Asebter amenzawi

Imeḥbas isertiyen iṣeḥrawiyen bdan-d asunded n laẓ i ubdad ɣer yidis n Tekber Haddi

RRBAṬ - Imeḥbas isertiyen iṣeḥrawiyen (tagrawt n Gdeym Izik) bdan-d « asunded n laẓ i uḥezzeb » n 48 n tsaɛtin seg wass n ttlata akken ad d-sseknen tamsetlelt-nsen ɣer yidis n tɣermant taṣeḥrawit Tekber Haddi ay igan ula d nettat asunded n laẓ sdeffir ma nɣan yimhuras imeṛṛukiyen memmi-s deg Leɛyun, ɣef wakken d-tenna Tnegga n yisalan taṣeḥrawit (SPS).

Imeḥbas isertiyen iṣeḥrawiyen nnan-d, deg yiwen n ulɣu, d akken bɣan ad d-sseknen tamsetlelt-nsen ɣer yidis n Tekber Haddi ay igan asunded n laẓ war tilisa seg wass n 15 Mayu 2015 sdat tqenṣulit tameṛṛukit deg Las Palmas, akken ad tessuter ad d-yili uḥtac « uɛdil yerna d amesɣaru » deg tmenɣiwt n memmi-s, Mohamed Lamine Haidalla, yerna ad ɛeddin wid ay t-yenɣan deg ccṛeɛ.

Gren-d daɣ tiɣri i uɣref aṣeḥrawi akken ad d-tessken tamsetlelt ɣer yidis n Tekber ddaw uberriḥ n « Nekkni akk d arraw n Tekber Haddi », am wakken ay d-wten deg tuqqna ay qqnen yiduba imeṛṛukiyen tiṭ-nsen ɣef wayen ay la d-tessutur Massa Tekber Haddi.

Mohamed Lamine Haidalla, memmi-s n Massa Tekber Haddi, d netta ay d aneggaru ay yettwenɣen ɣef ufus n yiduba imeṛṛukiyen d yimhuras-nsen deg Uneẓruf Utrim yettwaḍḍfen, yerna llant-d uqbel waya tejrimin niḍen n tmenɣiwt, am tin deg yemmut Hassana Eluali, yettwenɣen deg Ctembeṛ deg lḥebs n Daxla, neɣ tin n Said Dambar, ay nɣan yimsulta imeṛṛukiyen war akuru mi yella yetteddu ɣer uxxam-nnes.