Asebter amenzawi
Falesṭin: aheyyi n lḥukuma tamaynut, amsefham gar Yifalesṭiniyen d uqabel n tuṭṭfa tisṛayilit
RAMALLAH –Aselway afalesṭini, Mahmoud Abbas, iwekkel ass n laṛebɛa aneɣlaf amenzu Rami Hamdallah akken ad d-yessebded aslekman amaynu, sdeffir ma yettaxer unabaḍ n tdukli taɣelnawt imi ur msefhamen ara wid yettekkan deg-s.
Anabaḍ ay d-yetteddun d win ara ixedmen i ferru n wuguren ayɣef ur msefhamen ara Yifalesṭiniyen akken ad ssiwḍen ɣer usdukkel n tsuda n uwanak (ddula) yerna ad qablen tuḍḍfa tisṛayilit.
Mass Hamdallah yefka-d tabṛat-nnes n uttixer i uselway Abbas deg yiwet n temlilit deg uxxam n tselwit deg Ramallah. Mass Abbas yeqbel attixer-a, yerna iwekkel Mass Hamdallah ad d-nessebded anabaḍ amaynu.
Sin-a n yimḍebbren msefhamen daɣ akken ad mlilen ass n letniyen deg Useqqamu aslekman n tuddsa n uslelli n Falesṭin akken ad ssiwlen ɣef wamek ara d-sbedden anabaḍ amaynu n tdukli taɣelnawt.
Mass Hamdallah yessefk ad d-yebdu amciweṛ war leɛḍil d wakk imussa ifalesṭiniyen, gar-asen ula d Ḥamas, ɣef wakken ay d-yenna Nimr Hamad, aneṣṣaḥ aserti n uselway Abbas.
Attixer n unabaḍ-a tella-d imi « ur yessaweḍ ara ad yexdem ccɣel-nnes s yisem-nnes d anabaḍ n tdukli ». Anabaḍ-a sbedden-t-id deg 2014 akken ad ifak acḥal n yiseggasen n beḍḍu gar snat n tegrawin timeqranin n Falesṭin, Fataḥ n Mass Abbas d umussu n uzbu n Ḥamas.
Yessefk ad d-yettwassebded unabaḍ aserti
Ma d Ḥamas, ay iḥekmen tasfift n Ɣezza, tugi ad yettwafsex unabaḍ-a atiknuqraṭi n tdukli taɣelnawt « seg yiwen kan n yidis », yerna tger-d tiɣri i uselway Abbas akken ad d-yerr deg umkan n unabaḍ-a, anabaḍ amaynu ara yilin d aserti ugar.
Yessefk ad d-yettwassebded unabaḍ « deg ara ttekkin akk yimussa iɣelnawen d yislamanen akken ad nqabel tuḍḍfa tisṛayilit », ɣef wakken ay d-yenna yimḍebber unnig n Ḥamas, Ziad al-Zaza, am wakken ay d-yenna d akken Ḥamas tewjed i waya.
Ma d yiwen n yimḍebber n Tuddsa n Uslelli n Falesṭin yenna-d d akken lemcawṛat tigensiyin (n daxel) gar Yifalesṭiniyen sseknent-d d akken yessefk ad d-yili unabaḍ am wa.
« Cikkeɣ aql-aɣ la netteddu akken ad d-neg anabaḍ n yiergazen isertiyen, maci d anabaḍ n yitiknuqraṭiyen », ɣef wakken ay d-yenna.
Aḥbas n yimenɣi ara iɣzifen deg tesfift n Ɣezza?
Amussu n Ḥamas d yiduba n tuḍḍfa tisṛayilit gan inermisen d irusriden akken « ad mbaddalen tikta » ɣef yiwen n uḥbas n yimenɣi ɣezzifen deg tesfift n Ɣezza, ɣef leḥsab n kra n teɣbula n Ḥamas.
Inermisen-a llan-d s kra n yibdammasen aɛṛaben d wuṛufiyen akken ad sǧehden aḥbas n yimenɣi ay d-yellan deg Ɣuct yezrin sdeffir tummɣa-nni n yiserdasen isṛayiliyen ɣef tesfift n Ɣezza ay yeḍḍfen 50 n wussan. Azal n 2.200 n Yifalesṭiniyen, amur ameqran deg-sen d iɣarimen, ay yemmuten deg tummɣa-nni ɣef leḥsab n Yiɣlanen Yeddukklen.
Aḥbas-a n yimenɣi n useggas yezrin yella-d s tebdammast tamaṣrit yerna yebda-d ass n 26 Ɣuct. Deg lemcawṛat ay yessawḍen ɣer uḥbas-nni, ssefran ad ɛawden ad qqlen ɣer wawal akken ad msefhamen ɣef uḥbas n yimenɣi ara idumen ugar yerna ad frun timsal tigejdanin ay yeqqimen ɛellqent. Maca ur d-llint ara lemcawṛat-nni.
« Aql-aɣ newjed akken ad neg amtawa. Ḥamas tebɣa ad tefru uguren n Ɣezza », ɣef wakken ay d-wekkden. D acu kan, amciweṛ i ussebded n teɣlamt i unabaḍ amaynu werɛad ur d-yebdi ara s tidet.
« Nemmuger aṭas n yimazunen, maca yella-d kan yid-sen udiwenni unṣib yerna nessawel kan ɣef tekta tirusridin d teɣwalt », ɣef wakken ay d-terna yiwet n teɣbalut n Ḥamas, am wakken ay d-txebber d akken ttekkan deg waya yimḍebbren n Yiɣlanen Yeddukklen d yimaslaḍen n Umni uṛufi ay la yetturaren n dduṛ n tebdammast gar umussu afalesṭini n Ḥamas d yiduba n tuḍḍfa tisṛayilit.
Dima deg temsalt-a, kra n yimḍebbren unnigen n Ḥamas mlalen daɣ, deg Dduḥa, kra n yimḍebbren iqaṭariyen.
Adiwenni-nsen yella-d ɣef umtawa ara yeḍḍfen gar 5 d 10 n yiseggasen d ccerḍ n Ḥamas akken ad tettwakkes tergult tisṛayilit ɣef tesfift n Ɣezza, am wakken ara ttwareẓmen yibriden n lebḥeṛ gar Ɣezza d umaḍal.
Sɣur Ramdane TAMANI
