Asebter amenzawi
Aselway Bouteflika yuzen tabṛat n uhenni i umenzaḍ n uɣerrabu n « Breza » ay d-yessawḍen leslaḥ i yimjahden
SOFIA – Aselway n Tegduda, Abdelaziz Bouteflika, yuzen tabṛat n uhenni, i lmend n umulli wis 100 n uqebṭan Vassil Valtchanov, amenzaḍ n uɣerrabu n « Breza » ay d-yessawḍen, s tuffra, leslaḥ i yimjahden n Yigen n uslelli aɣelnaw deg Mayu n 1960.
Tabṛat-a n uhenni teɣra-tt-id tenmahalt n Lezzayer deg Bulgaṛya, Massa Latifa Benazza, i lmend n usfugel n umulli n Mass Vassil Valtchanov ay iqeflen 100 n yiseggasen, yerna yella-d umulli-a ass n laṛebɛa deg Usrir aserdasi alemmas n Sofia.
Snat n tefṛazin tunṣibin ay yefka yagi uselway Bouteflika i uqebṭan Vassil Valtchanov. Tamezwarut deg 2004, i lmend n usmekti wis 50 n beddu n tegrawla tadzayrit, ma d tis snat deg 2013, i lmend n usmekti wis 50 n uzarug n Lezzayer.
Mass Valtchanov yura-d yiwen n udlis umi isemma « Assiweḍ uffir n leslaḥ », yeffeɣ-d deg 2011 yerna yettwassuqqel-d ama ɣer taɛṛabt, ama ɣer tefṛensist. Adlis-a yeḥka-d deg-s amek ay yella netta d memmi-s n tmurt-nnes, Luben Guenov, ssawaḍen-d leslaḥ i Yigen n uslelli aɣelnaw deg 1960 d 1961 deg yiɣerruba-nsen « Breza » d « Bulgaria ».
Ma deg udlis-nnes wis sin, ay d-yessuffeɣ deg 2015, Valtchanov yeḥka-d ugar ɣef Lezzayer d ttejṛiba-nnes taɣezfant deg tegriwa tamsenzit.
Nnig uttekki-nnes yesɛan azal deg Tegrawla tadzayrit, aqebṭan Valtchanov d yiwen seg wid ay yettekkan daɣ deg lebni n wassaɣen yelhan gar Bulgaṛya d Lezzayer, yerna d yiwen seg wid yettekkan deg ussebded, ɣer yidis n Grigor Krachmarski (d ameddakel niḍen n Lezzayer) n Tiddukla n tammidwa tadzayrit-tabulgaṛit deg Ṭuber n 1994.
Deg tgara, amulli wis 100 n Mass Valtchanov, ay d-yeɣlin deg useggas deg Lezzayer la tesfugul amulli wis 60 n tegrawla n uslelli aɣelnaw, ḥedṛen deg-s aṭas n wudmawen yettwassnen d yimḍebbren isertiyen d yiserdasiyen unnigen n Bulgaṛya yellan d imeddukal n Lezzayer, am wakken ay llan din daɣ yidiplumatiyen idzayriyen ixeddmen deg Bulgaṛya.
