ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵙⵓⵔⵢⴰ: ⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵡⵜⴻⵏ-ⴷ ⴷⴻⴳ ⵜⵢⵉⵜⴰ ⵢⴻⴳⵍⴰⵏ ⵙ ⵡⴰⵛⵃⴰⵍ ⵏ ⵜⵎⴻⴷⴷⵓⵔⵉⵏ ⴷⴻⴳ ⵃⴰⵍⴻⴱ

ⴷⵉⵎⴻⵛⵇ – ⴰⵎⴰⵣⵓⵏ ⵓⵣⵣⵉⴳ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉ ⵙⵓⵔⵢⴰ ⵢⴻⵙⵙⴰⵥⴻⵔ ⴰⵙⵙ ⵏ ⵜⵜⵍⴰⵜⴰ ⵜⵉⵢⵉⵜⴰ-ⵏⵏⵉ ⵙ ⵍⴱⵓⵎⴱⴰⵜ ⴰⵢ ⴳⴰⵏ ⵢⵉⵖⴻⵡⵡⴰⵖⴻⵏ (ⵡⵉⴷ ⵢⴻⵍⵍⴰⵏ ⵎⴳⴰⵍ ⵓⵏⴰⴱⴰⴹ) ⵎⴳⴰⵍ ⵓⵃⵔⵉⵛ ⵏ ⵃⴰⵍⴻⴱ ⴰⵢ ⴹⴹⴼⴻⵏ ⵢⵉⵖⴰⵍⵍⴻⵏ ⵏ ⵓⵏⴰⴱⴰⴹ, ⵉⵎⵉ ⵜⵉⵢⵉⵜⴰ-ⴰ ⵜⴻⴳⵔⴰ ⵙ 34 ⵏ ⵜⵎⴻⴷⴷⵓⵔⵉⵏ.

« ⵎⴰⵙⵙ ⵙⵜⴰⴼⴼⴰⵏ ⴷⴻ ⵎⵉⵙⵜⵓⵔⴰ ⵢⴻⵙⵙⴰⵥⴻⵔ ⵙ ⵜⴻⵇⵙⴻⵃ ⵜⴰⴱⴻⵔⵔⴰⵡⵜ-ⵏⵏⵉ ⵏ ⵢⵉⵖⴰⵍⵍⴻⵏ ⵉⵎⵙⴻⵍⵍⵃⴻⵏ ⵏ ⵜⴻⵏⵎⴻⴳⵍⴰ ⵎⴳⴰⵍ ⵓⵃⵔⵉⵛ ⵏ ⵜⵎⴻⵙⴳⵉⴷⴰ ⵏ ⴰⵍ-ⵔⴰⵀⵎⴰⵏ, ⴷⴻⴳ ⵃⴰⵍⴻⴱ », ⵖⴻⴼ ⴰⴽⴽⴻⵏ ⴰⵢ ⴷ-ⵢⴻⴱⴷⴻⵔ ⵓⵍⵖⵓ-ⵏⵏⵉ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ.

ⵎⵎⵓⵜⴻⵏ, ⵎⴰ ⵓⵍⴰⵛ, 34 ⵏ ⵢⵉⵎⴷⴰⵏⴻⵏ, ⴳⴰⵔ-ⴰⵙⴻⵏ 12 ⵏ ⵢⵉⴳⴻⵔⴷⴰⵏ, ⵎⵉ ⴷ-ⵖⵍⵉⵏⵜ ⵓⴳⴰⵔ ⵏ 300 ⵏ ⵍⴱⵓⵎⴱⴰⵜ ⴰⵢ ⴷ-ⵢⴻⵜⵜⴻⵡⵜⴻⵏ ⵙⴻⴳ ⵢⵉⵃⵔⵉⵛⴻⵏ ⵏ ⵃⴰⵍⴻⴱ ⴰⵢ ⴹⴹⴼⴻⵏ ⵢⵉⵖⴻⵡⵡⴰⵖⴻⵏ ⵎⴳⴰⵍ ⵢⵉⵃⵔⵉⵛⴻⵏ ⴰⵢⴷⴻⴳ ⴹⴹⴼⴻⵏ ⵢⵉⵖⴰⵍⵍⴻⵏ ⵏ ⵓⵏⴰⴱⴰⴹ, ⵢⴻⵔⵏⴰ ⵡⴰ ⴷ ⵢⵉⵡⴻⵏ ⵙⴻⴳ ⵢⵉⵅⴻⵚⵚⴰⵔⴻⵏ ⵉⵎⴻⵇⵔⴰⵏⴻⵏ ⴰⴽⴽ ⴰⵢ ⴷ-ⵢⴻⴹⵔⴰⵏ ⴷⴻⴳ ⵜⴻⵎⵏⴰⴹⵜ-ⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵜⵜⵍⴰⵜⴰ ⵓⵙⴰⵏⴰⵢ ⴰⵙⵓⵔⵉ ⵏ ⵉⵣⴻⵔⴼⴰⵏ ⵏ ⵓⵎⴷⴰⵏ.

ⴷⴻⴳ ⵢⵉⵡⴻⵏ ⵏ ⵍⴻⵃⵙⴰⴱ ⴷ ⴰⵎⴻⵣⵡⴰⵔⵓ ⴰⵢ ⴷ-ⵢⴻⵜⵜⵡⴰⴱⴻⴷⵔⴻⵏ ⴷⴻⴳ ⵜⵍⵉⵥⵔⵉ ⵜⴰⵙⵓⵔⵉⵜ, ⵏⵏⴰⵏ-ⴷ ⴷ ⴰⴽⴽⴻⵏ 23 ⵏ ⵢⵉⵎⴷⴰⵏⴻⵏ ⴰⵢ ⵢⴻⵎⵎⵓⵜⴻⵏ ⵢⴻⵔⵏⴰ ⵊⴻⵔⵃⴻⵏ 100 ⵏⵉⴹⴻⵏ.

« ⵜⵓⵎⵎⵖⴰ-ⴰ ⵜⴰⴷⴻⵔⵖⴰⵍⵜ ⵖⴻⴼ ⵢⵉⵖⴰⵔⵉⵎⴻⵏ ⴷⴻⴳ ⵜⴻⵎⴷⵉⵏⵜ ⵏ ⵃⴰⵍⴻⴱ ⵜⴻⵍⵍⴰ-ⴷ ⴷⴻⴳ ⵡⴰⴽⵓⴷ ⴰⵢⴷⴻⴳ ⵎⴰⵙⵙ ⴷⴻ ⵎⵉⵙⵜⵓⵔⴰ ⵢⵓⵙⴰ-ⴷ ⵖⴻⵔ ⴷⵉⵎⴻⵛⵇ ⴰⴽⴽⴻⵏ ⴰⴷ ⵢⴻⵙⵙⵉⵡⴻⵍ ⵖⴻⴼ ⵜⴻⵎⵙⴰⵍⵜ ⵏ ⵓⵃⵓⴷⴷⵓ ⵏ ⵢⵉⵖⴰⵔⵉⵎⴻⵏ ⴷ ⵓⵃⴱⴰⵙ ⵏ ⵓⵙⵙⴻⵇⴷⴻⵛ ⵏ ⵜⴱⴻⵜⵜⵉⵢⵉⵏ ⵢⴻⵟⵟⴻⵔⴹⵉⵇⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⴱⴷⴻⵔ ⵓⵍⵖⵓ-ⴰ ⴰⵢ ⴷ-ⵢⴻⴼⴼⵖⴻⵏ ⴷⴻⴳ ⴳⴻⵏⴻⵠⴻ.

ⵉⵖⴰⵍⵍⴻⵏ ⵏ ⵓⵏⴰⴱⴰⴹ ⵣⴳⴰⵏ ⴽⴽⴰⵜⴻⵏ ⵉⴳⵎⴰⵏⴻⵏ ⴰⵢ ⴹⴹⴼⴻⵏ ⵢⵉⵖⴻⵡⵡⴰⵖⴻⵏ ⵙ ⵜⴱⴻⵜⵜⵉⵢⵉⵏ ⵢⴻⵟⵟⴻⵔⴹⵉⵇⴻⵏ, ⵢⴻⵔⵏⴰ ⴰⵢⴰ ⵉⵡⴻⵜ-ⴷ ⴷⴻⴳ-ⵙ ⵓⵎⵖⵉⵡⴰⵏ ⴰⴳⵔⴰⵖⵍⴰⵏ.

ⵎⴰ ⴷ ⵉⵖⴰⵍⵍⴻⵏ ⵉⵎⵙⴻⵍⵍⵃⴻⵏ ⵏ ⵜⴻⵏⵎⴻⴳⵍⴰ ⴽⴽⴰⵜⴻⵏ ⵙ ⵜⵎⴻⵥⴷⵉⵢⵉⵏ ⴷ ⵍⴻⵚⵏⴰⴼ ⵏⵉⴹⴻⵏ ⵏ ⵍⴱⵓⵎⴱⴰⵜ.

ⴰⵎⴰⵣⵓⵏ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉⵃⴻⵜⵜⴻⵜ-ⴷ ⴷ ⴰⴽⴽⴻⵏ « ⵜⵓⵎⵎⵖⴰ-ⴰ ⵜⵓⴼⴹⵉⵃⵜ ⵖⴻⴼ ⵢⵉⵖⴰⵔⵉⵎⴻⵏ ⵓⵔ ⵢⴻⵙⵙⴻⴼⴽ ⴰⵔⴰ ⴰⴷ ⴷ-ⵜⵉⵍⵉ ⴷ ⵙⵙⴻⴱⴱⴰ ⵉ ⵓⵏⴰⴱⴰⴹ ⴰⵙⵓⵔⵉ ⴰⴽⴽⴻⵏ ⴰⴷ ⴷ-ⵢⴻⵔⵔ ⵜⵜⴰⵕ ⵙ ⵓⵙⵙⴻⵇⴷⴻⵛ ⵏ ⵜⴱⴻⵜⵜⵉⵢⵉⵏ ⵢⴻⵟⵟⴻⵔⴹⵉⵇⴻⵏ », ⵢⴻⵔⵏⴰ ⵢⴻⵙⵎⴻⴽⵜⵉ-ⴷ ⴷ ⴰⴽⴽⴻⵏ « ⴰⵙⴰⴹⵓⴼ ⴰⵍⵙⴰⵏ ⴰⴳⵔⴰⵖⵍⴰⵏ ⵢⴻⵙⵙⴻⴼⴽ ⴰⴷ ⵢⴻⵜⵜⵡⴰⵇⴰⴷⴻⵔ ⴷⴻⴳ ⵢⴰⵍ ⵜⴰⴳⵏⵉⵜ ⵢⴻⵔⵏⴰ ⵡⴰⵔ ⵎⴻⵃⵢⴰⴼ ».

ⵙⴻⴳ ⵡⴰⵢⵢⵓⵔ ⵏ ⵢⵓⵍⵢⵓ 2012 ⴰⵔ ⴰⵙⵙ-ⴰ, ⵃⴰⵍⴻⴱ ⴰⵢ ⵢⴻⵍⵍⴰⵏ ⵣⵉⴽ ⴷ ⵜⴰⵎⴰⵏⴻⵖⵜ ⵜⴰⴷⴰⵎⵙⴰⵏⵜ ⵏ ⵙⵓⵔⵢⴰ, ⵜⴻⴱⴹⴰ ⵖⴻⴼ ⵙⵉⵏ ⵏ ⵢⵉⵃⵔⵉⵛⴻⵏ. ⴰⵃⵔⵉⵛ ⴰⴳⵎⵓⴹⴰⵏ (ⴰⵛⴻⵔⵇⵉ) ⴹⴹⴼⴻⵏ-ⵜ ⵢⵉⵖⴻⵡⵡⴰⵖⴻⵏ, ⵎⴰ ⴷ ⴰⵃⵔⵉⵛ ⵓⵜⵔⵉⵎ ⵢⴻⵇⵇⵉⵎ ⴳⴰⵔ ⵢⵉⴼⴰⵙⵙⴻⵏ ⵏ ⵢⵉⴷⵓⴱⴰ ⵉⵙⵓⵔⵉⵢⴻⵏ.

ⵙⵜⴰⴼⴼⴰⵏ ⴷⴻ ⵎⵉⵙⵜⵓⵔⴰ ⵢⴻⵙⵙⴰⵔⴻⵎ ⵏⴰⵇⴰⵍ, ⴰⵙⴻⴳⴳⴰⵙ ⵢⴻⵣⵔⵉⵏ, ⴰⴷ ⵢⴻⵜⵜⵡⴰⵙⴱⴻⴽ ⵢⵉⵎⴻⵏⵖⵉ ⴷⴻⴳ ⵃⴰⵍⴻⴱ, ⵎⴰⵛⴰ ⵉⵖⴻⵡⵡⴰⵖⴻⵏ ⵓⴳⵉⵏ ⴰⵙⵙⵓⵎⴻⵔ ⵏ ⵓⵎⴰⵣⵓⵏ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ, ⵢⴻⵔⵏⴰ ⴰⵏⴰⴱⴰⴹ ⴰⵙⵓⵔⵉ ⵉⴽⴻⵎⵎⴻⵍ ⵢⴻⴽⴽⴰⵜ ⵙ ⵍⴱⵓⵎⴱⴰⵜ.

ⵜⴰⵍⵓⴼⵜ ⵏ ⵙⵓⵔⵢⴰ ⵜⴻⴳⵍⴰ ⵙ 230.000 ⵏ ⵜⵎⴻⴷⴷⵓⵔⵉⵏ ⵖⴻⴼ ⵍⴻⵃⵙⴰⴱ ⵏ ⵜⵓⴷⴷⵙⵉⵡⵉⵏ ⵜⵉⵔⵏⴰⴱⴰⴹⵉⵏ, ⵢⴻⵔⵏⴰ ⴰⵣⴳⴻⵏ ⵙⴻⴳ ⵢⵉⵎⴻⵣⴷⴰⵖⴻⵏ ⵏ ⵜⵎⵓⵔⵜ-ⴰ ⴰⵢ ⵢⴻⴼⴼⵖⴻⵏ ⵙⴻⴳ ⵢⵉⵅⵅⴰⵎⴻⵏ-ⵏⵙⴻⵏ.