Asebter amenzawi
Air Algerie: Yessefk ad d-yili uɛawed n tmuɣli deg usseddu n tkebbanit i ferru n wuguren-nnes
LEZZAYER – Aselway-anemhal amatu n Air Algerie, Mohamed Abdou Bouderbala, yenna-d ass n ssebt deg Lezzayer Tamaneɣt d akken yessefk ad d-yili uɛawed n tmuɣli deg ussefrek n tkebbanit-a n waffug akken ad frun wuguren-nnes yerna ad lhun yimeẓla-nnes (ssrabes).
« Ula ma takebbanit n Air Algerie tessadef-d aṭas n yidrimen, ass-a attan la tettekk ɣef yiwet n tallit deg tesɛa uguren deg wamek ay la tettwassefrak, yerna tesɛa assefrek d aqbur ay yeqqlen ur iwata ara ayen ay ḥwajen yimsaɣen-nnes », ɣef wakken ay d-yenna Mass Bouderbala deg usarag n yikataren n tkebbanit ay d-yettilin yal aseggas.
Tagnit-a d tin ay yessawḍen takebbanit-a ad tesṛuḥ imuren n ssuq, am wakken ay teqqel tugna-nnes tecmet yerna yeqqel yella ccek deg uttkal fell-as imi taɣara n yimeẓla-nnes teqqel diri-tt yerna affugen-nnes qqlen ur d-ttilin ara deg lawan, ɣef wakken ay d-yenna yimḍebber-a.
Dɣa ɣef waya, ɣef wakken d-yenna Mass Bouderbala, Air Algerie « yessefk ad tɛawed axemmem ɣef wamek ara tettɣellit yerna ad tessefrak tiɣawsiwin-nnes akken ad tgerrez amahil-nnes (axeddim) » yerna ad d-telhu d wuguren war leɛḍil.
Iswi aneggaru netta d abdad d ussefṛeḥ n yimsaɣen akken ad qqimen d tkebbanit d ussejhed n yimuren n ssuq n tkebbanit ɣef zik lḥal.
Deg wayen yerzan aqader n wakud n waffug, d yiwet seg tlufa ay iḍurren Air Algerie, aqader n wakud yewweḍ ɣer 60% deh 2014, yerna talemmast n uɛeḍḍel tɛedda i tsaɛet. Aya yusa-d ddaw n yiswi ay tɛewwel tkebbanit ad t-taweḍ, imi ay tessefra ad tettqadar akud s 70% deg wakud deg alugen agraɣlan yenna-d d akken yessefk aqader n wakud ad d-yili s 80%, ɣef wakken ay d-yenna uselway-anemhal amatu n tkebbanit. Seg yidis niḍen, 558 n waffugen (gar 61.000) ay yettwabeṭlen aseggas yezrin, ɣef wakken ay d-yenna.
Uguren-a n uqader n wakud qqnen, ladɣa, ɣef leḥsab-nnes, ɣer ussihel n diri n waffugen, aɣabi n kra n yixeddamen yetteddun deg usafag, axṣar yezgan yetteqqal-d n unagraw n uklas, asekker n yifecka, inefraḍen d uḥbas n uxeddim n yixeddamen.
S lqis alemmas, takebbanit yessefk ad tesnerni ama d assileɣ n yinehhaṛen n yisafagen, ama d assefrek n tɣawsiwin-nnes akken ad yelhu umahil-nnes, ad d-tessewjed ixeddamen deg wakud iwatan, ad tessejhed tizemmar timsenziyin i ussefṛeḥ n yimsaɣen yerna ad tqabel timsizwert tagraɣlant ay d-yusan s ljehd.
Deg wayen yerzan ixeddamen, Air Algerie ad tkemmel ad d-tessidif ixeddamen itekniyen (inehhaṛen n yisafagen, ixeddamen ara yetteddun deg yisafagen d yixeddamen n yinafagen) imi d wid ay ixuṣṣen, ma d ixeddamen n tedbelt n tkebbanit atni llan s zzyada.
« Deg wayen yerzan imukan n uxeddim deg tebdelt, assidef ad yeḥbes yerna wid ara yawin tastaɣt (lantrit) ur d-ttasen ara yixeddamen niḍen deg umkan-nsen. Nnig waya, ad nɛawed ad nefreq ixeddamen akken ad nwehhi imukan-a n tedbelt ɣer lecɣal inefɛen ugar takebbanit », ɣef wakken ay d-yenna yimḍebber ameqran n Air Algerie ay yessexdamen azal n 9000 n yixeddamen.
« Seg yidis n tedrimt, nesɛa tizemmar yelhan yerna nebɣa ad tent-nessejhed s umeẓlu ara yesɛun taɣara yelhan ugar. Ma nessaweḍ ad d-nerbeḥ imenɣi-a, Air Algerie ad tessiweḍ ad d-teqqel ɣer umkan-nnes deg umaḍal », ɣef wakken ay d-yenna.
Seg yidis niḍen, Mass Bouderbala yenna-d d akken ad d-ttwakrun 4 n yisafagen, sin seg-sen d ilemmasen, ma d sin niḍen d imeqranen, seg 22 Yunyu arma d 20 Ctembeṛ, akken ad xedmen deg ussiweḍ n medden deg tallit-a n unebdu, deg wayyur n Remḍan d tallit n lḥijj.
