Asebter amenzawi
Hollande iwekked-d ɣef wassaɣen « ay d-yufraren » gar Lezzayer d Paris
LEZZAYER TAMANEƔT – Aselway afṛensis, François Hollande, iwekked-d, deg terzi-nnes n umahil (axeddim) ay d-iga ɣef Lezzayer ass n Letniyen, d akken assaɣen gar Lezzayer d Fṛansa d wid ay « d-yufraren ».
Akken kan ay d-yewweḍ ɣer unafag n Houari-Boumediene, aselway Hollande yenna-d d akken assaɣen gar Lezzayer d Fṛansa « ufraren-d » yerna tella tammidwa « n tidet, n tegmat » gar snat-a n tmura.
Aselway yesmekti-d d akken ta d tirzi-nnes tis snat n ṣṣenf-a sdeffir tin n 2012, yerna yenna-d d akken tillin-nnes deg Lezzayer d tagnit i « ussalqey n wassaɣen ucriken deg yinurar yemgerraden ».
Aselway afṛensis iwekked-d, seg yidis niḍen, d akken « yexdem aṭas deg wayyuren ineggura » ɣer yidis n uselway Bouteflika akken « ad yernu » umqarab gar snat-a n tmura deg yinurar yemgerraden, am wakken ay d-iḥettet ɣef wazal ay yesɛa « umahil ucrik i lmend n tmura n Yilel Agrakal ».
Deg wayen yerzan amezruy ucrik, aselway afṛensis yenna-d d akken yessefk ad d-yili ummekti, maca yessefk daɣ « ad nemmuqqel ɣer uzekka », yerna, ɣef leḥsab-nnes, azekka-a d win « n tneflit tadamsant d umqarab asdawan d udelsan ».
Aselway Hollande yenna-d d akken « assaɣ udmawan » ay yesɛa d umtil-nnes adzayri, Abdelaziz Bouteflika, d win « ara yesjehden » assaɣen gar Lezzayer d Fṛansa deg yinurar yemgerraden. Mass Hollande yerna-d d akken « assaɣ-a udmawan » d win ara yeǧǧen daɣ snat-a n tmura ad sɛunt issumar icerken deg wayen yerzan « ferru n tlufa d yiriri n talwit d tɣellist deg temnaḍt d umaḍal ».
Mass Hollande, ay yessawḍen ṛṛeḥma i yimeɣrusen n Tegrawla deg Umqam n Umeɣrus (Maqam Ccahid), yenna-d d akken izri ucrik gar snat-a n tmura « yella-d deg-s lqerḥ », d acu kan, « aṭas n tɣawsiwin ay yettwaheddnen » deg terzi-nnes tamezwarut ay d-iga deg Dujembeṛ n 2012.
Deg wayen yerzan amɛawen adamsan, aselway afṛensis yesmekti-d d akken tamurt-nnes d nettat ay d « tacrikt tamezwarut » n Lezzayer, am wakken ay yessarem d akken ticcurka-a « ad tennerni ugar ». Yenna-d, seg yidis niḍen, d akken tillin n tkebbaniyin tifṛensisin deg Lezzayer d ayen ay yettekkayen deg « tneflit n ussemres » n yixeddamen deg snat-a n tmura, am wakken ay d-yenna d akken yesɛa lebɣi akken « ad yessifses tazmert n uwliwel » n medden d tkebbaniyin gar Lezzayer d Fṛansa.
Aselway afṛensis yebder-d, seg tama niḍen, d akken « imenɣi ucrik » ay d-yettilin mgal rrebrab, am wakken ay d-yeckeṛ, deg temsalt-a, amahil ay tga Lezzayer, ladɣa deg yiriri n talwit ɣer Mali.
Mass Hollande yesnemmer daɣ anabaḍ adzayri « ay igan kullec akken ad d-yaf wid ay yenɣan Hervé Gourdel », d Afṛensis ay tenɣa yiwet n tegrawt tarebrabt deg Lezzayer deg 2014.
Uqbel ma yedda seg Lezzayer, aselway afṛensis yenna-d, deg yiwen n usarag n tɣemsa, d akken aselway Abdelaziz Bouteflika iban-as-d d amdan yessnen mliḥ timsal, am wakken ay d-yenna d akken « drus anda ara d-yemlil yiwen iɣef n uwanak yesɛan ṛṛuḥ d tezmert n umeyyez am ta ».
« Aselway Bouteflika iban-iyi-d d amdan yessnen mliḥ timsal yerna drus anda ara d-yemlil yiwen iɣef n uwanak ay yesɛan ṛṛuḥ d tezmert n umeyyez am ta », ɣef wakken ay d-yenna, am wakken ay d-yerna: « Ur d-qsideɣ ara da ayen ay yezmer ad t-yeg i Lezzayer kan, wanag qesdeɣ-d d akken ṣṣwab d umeyyez ay yesɛa nefɛen ula i ferru n tlufa deg umaḍal ».
