Asebter amenzawi

Tamsalt n Khalifa: leḥkem ad d-yettwanṭeq ass n 23 Yunyu

LEBLIDA – Aḥkam deg temsalt n Khalifa ad d-yettwanṭaq ass n 23 Yunyu, ɣef wakken ay d-yenna ass n lḥedd deg Leblida lqaḍi n ccṛeɛ n tejrimin, Antar Menouar

Lqaḍi Menouar yenna-d, deg wass aneggaru n ccṛeɛ d akken leḥkem n temsalt n Khalifa « ad d-yettwanṭeq ass n 23 n wayyur-a sdeffir dduṛt n umciweṛ ».

Ccṛeɛ n truẓi n temsalt n Khalifa Bank yebda ass n 4 Mayu yezrin deg uxxam n ccṛeɛ n tejrimin n Leblida, 8 n yiseggasen seg wasmi ay iɛedda ccṛeɛ amezwaru deg Yennayer n 2007 deg uxxam-a n ccṛeɛ.

S ujemmal, 75 n yimetthumen ay ibedden i tikkelt tamezwarut deg ccṛeɛ-a, gar-asen 21 deg lḥebs yerna yiwen seg-sen d Abdelmoumene Khelifa, ametthum agejdan. Seg yidis niḍen, ɛeddant daɣ ugar n 300 n teɣtas d wid yeccetkan mgal yimetthumen-a.