur yefki ara azal i cchadat n yimḍebbren n Tbanka n Ldzayer », am wakken ur yeqbil ara ula d abdad n Tbanka n Ldzayer d taɣtest deg temsalt-a.
Deg wayen yerzan asemmi n Mohamed Djellab d anedbal, abugaṭu-a yenna-d dakken tin « d tiḥilet i urbaḥ n wakud uqbel ma tettwafsex wayla n tbanka-nni ».
Abugaṭu n Khelifa yenna-d, deg temsalt-a daɣ, dakken ur yeẓri ara maɣef ay iɣab uṛabul n temsetla taɣelnawt deg uṛabul n win ay d-yelhan s ufsax n wayla n tbanka-nni, yerna, ɣef leḥsab-nnes, aṛabul-a yebder-d tukerḍa n ttawilat n tsenselkimt seg lmexzen n Khalifa, d ttawilat yewwḍen ɣer 8 n yimelyunen n yidinaṛen.
Dima deg temsalt-a, abugaṭu yenna-d daɣ dakken yesɛa ccek deg umahil (axeddim) n win ay d-yelhan s ufsax n wayla n Tbanka n Khalifa, yerna yessuter, ɣef waya, akken « leḥsabat ay d-iqeddem win ay d-yelhan d ufsax ur ten-id-ggaren ara deg leḥsab imi leḥsabat-a ur d-ɛeddan ara ɣef yimazzayen ».
Deg wayen yerzan tisekkirin n ccṛeɛ yellan d llsas n ucaṛeɛ n Khelifa, abugaṭu yenna-d dakken « yessefk ad yettwasseqdec daɣ ṛṛay n truẓi n ccṛeɛ ».
Mi d-yenna dakken ttehmat mgal Abdelmoumene Khelifa ur sɛint llsas, Akerwa Medjehouda yessuter i lqaḍi ad as-d-yessuref i Khelifa.
Tiɣimit ay d-iḍefren ta d tin aydeg Nacereddine Lezzar, d abugaṭu niḍen n Khelifa, yeɣra-d accetki-nnes n temḥaddit aydeg ay d-yenna dakken tamsalt n Khalifa d amsefham ameqran ay d-yellan s tuffra ɣef yiɣef n wid ay yettwattehmen.
Abugaṭu n uzemmam Rahal Omar ad d-iɣer accetki-nnes n temḥaddit deg tɣimit n wass n lḥedd.
