Asebter amenzawi
Aneẓruf Utrim mazal la yettɛeddi fell-as lbaṭel n listiɛmaṛ ay iɛedda zzman (Sellal)
JOHANNESBURG – Aneẓruf Utrim mazal-itt la yettɛeddi fell-as « lbaṭel n ussehres (listiɛmaṛ) ay iɛedda zzman », ɣef wakken ay d-yenna ass n lḥedd deg Johannesburg uneɣlaf amenzu Abdelmalek Sellal, ay d-yernan dakken tukksa n ussehres seg wakal-a ad d-tili s uḥelles d lmejhud meɣɣren.
« Bɣiɣ, deg tgara, ad d-bedreɣ tamsalt taneggarut n tukksa n ussehres deg Tefriqt, ta d tamsalt n wakal n Uneẓruf Utrim ay d-mazal yettɛeddi fell-as lbaṭel n yiwen n ussehres ay iɛedda zzman. Ula ma tuddsa-nneɣ la tetteg lmejhud, tukksa n ussehres seg Tefriqt werɛad ur tfuk ara », ɣef wakken ay d-yenna Mass Sellal.
Aneɣlaf amenzu yenna-d aya deg wawal-nnes i lmend n urẓam n tɣimit tanumant tis 25 n tqacuct n yiɣfawen n uwanak d unabaḍ n Tdukli Tafriqit, d tin aydeg yettekka s yisem n uselway n tegduda, Abdelaziz Bouteflika.
« Ala s ussewliwel n lmejhudat-nneɣ ara nessiweḍ ad nesseɛjel akala n tukksa n ussehres seg Uneẓruf Utrim », ɣef wakken ay d-iḥettet.
Mass Sellal yerna-d dakken tagnit-a « ur tezmir ara ad tkemmel akka », yerna d taluft-a ay yessawḍen Aseqqamu n talwit d tɣellist n Tdukli Tafriqit ad teg, ass n 27 Meɣres 2015, yiwen n uskasi « ay yudfen deg umezruy yerna d amezwaru seg ṣṣenfa-a » ɣef Uneẓruf Utrim. Deg uskasi-nni, Aseqqamu-a « iɛawed iwekked-d s yisem n wakk wid yettekkan deg-s dakken Tadukli Tafriqit mazal-itt tebded ɣef waddud-nnes n uzref n uɣref n Uneẓruf Utrim akken ad tt-id-yefru ɣef uzekka-nnes, yerna iger-d tiɣri i Yiɣlanen Yeddukklen akken ad gen akk ayen umi zemren akken ad d-sɛejlen akala n tukksa n ussehres ».
Mass Sellal yeckeṛ-d Aseqqamu n talwit d tɣellist imi ay iɛawed yerra-d tudert i Useqqamu uɛjil n yiɣfawen n uwanak d unabaḍ ɣef taluft n Uneẓruf Utrim.
« Nessebɣas daɣ taselwayt n Tseqqamut n Tdukli Tafriqit, Tadukturt Dlamini-Zuma, ay iḥetteten, deg yiwet n tebṛat ay d-tga deg Meɣres n 2015, ɣef umaru amatu n Yiɣlanen Yeddukklen akken ad tettwassemɣer lewṣaya n MINURSO akken ad d-tḥaz ula d taɛessast n yizerfan n umdan », ɣef wakken ay d-yenna.
Mass Sellal yumar (yefṛeḥ), seg yidis niḍen, s lmejhud ay iga umazun udmawan n tselwayt n Tseqqamut n Tdukli Tafriqit i Uneẓruf Utrim, Joaquim Chissano, akken ad yessewliwel amɣiwan agraɣlan ɣef « ferru n temsalt-a ».
Aneẓruf Utrim d netta ay d tahrest taneggarut deg Tefriqt. Teḍḍef-it Meṛṛuk yerna teqqen-it ɣer wakal-nnes deg 1975, asmi ay ffɣen yiɣallen ispenyuliyen, yerna ass-a, tamurt-a d yiwen seg wakalen ayɣef kkaten Yiɣlanen Yeddukklen akken ad kksen seg-s assehres s uqader n yilugan d leqwanin igraɣlanen ay yerzan aya.
