Asebter amenzawi
Surya: Iɣlanen Yeddukklen wten-d deg tyita yeglan s wacḥal n tmeddurin deg Ḥaleb
DIMECQ – Amazun uzzig n Yiɣlanen Yeddukklen i Surya yessaẓer ass n ttlata tiyita-nni s lbumbat ay gan yiɣewwaɣen (wid yellan mgal unabaḍ) mgal uḥric n Ḥaleb ay ḍḍfen yiɣallen n unabaḍ, imi tiyita-a tegra s 34 n tmeddurin.
« Mass Staffan de Mistura yessaẓer s teqseḥ taberrawt-nni n yiɣallen imsellḥen n tenmegla mgal uḥric n tmesgida n al-Rahman, deg Ḥaleb », ɣef akken ay d-yebder ulɣu-nni n Yiɣlanen Yeddukklen.
Mmuten, ma ulac, 34 n yimdanen, gar-asen 12 n yigerdan, mi d-ɣlint ugar n 300 n lbumbat ay d-yettewten seg yiḥricen n Ḥaleb ay ḍḍfen yiɣewwaɣen mgal yiḥricen aydeg ḍḍfen yiɣallen n unabaḍ, yerna wa d yiwen seg yixeṣṣaren imeqranen akk ay d-yeḍran deg temnaḍt-a, ɣef wakken ay d-yenna ass n ttlata Usanay asuri n izerfan n umdan.
Deg yiwen n leḥsab d amezwaru ay d-yettwabedren deg tliẓri tasurit, nnan-d d akken 23 n yimdanen ay yemmuten yerna jerḥen 100 niḍen.
« Tummɣa-a taderɣalt ɣef yiɣarimen deg temdint n Ḥaleb tella-d deg wakud aydeg Mass de Mistura yusa-d ɣer Dimecq akken ad yessiwel ɣef temsalt n uḥuddu n yiɣarimen d uḥbas n usseqdec n tbettiyin yeṭṭerḍiqen », ɣef wakken ay d-yebder ulɣu-a ay d-yeffɣen deg Geneve.
Iɣallen n unabaḍ zgan kkaten igmanen ay ḍḍfen yiɣewwaɣen s tbettiyin yeṭṭerḍiqen, yerna aya iwet-d deg-s umɣiwan agraɣlan.
Ma d iɣallen imsellḥen n tenmegla kkaten s tmeẓdiyin d leṣnaf niḍen n lbumbat.
Amazun n Yiɣlanen Yeddukklen iḥettet-d d akken « tummɣa-a tufḍiḥt ɣef yiɣarimen ur yessefk ara ad d-tili d ssebba i unabaḍ asuri akken ad d-yerr ttaṛ s usseqdec n tbettiyin yeṭṭerḍiqen », yerna yesmekti-d d akken « asaḍuf alsan agraɣlan yessefk ad yettwaqader deg yal tagnit yerna war meḥyaf ».
Seg wayyur n Yulyu 2012 ar ass-a, Ḥaleb ay yellan zik d tamaneɣt tadamsant n Surya, tebḍa ɣef sin n yiḥricen. Aḥric agmuḍan (acerqi) ḍḍfen-t yiɣewwaɣen, ma d aḥric utrim yeqqim gar yifassen n yiduba isuriyen.
Staffan de Mistura yessarem naqal, aseggas yezrin, ad yettwasbek yimenɣi deg Ḥaleb, maca iɣewwaɣen ugin assumer n umazun n Yiɣlanen Yeddukklen, yerna anabaḍ asuri ikemmel yekkat s lbumbat.
Taluft n Surya tegla s 230.000 n tmeddurin ɣef leḥsab n tuddsiwin tirnabaḍin, yerna azgen seg yimezdaɣen n tmurt-a ay yeffɣen seg yixxamen-nsen.
