Asebter amenzawi
Assaɣen gar Lezzayer d Fṛansa d tid ara d-yawin lfayda
LEZZAYER TAMANEƔT – Aselway afṛensis, François Hollande, yenna-d ass n letniyen deg Lezzayer Tamaneɣt d akken assaɣen gar Lezzayer d Fṛansa « d asaɣen n tammidwa yerna d wid ara d-yeglun s lfayda ».
« Snat-a n tmura cerken-tent wassaɣen n tammidwa d laman. Assaɣen-nsent d wid ara d-yawin lfayda, ladɣa seg yidis n tdamsa », ɣef wakken ay d-yenna Mass Hollande deg yiwen n usarag n tɣemsa ay d-iga i lmend n terzi-nnes n umahil (axeddim) d tammidwa ɣef Lezzayer.
« Amyager d uselway Abdelaziz Bouteflika d netta ay d taswiɛt yesɛan azal meɣɣren akk deg terzi-a », ɣef wakken ay d-yenna Mass Hollande, am wakken ay d-yerna d akken tamsalt n ccfawa tucrikt yessawel-d fell-as yagi deg terzi-nnes n 2012.
« Nniɣ-d yagi ayen ay lliɣ bɣiɣ ad t-id-iniɣ deg terzi-nni n uwanak n 2012 deg wayen yerzan izri, anḍerri n uɣref adzayri d ussehres (listiɛmaṛ) », ɣef wakken ay d-yenna uselway afṛensis, am wakken ay d-yerna d akken « ass-a aql-aɣ nezzi udmawen-nneɣ ɣer uzekka d wayen ay nezmer ad nezmer ad t-nesnerni s lefhama d lebɣi i lmend n ussefɛel n wayen ay ttṛajun seg-neɣ yiɣerfan-nneɣ ».
Mass Hollande yerna-d d akken Lezzayer d Fṛansa sɛant tamasit n umahil (axeddim) d lebni ucrik, yerna ayen ara d-yilin gar snat-a n tmura d ayen ur d-yellin uqbel gar tmura niḍen, ɣef wakken ay d-yenna, am wakken ay d-yerna d akken « yal tirzi d umyager gar yiselwayen n snat-a n tmura yesɛa azal d ameqran ».
Dima deg temsalt-a, aselway afṛensis « yumar » (yefṛeḥ) s temlilit tanumant n Useqqamu agernabaḍ ucrik n uswir unnig (CIHN) au sselwin yineɣlafen imenza n Lezzayer d Fṛansa, yerna yenna-d d akken la yessefray ad yessemɣer amɛawen gar snat-a n tmura akken ad d-iḥaz inurar niḍen n teknussa d yidles.
Mass Hollande iḥettet-d daɣ ɣef umɛahad n snat-a n tmura akken ad ssifessent ambaddel deg yinurar yemgerraden, am wakken ay d-yenna d akken llan-d yisurifen ɣer sdat deg wayen yerzan tukci n lvizat, imi ay teqqel Fṛansa tettak-d i Yidzayriyen, deg tlemmast, 350.000 n lvizat i useggas.
Mass Hollande yesnemmer daɣ, s yisem n Fṛansa, iduba idzayriyen deg wayen yerzan astenyi n umtawa n talwit d umsuɣal aɣelnaw deg Mali. Aselway afṛensis yenna-d, seg yidis niḍen d akken yessawel d uselway n tegduda, Abdelaziz Bouteflika, ɣef tegnit deg Libya, am wakken ay d-iger tiɣri akken ad yettwassebded yiwen kan n unabaḍ deg tmurt-a.
Dɣa deg temsalt-a, yenna-d d akken Lezzayer d Fṛansa beddent ɣer yidis n Umazun uzzig n umaru amatu n Yiɣlanen Yeddukklen deg Libya, i lmend n tifrat tasertit ara yessiwḍen ɣer urkad d tɣellist deg tmurt-a.
Deg wayen yerzan axḍaf d tmenɣiwt n uɣerman afṛensis Hervé Gourdel deg Ctembeṛ yezrin deg temnaḍt n yidraren n Ǧeṛǧeṛ, gar Tubiret d Tizi Wezzu, Mass Hollande yesnemmer aselway Bouteflika d uneɣlaf amenzu, Abdelmalek Sellal, ɣef umahil (axeddim) ay gan akken ad d-afen wid ay yenɣan Gourdel.
« Iduba idzayriyen gan, seg tazwara, ccɣel-nsen akken iwata yerna bedden ɣer yidis-nneɣ deg wayen yerzan ayen ay as-yeḍran i memmi-s n tmurt-nneɣ », ɣef wakken ay d-yenna Mass Hollande.
