Asebter amenzawi

Wehṛan: Sellal yerẓem lluzin tis snat n wuzzal deg Tosyali

WEHṚAN – Aneɣlaf amenzu, Abdelmalek Sellal yerẓem, ass n laṛebɛa tameddit, deg Beṭṭiwa (deg ugmuḍ n Wehṛam) lluzin tis snat n unfed n tkebbanit taṭerkit « Tosyali Iron and Steel", am wakken ay yessers aẓru amezwaru i lebni n lluzin tis 3 n tkebbanit-a.

Aneɣlaf amenzu yerza ɣef yiḥricen yemgerraden n lluzin-a, yerna sfehmen-as-d isurifen yemgerraden n uɣraf n wuzzal. Mass Sellal yefka daɣ lumiṛa i beddu n umahil (axeddim) n usseqɛed n unrar aydeg ara tettwabnu lluzin tis 3 n tkebbanit-a.

Seg tama niḍen, Mass Sellal iḥettet-d ɣef uɣraf n wuzzal d unfed i usseṛwu n wayen yeḥwaǧ ssuq aɣelnaw, sakkin, ad tezmer daɣ tkebbanit-a ad tesnuzuy uzzal d unfed ɣer tmura tibeṛṛaniyin. Am wakken ay d-iḥettet akken ad d-sɛejlen isenfaren niḍen n tkebbanit-a akken ad taweḍ ɣer yiswan-nnes.

Seg yidis-nnes, aselway n useqqamu n tedbelt n tkebbanit n « Tosyali », Mass Fiyat Tosyali, yeckeṛ-d anabaḍ adzayri imi ay as-yessafses ibriden akken ad yesserbeḥ assefti-nnes deg Ldzayer.

Lluzin-a tis snat d aḥric seg usenfar n ussemɣer n usuddis amguran n wuzzal d asenfar n 110 n yimelyunen n yidulaṛen, yerna lluzin-a tɣerref-d tinelwa (lexyuḍ) n tmacinin i tkebbaniyin timeẓyanin d tlemmasin, yerna afares-nnes yewweḍ ɣer 700.000 n yiṭunen i useggas.

Lluzin-a tettwabna ɣef tjumma n 25.000 n yimitren imkuẓen (m2), yerna iswi n ussefti-a netta d assenqes n waǧaw n wuzzal seg tmura n uzɣar ɣer 45%, ɣef wakken ay d-nnan yimḍebbren n usiddus n « Tosyali » ay d-yezgan deg temnaḍt tamgurant n Beṭṭiwa (40 n yikilumitren deg ugmuḍ n Wehṛan).

Lebni n lluzin-a ur yewwiḍ ara sin n yiseggasen, yerna tessexdam 350 n yixeddamen. Maca imḍebbren n usiddis-a ssaramen ad rnun amḍan n yixeddamen-nsen akken ad yaweḍ ɣer 1.350 n yixeddamen. Nnig waya, la ssefrayen ad rnun ad bnun lluzin tis kraḍt (3) ara d-ixeddmen 2,5 n yimelyunen n yiṭunen n unfed, yerna ad d-tewjed deg tgara n 2017.

Isseftiyen-a ad d-sqamen s umata azal n 1,7 d amelyun n yidulaṛen, yerna aya ad yessemɣer tazmert n ufares n usuddis n Tosyali ɣer wazal n 4 n yimelyunen n yiṭunen. S lluzin-a tis kraḍt ad tessiweḍ amḍan n yixeddamen ɣer 3.250 yerna ad tessexdem daɣ 15000 n yixeddamen s ubrid arusrid.

Lluzin tamezwarut n wuzzal d unfed n Tosyali Iron and Steel terẓem deg 2013, yerna yerza fell-as ass n 5 Yunyu uneɣlaf amenzu aṭerki yellan ass-a d aselway n tegduda n tmurt-a, Recep Tayip Erdogan ɣer yidis n uneɣlaf amenzu, Abdelmalek Sellal.

Lluzin-a tamezwarut temmuzzeg (tetxeṣṣeṣ) deg yifarisen yemgerraden n unfed yettwawehhan i temguriyin yemgerraden am lebni. Lluzin-a tɣerref-d anfed-nnes s uɛawed n usseqdec n wuzzal aqbur, am wakken ay tetteddu s trisiti. Afares n lluzin-a yeffel i umelyun n yiṭunen deg useggas.

Mass Erdogan yenna-d, asmi ay d-yerza ɣef lluzin-a, dakken d wa ay d assefti ameqran akk n Ṭṭerk deg tmura n uzɣar, yerna aya d « amedya ifazen n umɛawen adamsan gar Ldzayer d Ṭṭerk ».

Asenfar-a d aḥric seg yisseftiyen ibeṛṛaniyen ay d-yebdan deg Ctembeṛ n 2011 aydeg tikebbaniyin tibeṛṛaniyin yessefk ad d-ttekkint s 30%, ma d ayen ay d-yeqqimen ad d-ttekkint yes-s tbankiwin.

Aselway n useqqamu n tedbelt n tkebbanit n Tosyali yenna-d, deg yiwen n ulɣu i lmend n terzi n Mass Sellal ass n laṛebɛa, dakken asuddis amguran n wuzzal d unfed n Tosyali deg Ldzayer ad yeqqel, s yisseftiyen-a imeqranen, d netta ay d tagrawt tamgurant tameqrant akk deg Tefriqt deg uḥric n wuzzal d unfed, yerna yenna-d dakken isseftiyen-a llan-d i tneflit n temguri deg Ldzayer.