Asebter amenzawi

Hollande: « assaɣ-inu udmawan d Bouteflika ad yessejhed assaɣen » gar Lezzayer d Fṛansa

LEZZAYER TAMANEƔT – Aselway afṛensis François Hollande yenna-d ass n letniyen deg Lezzayer Tamaneɣt d akken « assaɣ udmawan » ay yesɛa d uselway Bouteflika ad yessejhed assaɣen gar Lezzayer d Fṛansa deg yinurar yemgerraden.

« Aya yesɛa azal d tameqran, assaɣ udmawan ay ssawḍeɣ ad t-id-geɣ d uselway Boueflika ad aɣ-yeǧǧ ad nessejhed assaɣen-nneɣ seg yidisan adamsan, adelsan d walsan », ɣef wakken ay d-yenna Mass Hollande mi ifuk adiwenni-nnes d uselway n tegduda, Abdelaziz Bouteflika.

I usmekti, aselway afṛensis iga-d tirzi n tammidwa d umahil (axeddim) ɣef Lezzayer s uneɛruḍ n uselway Bouteflika, yerna yenna-d i lmend n waya d akken assaɣ-nnes udmawan d win ara yeǧǧen snat-a n tmura ad d-ssumrent issumar d ucriken deg wayen yerzan « ferru n tlufa d yiriri n talwit d tɣellist (laman) deg temnaḍt d umaḍal ».

Ɣef leḥsab-nnes, adiwenni ay d-yewwi d uselway Bouteflika yesɛa azal yerna yella-d s ṛṛuḥ n tammidwa, am wakken ay d-yerna d akken yebder-d d umtil-nnes adzayri timsal yeqqnen ɣer « wassaɣen ucriken, ticcurka tadamsant, taneflit d umbaddel alsan ».

Ttwabedrent-d daɣ temsal n tegnit deg Libya d Ssaḥel d yimenɣi mgal rrebrab deg udiwenni-a, ɣef wakken ay d-yenna.