Asebter amenzawi

Tessawel Lezzayer i useǧhed n umedhel agraɛrab akken ad nbed mgal akk wid iteẓẓun cwal d beṭṭu

TUNES – Tessawel Lezzayer s yimi n umwekkel n teɣwalt deg Tmehla tamatut n Tɣelliste taɣelnawt (DGSN), akumisar agejdan Omar Laaroum, s usseǧhed n umedhel akken ad nbed mgal akk wid iteẓẓun cwal d beḍḍu deg umaḍal aɛrab.

Yemmeslay-d deg usarag wis 11 n yimasayen iɛraben n yeḥricen yerzan taɣwalt n Temsulta, i d-yeḍran melmi kan deg tmurt n Tunes, yenna-d Mass Laaroum belli ‘’tagnit n tura ideg yella umaḍal aɛrab, ggtent deg-s idefriren n rrebrab yesɛan ismawan yemgarden, ḥettment-d fell-aɣ akken ad nesdukel ussisen-nneɣ akken ad nbed mgal akk wid iteẓẓun cwal d beḍḍu deg uɣlan aɛrab’’.

Yerna yenna-d daɣen, dduṛ-a n yeḥricen yerzan taɣwalt d ttawilat n yisalan ‘’deg umennuɣ mgal rrebrab d tiṭṭurfa’’.

I lmend n tegnit-a, Mass Laaroum yeɣra-d tabrat n unemhal amatu n Tɣellist, ajiniral ameqran Abdelghani Hamel, i wid yekkin deg usarag, yenna-d deg-s belli yessaram ‘’ad tenǧeḥ temlilit-a akken ad nesnerni laman ger uɣerman d temsulta d wuẓu n yidles n ssmaḥ d umennuɣ mgal tiktiwin yetthuddun, yellan d tibeṛṛaniyin ɣef usɣan (ddin) d yidles-nneɣ’’.

Deg taggara n temlilit, fkan-d iwellihen i yerzan asmil n teɣwalt taɣellisant deg umaḍal aɛrab, aseǧhed n umedhel ger tmura tiɛrabin deg taɣult n teɣwalt, tuddsa n tɣimiwin n usileɣ i yineɣmasen yemmuzzgen deg tɣawsiwin tiɣellisanin.