Asebter amenzawi
Mass Ould Khelifa yessawel d Massa Guigou ɣef umɛawen gar yimnan n Lezzayer d Fṛansa
LEZZAYER TAMANEƔT – Aselway n Ugraw aɣerfan aɣelnaw, Mohamed Larbi Ould Khelifa, yemmuger ass n letniyen deg Lezzayer Tamaneɣt taselwayt n Tseqqamut n tɣawsiwin n uzɣar n Ugraw afṛensis, Elizabeth Guigou yerna ssawlen ɣef umɛawen gar yimnan (igrawen) n Lezzayer d Fṛansa, ɣef wakken ay d-yenna ulɣu n Ugraw.
Deg umyager-a, Mass Ould Khelifa yenna-d d akken assaɣen gar Lezzayer d Fṛansa « nnernan s waṭas » deg mraw n yiseggasen ineggura, « ladɣa seg wasmi ay mbaddalent snat-a n tmura tirza n uswir unnig ».
Deg umyager-a daɣ, aselway n Ugraw aɣerfan aɣelnaw yessukk-d tiṭ ɣef yigmaḍ yelhan ay d-yellan seg yidiwenniyen yezrin ay d-yellan d Massa Guigou d yimḍebbren ifṛensisen niḍen, am wakken ay d-yenna d akken igmaḍ-a sskanayen-d « amsefham ameqran d lebɣi ucrik i usnerni n umɛawen gar snat-a n tmura deg yinurar yemgerraden ».
« Snat-a n tmura la ttemɛawanent akken ad ssalint aswir n umbaddel-nsent deg yiwet n tegnit n wuguren idamsanen d ubeddel aserti ay la d-yettilin s tɣawla », ɣef wakken ay d-yenna Mass Ould Khelifa, am wakken ay d-yerna d akken snat-a n tmura la xeddment « akken ad ɣelltent assaɣen-nsent iwamniyen ay d-yufraren akken ad ssiwḍent ɣer nnfeɛ-nsent ucrik ».
Seg yidis niḍen, yebder-d daɣ d akken amahil (axeddim) ucrik deg ukatar n tseqqamut tawamnit tameqrant (d taseqqamut tawḥidt ay icerken amni adzayri ɣer umni n tmurt tabeṛṛanit) d yiwen seg wudmawen yesɛan azal ameqran akk deg umɛawen gar snat-a n tmura.
Lezzayer teqqel, imir-a, d taɣbalut n tɣellist (laman) d urkad deg temnaḍt-a yeččuṛen d uguren d tlufa, ɣef wakken ay d-yenna uselway n Ugraw aɣerfan aɣelnaw, am wakken ay d-yebder d akken Lezzayer tga lmejhud akken ad tesseqneɛ idisan yemxaṣamen gar-asen akken ad mciwṛen yerna ad frun tilufa-nsen ama deg Mali, ama deg Libya.
Mass Ould Khelifa yenna-d daɣ d akken aɣref afalesṭini yesɛa azref akken ad d-yessebded awanak-nnes imzireg yerna ad yesɛu Lquds d tamaneɣt-nnes. Seg tama niḍen, yenna-d d akken Lezzayer teḍḍef deg uzref n uɣref aṣeḥrawi akken ad tt-id-yefru ɣef uzekka-nnes, yerna yenna-d d akken Lezzayer ur telli ara d idis deg taluft-a ay yessefken ad tefru deg ukatar n lqanun agraɣlan. Aselway n Ugraw aɣerfan aɣelnaw yebder-d, deg tgara, dduṛ n yiwamniyen deg uzraɛ n wazalen n tlelli d teɣdemt, am wakken ay d-iger tiɣri i uḥraz n wazalen-a, ɣef wakken ay d-yebder ulɣu-a.
Seg yidis-nnes, Massa Elizabeth Guigou tenna-d d akken imazanen ifṛensisen la ttḍafaren s lqerb lmejhud ay tetteg Lezzayer i lmend n talwit d tɣellist deg temnaḍt, am wakken ay d-terna d akken tasemyuddest gar Lezzayer d Fṛansa d ayen yesɛan azal imi snat-a n tmura sɛant dduṛ d umkan d imeqranen deg temnaḍt deg wayen yerzan ferru n tlufa.
« Fṛansa tefka azal i lmejhud n Lezzayer i lmend n lebni n tifrat tamelwit, tadumant ara ifaken tilufa ay yettɛeddin ɣef temnaḍt, yerna d aya ara yeǧǧen snat-a n tmura ad selkent seg lmaḍerra ara d-yasen seg tlufa-a », ɣef wakken ay d-tenna temḍebbert-a.
Dɣa deg temsalt-a, Massa Guigou tger-d tiɣri i ubdad ɣer yidis n tmura n Ssaḥel d Uneẓruf Ameqran akken ad frunt tilufa-nsent, am wakken ay d-teckeṛ abdad ay tebded Lezzayer ɣer yidis n tmura n temnaḍt, am Tunes. Deg wayen yerzan amɛawen awamni, Massa Guigou tebder-d azal ay yettakf Ugraw aɣelnaw afṛensis i temlilit n tseqqamut tawamnit tameqrant ara d-yilin ɣef zik lḥal, am wakken ay d-tenna d akken yessefk ad yettunefk wazal i ussejhed n umbaddel awamni akken ad yeqqel d amɛawen ucrik aserti d udamsan.
