Asebter amenzawi
Ould Salek: Taqacuct tis 25 n Tdukli Tafriqit « ad tesɛu azal » yerna ad tadef « deg umezruy » n yimenɣi aṣeḥrawi
PRETORIA – Aneɣlaf aṣeḥrawi n tɣawsiwin n uzɣar, Mohamed Salem Ould Salek, yenna-d ass n ljemɛa deg Pretoria (Tafriqt n Unẓul) dakken taqacuct tis 25 n Tdukli Tafriqit « ad tesɛu azal d ameqran » yerna « ad tadef deg umezruy » deg wayen yerzan imenɣi aṣeḥrawi.
« Taqacuct n yiɣfawen n uwanak d unabaḍ n Tdukli Tafriqit ad tesɛu azal d ameqran yerna ad tadef deg umezruy, imi iṛabulen n Uneẓruf Utrim ayɣef ara d-yili wawal sɛan azal, ladɣa aṛabul n Tseqqamut tafriqit ay d-yegren tiɣri i Yiɣlanen Yeddukklen i usseɛjel n ussuddes n tsefrant n Uneẓruf Utrim », ɣef wakken ay d-yenna uneɣlaf aṣeḥrawi n tɣawsiwin n uzɣar deg yiwen n udiwenni ay iga d Tnegga n Yisalan n Ldzayer.
Deg tqacuct-a, ɣef wakken ay d-yenna, ad d-yili ussukku n tiṭ ɣef tneɣtust ay yesɛdda deg Meɣres yezrin Useqqamu n talwit d tɣellist n Tdukli Tafriqit, d tin ay ddmen ass n lexmis yineɣlafen ifriqiyen deg tɣimit tanumant tis 27 n Useqqamu aslekman n Tdukli Tafriqit yerna d tin ara yettunefken i yiɣfawen n uwanak d unabaḍ akken ad d-ssukken fell-as tiṭ ussan n 14 d 15 Yunyu deg Johannesburg.
Mi d-yebder dduṛ n Tdukli Tafriqit deg tifin n tifrat i temsalt taṣeḥrawit, Mass Ould Salek yesmekti-d dakken Tadukli Tafriqit d nettat ay d « ḍḍamen wis sin n uɣawas n tifrat ay qeblen yidisan aṣeḥrawi d umeṛṛuki deg 1991 ddaw leɛnaya n Tdukli Tafriqit d Yiɣlanen Yeddukklen », am wakken ay d-yenna dakken Tadukli Tafriqit « la tetteg lmejhud akken ad teg dduṛ-nnes yerna la d-tessutur assuddes n tsefrant ».
Aneɣlaf aṣeḥrawi iwet-d, seg yidis niḍen, deg dduṛ n Useqqamu n tɣellist (laman) « ay la yessefraken, seg yidis atekni, assuddes n tsefrant », am wakken ay d-yenna dakken Aseqqamu-a « atan deg tegnit ur t-yejjin ara ad yurar dduṛ-nnes imi ay llan yiɣallen d tmura timezga ay yettekkan deg-s ay yesseqdacen aviṭu-nsent, ladɣa Fṛansa, yerna reglent abrid i wakk isurifen » n tifrat.
« Ugur ur yelli ara deg tigin ay tugi Meṛṛuk ad teḍfer tineɣtutin n Yiɣlanen Yeddukklen yerna ad tessefɛel ayen ayɣef d-yella umtawa », maca ugur yekka-d « seg sdaxel n Useqqamu n tɣellist anda isurifen n umɣiwan agraɣlan ur ten-ǧǧin ara ad kemmlen », ɣef wakken ay d-yenna.
Imḍebbren ifriqiyen n Tdukli Tafriqit « gren-d tamsalt-a deg leḥsab yerna la ɛerrḍen ad gen kra akken ad faken tagnit-a », ɣef wakken ay d-yenna uneɣlaf n tɣawsiwin n uzɣar n Uneẓruf Utrim, am wakken ay d-yesmekti dakken sin n yiseggasen aya, Tadukli Tafriqit tsemma-d Joaquim Chissano d amazun uzzig i Uneẓruf Utrim, d acu kan, Aseqqamu n tɣellist « ur inuda ara ad iẓer iṛabulen n uneggaru-a (Chissano) imi d Fṛansa ay la iregglen abrid i ukala n ussuddes n tsefrant ».
Aya, ɣef leḥsab n Ould Salek, d lbaṭel ufḍiḥ, yerna idis amezwaru ay terza temsalt n ussuffeɣ n ussehres (listiɛmaṛ) seg Uneẓruf Utrim netta d Tafriqt s timmad-nnes. Maca ula d amɣiwan agraɣlan ibubb amur-nnes n tuzzma, ɣef wakken ay d-yenna.
Mi yettwatter ma yella assidef n temsalt taṣeḥrawit deg wahil n tqacuct n Tdukli Tafriqit ad yeḥṛes Meṛṛuk akken ad d-tesseɛjel assuddes n tsefrant i ugguccelman, aneɣlaf aṣeḥrawi n tɣawsiwin n uzɣar yenna-d dakken Meṛṛuk « tettwaɛzel deg Tdukli Tafriqit » yerna tettkel ɣef « ubdad d ufus ay tefka yiwet n tmurt yellan d tamaslaḍt timezgit n Useqqamu n tɣellist ».
Mass Ould Salek yeckeṛ-d daɣ « lebɣi ijehden n tidet » n Tdukli Tafriqit akken ad tefru tamsalt taṣeḥrawit, yerna yenna-d dakken Tadukli Tafriqit tuki mliḥ dakken s kra n urgal ara d-yilin deg ubrid n uzref n uɣref aṣeḥrawi akken ad tt-id-yefru ɣef uzekka-nnes d ayen ara d-yeglun s lmaḍerra i temnaḍt ay d-yezzin ɣef Uneẓruf Utrim d Tefriqt s umata.
Imḍebbren n tmura yettekkan deg Tdukli Tafriqit ttḥulfun terza-ten temsalt n uɣref aṣeḥrawi, dɣa ɣef waya ara xedmen akken ad ɛawden ad d-sduqqsen akala n tukksa n ussehres seg Uneẓruf Utrim, ɣef wakken ay d-yenna.
