ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵙⵓⴷⴰⵏ ⵏ ⵓⵏⵥⵓⵍ: 250.000 ⵏ ⵢⵉⴳⴻⵔⴷⴰⵏ ⵉⵣⴻⵎⵔⴻⵏ ⴰⴷ ⵎⵎⵜⴻⵏ ⵙⴻⴳ ⵍⴰⵥ (ⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ)
ⵊⵓⴱⴰ – ⴰⵣⴰⵍ ⵏ 250.000 ⵏ ⵢⵉⴳⴻⵔⴷⴰⵏ « ⴰⵢ ⵉⵣⴻⵎⵔⴻⵏ ⴰⴷ ⵎⵎⵜⴻⵏ ⵙⴻⴳ ⵍⴰⵥ » ⴷⴻⴳ ⵙⵓⴷⴰⵏ ⵏ ⵓⵏⵥⵓⵍ, ⴷ ⵜⴰⵎⵓⵔⵜ ⴷⴻⴳ ⵢⴻⵏⴽⴻⵔ ⵟⵟⵔⴰⴷ ⴰⵖⴰⵔⵉⵎ ⴰⵣⴰⵍ ⵏ 18 ⵏ ⵡⴰⵢⵢⵓⵔⴻⵏ ⴰⵢⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵄⴻⵢⵢⴻⵏ ⵓⵕⴰⴱⵓⵍ ⵏ ⵜⵧⴱⵢ ⵍⴰⵏⵣⴻⵔ, ⴷ ⴰⵙⴻⵎⵢⴰⴷⴷⴰⵙ ⴰⵍⴰⵙⴰⵏ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴷⴻⴳ ⵜⵎⵓⵔⵜ-ⴰ.
« ⵢⴰⵍ 3 ⵏ ⵢⵉⴳⴻⵔⴷⴰⵏ ⴷⴻⴳ ⵜⵎⵓⵔⵜ-ⴰ, ⴰⴷ ⴷ-ⵏⴻⴽⴽⴻⵙ ⵙⴻⴳ-ⵙⴻⵏ 1 ⴰⵢ ⵢⴻⵍⵍⵓⵥⴻⵏ, ⵢⴻⵔⵏⴰ 250.000 ⵏ ⵢⵉⴳⴻⵔⴷⴰⵏ ⴰⵢ ⵉⵣⴻⵎⵔⴻⵏ ⴰⴷ ⵎⵎⵜⴻⵏ ⵙⴻⴳ ⵍⴰⵥ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵄⴻⵢⵢⴻⵏ ⵎⴰⵙⵙ ⵍⴰⵏⵣⴻⵔ.
ⴰⵙⴻⵎⵢⴰⴷⴷⴰⵙ-ⴰ ⵥⵥⵄⴻⵏ-ⵜ-ⵉⴷ ⵙⴻⴳ ⵜⵎⵓⵔⵜ-ⴰ ⵉⵎⵉ ⴰⵢ ⵉⵛⴰⵔ ⴷ ⴰⴽⴽⴻⵏ ⵙⵓⴷⴰⵏ ⵏ ⵓⵏⵥⵓⵍ ⵜⴻⵣⵎⴻⵔ « ⴰⴷ ⵜⴻⴷⵔⴻⵎ ». ⵜⴰⵎⵓⵔⵜ-ⴰ ⴷ ⵏⴻⵜⵜⴰⵜ ⴰⵢ ⴷ ⵜⴰⵏⴻⴳⴳⴰⵔⵓⵜ ⴰⴽⴽ ⴰⵢ ⴷ-ⵢⴻⵏⵏⵓⵍⴼⴰⵏ ⴷⴻⴳ ⵓⵎⴰⴹⴰⵍ ⵢⴻⵔⵏⴰ ⵜⴻⵡⵡⵉ ⴰⵣⴰⵔⵓⴳ-ⵏⵏⴻⵙ ⴷⴻⴳ ⵢⵓⵍⵢⵓ 2011.
ⴷⴻⴳ ⵓⵕⴰⴱⵓⵍ-ⴰ, ⵜⴰⵏⴰⵔⵉⵜ ⵏ ⵜⴻⵎⵙⴰⵍ ⵜⴰⵍⵙⴰⵏⵉⵏ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ (ⵧⵛⵀⴰ) ⵜⴳⴻⵔ-ⴷ ⵜⵉⵖⵔⵉ ⵉ ⵓⵚⴻⴷⴷⴻⵇ, ⵢⴻⵔⵏⴰ ⵜⴻⵏⵏⴰ-ⴷ ⴷ ⴰⴽⴽⴻⵏ ⵜⴻⵃⵡⴰⴵ 1,63 ⴷ ⴰⵎⴻⵍⵢⴰⵕ ⵏ ⵢⵉⴷⵓⵍⴰⵕⴻⵏ ⴰⴽⴽⴻⵏ ⴰⴷ ⵜⴼⴰⴽ ⴰⵙⴻⴳⴳⴰⵙ-ⴰ. ⵜⴻⵙⵎⴻⴽⵜⵉ-ⴷ ⴷⴰⵖ ⴷ ⴰⴽⴽⴻⵏ ⵙⵉⵏ ⵏ ⵢⵉⵎⵓⵔⴻⵏ ⵖⴻⴼ ⴽⵔⴰⴹ (3) ⵙⴻⴳ ⵢⵉⵎⴻⵣⴷⴰⵖⴻⵏ ⵏ ⵜⵎⵓⵔⵜ-ⴰ ⴰⵢ ⵢⴻⵃⵡⴰⴵⴻⵏ ⵍⴻⵎⵄⴰⵡⵏⴰ, ⵢⴻⵔⵏⴰ 4,6 ⵏ ⵢⵉⵎⴻⵍⵢⵓⵏⴻⵏ ⵙⴻⴳ-ⵙⴻⵏ ⵣⴻⵎⵔⴻⵏ ⴰⴷ ⴰⵡⴹⴻⵏ ⵖⴻⵔ ⵜⴻⴳⵏⵉⵜ ⴷⴻⴳ ⵓⵔ ⵙⴻⵄⵄⵓⵏ ⴰⵔⴰ ⴰⴽⴽ ⴰⵢⴻⵏ ⴰⵔⴰ ⵞⵞⴻⵏ. ⵉ ⵓⵙⵎⴻⴽⵜⵉ, ⵙⵓⴷⴰⵏ ⵏ ⵓⵏⵥⵓⵍ ⵣⴻⴷⵖⴻⵏ-ⵜⵜ 12 ⵏ ⵢⵉⵎⴻⵍⵢⵓⵏⴻⵏ ⵏ ⵎⴻⴷⴷⴻⵏ.
ⵜⴰⵍⵓⴼⵜ ⴰⵢ ⵍⴰ ⴷ-ⵢⴻⵜⵜⵉⵍⵉⵏ ⵉⵎⵉⵔ-ⴰ ⴷⴻⴳ ⵙⵓⴷⴰⵏ ⵏ ⵓⵏⵥⵓⵍ ⵜⴻⴱⴷⴰ-ⴷ ⴷⴻⴳ ⴷⵓⵊⴻⵎⴱⴻⵕ ⵏ 2013, ⵙ ⵢⵉⵎⴻⵏⵖⵉⵢⴻⵏ ⴰⵢ ⵉⵏⴻⴽⵔⴻⵏ ⴳⴰⵔ ⵢⵉⵖⴰⵍⵍⴻⵏ ⵏ ⵢⵉⴳⴻⵏ ⵏ ⵜⵎⵓⵔⵜ-ⴰ, ⵉⵎⵉ ⴽⵔⴰ ⵙⴻⴳ-ⵙⴻⵏ ⴷⴷⴰⵏ ⴷ ⵓⵙⴻⵍⵡⴰⵢ ⵙⴰⵍⵠⴰ ⴽⵉⵉⵔ, ⵎⴰ ⴷ ⵡⵉⵢⴰⴹ ⴷⴷⴰⵏ ⴷ ⵓⵏⵎⴰⵣⵓⵍ ⵏ ⵓⵙⴻⵍⵡⴰⵢ ⴰⵇⴱⵓⵔ ⵔⵉⴻⴽ ⵎⴰⵛⵀⴰⵔ.
« ⵙⴹⵉⵙ (6) ⵏ ⵡⴰⵢⵢⵓⵔⴻⵏ ⴰⵢⴰ, ⵏⵖⵉⵍ ⴷ ⴰⴽⴽⴻⵏ ⵉⵎⵉ ⵍⵇⴻⵔⵃ ⴷ ⵜⴻⴽⵔⵉⴹⵜ ⵡⵡⴹⴻⵏ ⵖⴻⵔ ⵜⵇⴰⵛⵓⵛⵜ, ⴰⵀⴰⵜ ⴰⴷ ⴷ-ⵜⴻⵇⵇⴻⵍ ⵜⴰⵍⵡⵉⵜ. ⵎⴰⵛⴰ ⵢⴻⵍⴼⴰ-ⴷ ⵢⴻⵛⵛⴻⴹ ⵍⴻⵃⵙⴰⴱ-ⵏⵏⴻⵖ », ⵖⴻⴼ ⵡⴰⴽⴽⴻⵏ ⴰⵢ ⵢⴻⵙⵃⴰⵙⵙⴻⴼ ⵜⵧⴱⵢ ⵍⴰⵏⵣⴻⵔ. « ⵜⴰⵖⴻⵔⵜ ⴷⴻⴳ ⵡⴰⴷⴷⵓⴷⴻⵏ ⵉⵙⴻⵔⵜⵉⵢⴻⵏ ⴷ ⴰⵢⴻⵏ ⴰⵢ ⵢⴻⵙⴱⴻⵄⴷⴻⵏ ⴰⴽⴽ ⴰⵙⵙⵉⵔⴻⵎ ⵏ ⵜⴰⵍⵡⵉⵜ. ⵟⵟⵔⴰⴷ ⵍⴰ ⵢⴻⵜⵜⴽⴻⵎⵎⵉⵍ ⵢⴻⵔⵏⴰ ⴰⵜⴰⵏ ⵍⴰ ⵢⴻⵜⵜⵀⵓⴷⴷⵓ ⵜⴰⴷⴰⵎⵙⴰ » ⵏ ⵜⵎⵓⵔⵜ.
ⵜⴰⴷⵓⴽⵍⵉ ⵜⴰⴼⵔⵉⵇⵉⵜ ⵜⴻⵙⵙⵓⵜⴻⵔ ⵙⴻⴳ ⵓⵙⴻⵇⵇⴰⵎⵓ ⵏ ⵜⵖⴻⵍⵍⵉⵙⵜ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴰⴷ ⴷ-ⵙⴻⵎⵎⵉⵏ ⵉⵎⴹⴻⴱⴱⵔⴻⵏ ⴰⵢ ⵍⴰ ⵢⴻⵜⵜⴽⴻⵎⵎⵉⵍⴻⵏ ⵜⴰⵍⵓⴼⵜ-ⴰ ⵢⴻⵔⵏⴰ ⴰⴷ ⵜⴻⵏ-ⵄⴰⵇⴱⴻⵏ. « ⴰⴽⴻⵎⵎⴻⵍ ⵏ ⵢⵉⵎⴻⵏⵖⵉ, ⵙ ⵜⵓⵇⵇⵏⴰ ⵏ ⵜⵉⵟⵟⴰⵡⵉⵏ ⵖⴻⴼ ⵍⵇⴻⵔⵃ ⴷⴻⴳ ⵍⵍⴰⵏ ⵢⵉⵎⴻⵣⴷⴰⵖⴻⵏ, ⴷ ⴰⵢⴻⵏ ⴰⵢ ⴷ-ⵢⴻⵙⵙⴽⴰⵏⴰⵢⴻⵏ ⴷ ⴰⴽⴽⴻⵏ ⵉⵎⴹⴻⴱⴱⵔⴻⵏ ⵏ ⵙⵓⴷⴰⵏ ⵏ ⵓⵏⵥⵓⵍ ⵓⵔ ⵜⵜⵇⴰⴷⴰⵔⴻⵏ ⴰⵔⴰ ⴰⴽⴽ ⵍⵡⴰⴵⴻⴱ ⴰⵢ ⵢⴻⵙⵙⴻⴼⴽ ⴰⴷ ⵜ-ⴳⴻⵏ ⵉ ⵓⵖⵔⴻⴼ-ⵏⵙⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⴷⵓⴽⵍⵉ ⵜⴰⴼⵔⵉⵇⵉⵜ.
