Asebter amenzawi
Air Algerie la tessefray ad terẓem igaṛajen i uṣeggem n yisafagen ibeṛṛaniyen
LDZAYER TAMANEƔT – Takebbanit n Air Algerie la tessefray ad terẓem ammasen i ubdad d uṣeggem n yisafagen tkebbaniyin tifriqiyin asmi ara d-tesnulfu afurk-nnes amaynu ara d-yelhun s uṣeggem n yisafagen, d ayen yellan d aḥric seg uɣawas-nnes n uɛawed n uṣeggem, ɣef wakken ay d-yenna ass n ssebt deg Ldzayer Tamaneɣt uselway-anemhal amatu Mohamed Abdou Bouderbala.
« Nesɛa llsas yelhan deg ubdad i yisafagen. Ihi, ad nerẓem asadur-a n ubdad i yisafagen ibeṛṛaniyen », ɣef wakken ay d-yenna Mass Bouderbala deg yiwen n umyager d tɣemsa deg yijifeṛ n usarag asegsan n yikataren n tkebbanit-a.
« Giɣ inermisen d kra n tkebbaniyin tifriqiyin n waffug ay yebɣan ad ttṣeggiment isafagen-nsent ɣer-neɣ ». Wa d anrar ay izemren ad d-yessidef aṭas n yidrimen i Air Algerie, ɣef wakken ay d-yessefhem.
Deg ukatar n uɣawas uɛawed n uṣeggem n Air Algerie (ay yeqbel Useqqamu n uyittekkiyen n uwanak), Air Algerie ad tesɛu 4 n yifurka imaynuten.
Afurk amezwaru d takebbanit n ussecci (ara d-yettheyyin tiram n wucci i yimsiklen), wis sin d afurk yemmuzzgen (yetxeṣṣeṣen) deg umesni n sselɛa, wis kraḍ d afurk n ussefrek n rrekba d yifecka, ma d afurk wis kuẓ d takebbanit ara yemmuzzgen deg ubdad d uṣeggem n yisafagen n Air Algerie d wid n tkebbaniyin niḍen n waffug.
« Mi ara d-nelhu s ubdad i yisafagen d umesni n sselɛa, ad nessiweḍ daɣ ad neg ugar n lmejhud deg wayen yerzan assenqes n ssumat i yimsiklen », ɣef wakken ay d-yenna Mass Bouderbala.
Deg 2014, amḍan n yiweẓla n Air Algerie yerna s 10,5% yerna yewweḍ ɣer 76 n yimelyaṛen n yidinaṛen, deg wakud aydeg yella 69,9 n yimelyaṛen n yidinaṛen deg 2013, ɣef leḥsab tkebbanit.
Air Algerie tessaweḍ ɣer yigmaḍ-a imi ay yerna ussikel s 10% yerna yewweḍ umḍan n yimsiklen ɣer 5,2 n yimelyunen deg 2014, deg wakud aydeg yella 4,8 n yimelyunen deg 2013.
« Seg yidis n tedrimt, nesɛa tizemmar yelhan yerna nebɣa ad tent-nessejhed s umeẓlu ara yesɛun taɣara yelhan ugar. Ma nessaweḍ ad d-nerbeḥ imenɣi-a, Air Algerie ad tessiweḍ ad d-teqqel ɣer umkan-nnes deg umaḍal », ɣef wakken ay d-yenna.
