Asebter amenzawi
Taluft n Yaman: akemmel n lemcawṛat deg Geneve i ferru aneggaru
GENEVE – Lemcawṛat gar yidisan yemxaṣamen deg Yaman kemmlent ass n laṛebɛa deg Geneve deg wass-nsent wis 3 ddaw leɛnaya n Yiɣlanen Yeddukklen ay iɛerrḍen akken ad tesseqneɛ idisan-a ad ḥebsen imenɣi, d acu kan, lemcawṛat-a llant-d deg tegnit n cceḥna d lqella n umsefham.
Tamagla n unabaḍ temlal, ass n laṛebɛa taṣebḥit, d yiwet n tegrawt n 16 n yidiplumatiyen n tmura tinezmarin timeqranin, n Tdukli Tuṛufit d Useqqamu n Umɛawen n Lxaliǧ ay la yettḍafaren lemcawṛat-a.
Naqal, igensasen iḥutiyen ugin ad ttekkin deg lemcawṛat-a d yigensasen n unabaḍ ayamani imennejli, maca, deg tgara, qeblen ad ttekkin ass n ttlata deg lemcawṛat-a ay la d-yettilin deg Geneve akken ad nadin ula d nitni ɣef tifrat i taluft-a ay yeglan s tmeyyatin n tmeddurin, n yimejraḥ d yizruzaɣ.
Seg wasmi ay d-yebda Usarag n Geneve, ur d-yelli wara wayen izaden
« Taɣawsa yelhan tawḥidt ay d-yellan nettat d akemmel n lemcawṛat yerna, taswiɛt-a, ula d yiwen n yidis ur yejbid iman-nnes seg-sent », ɣef wakken ay d-yenna yiwen n udiplumati utrim (aɣerbi) ay la yettḍafaren lemcawṛat-a.
Seg wakken mbaɛadent tmuɣliwin n yidisan-a gar-asent armi ula d Iɣlanen Yeddukklen ur la ssefrayen ara ad ɛawden ad ten-id-ssemlilen, wanag ssefrayen kan ad mciwṛen d yal idis i yiman-nnes s ubrid n tebdammast gar sin-a n yidisan.
Aḥbas n yimenɣi i uɛawen n medden deg Remḍan
Amazun uzzig n Yiɣlanen Yeddukklen i Yaman, Ismail Ould Cheikh Ahmed, iger-d tamawt d akken adduden n sin-a n yidisan ur yezmir ad d-yili ussemqarab gar-asen, dɣa ɣef waya ay iwala d akken terra tmara ad yemciweṛ yid-sen akken ad ten-yesseqneɛ ad ḥebsen imenɣi i tallit n 15 n wussan, ladɣa imi Remḍan yebda-d ass n lexmis, seg leɛḍil ad yeḥbes yimenɣi i lebda.
Idisan yemxaṣamen msefhamen daɣ ass n ttlata d akken yessefk ad d-yili uḥbas n yimenɣi, maca ur msefhamen ara ɣef ttfaṣil-nsen. Ghaleb al-Moutlak, n umussu abdaẓri n Herak, iwala d akken aḥbas n yimenɣi ay d-yettwassumren yezmer ad yeḍḍef ayyur, yerna deg tallit-a, isafagen n temsisit ay tenheṛ Tgelda Tasaɛudit ad ḥebsen tiytiwin-nsen mgal timlicin timsellḥin tiḥutiyin d yiɣallen imsellḥen yeqqimen bedden ɣer yidis n uselway aqbur Ali Abdallah Saleh.
Ula d amaru amatu n Yiɣlanen Yeddukklen Ban Ki-moon iger-d tiɣri ass n letniyen i « uḥbas n yimenɣi n snat n ledwaṛ i lmend n wayyur n Remḍan ».
Anadi ɣef tifrat tasertit
Imi idisan yemxaṣamen ugin ad ssemqaraben adduden-nsen, amciweṛ n Geneve yelfa-d yewɛeṛ. Ɣef waya, a win yufan ixṣimen ad msefhamen meqqar « ɣef uḥbas n yimenɣi snat n ledwaṛ, yerna ad jebden yiɣewwaɣen iḥutiyen iman-nsen seg kra n temdinin am wakken ara ḥebsent tyitiwin tigenwanin », ɣef wakken ay d-nnan kra n yimanayen.
Maca deg tegnit-a deg iɣewwaɣen bedden ɣef tmuɣli-nsen ay ugin ad tbeddel, anabaḍ imennejli yeggez ad yejbed iman-nnes seg lemcawṛat ma yella ur d-yelli ara akk kra n umtawa seg-a ar ass n ljemɛa.
Anabaḍ ayyes yesteɛṛef umɣiwan agraɣlan yenna-d yagi d akken ur iqebbel ara ad yemciweṛ d yiɣewwaɣen ala ma tettwassefɛel tneɣtust 2216 n Useqqamu n tɣellist n Yiɣlanen Yeddukklen ay d-icerḍen ad jebden yiɣewwaɣen iman-nsen seg temnaḍin ay ḍḍfen aseggas yezrin, maca Iḥutiyen walan aya d « aɛekkur » deg ubrid n ferru n tidet n taluft-a ay iḥuzan tamurt.
Ma d Iwanaken Yeddukklen nnan-d d akken tifrat tasertit deg Yaman d nettat ay « d abrid awḥid i ferru n taluft », am wakken ay d-gren tiɣri akken ad d-yeqqel « ukala n ubeddel aserti deg Yaman ».
Seg yidis-nnes, amazun n Yiɣlanen Yeddukklen yenna-d d akken imi kan ay ssawḍen ad d-ssemlilen idisan-a yemxaṣamen deg temdint n Geneve d taɣawsa igerrzen.
Tagnit deg unrar tewweḍ ɣer « uxeṣṣar »
Amyager n Geneve yella-d deg wakud deg tiyitiwin tigenwanin n temsisit taɛṛabt ur ssawḍent ara ad ḥebsent tiddit n
yiɣewwaɣen iciɛiyen n Anṣarullah ɣer sdat, yerna ineggura-a ḍḍfen tamaneɣt Ṣenɛa, am wakken ay ḍḍfen amur ameqran
seg Ɛaden, tamdint tis snat n tmurt d yiḥricen imeqranen seg waṭas n tnebḍiyin n tmurt, ladɣa imi lǧehd-nsen yennerna s
uɛawen n yiserdasen yeqqimen bedden ɣer yidis n uselway aqbur Ali Abdallah Saleh.
Deg unrar, yella daɣ « uzbu aɣerfan » deg ttekkan yiserdasen d leɛṛac, d yikabaren neɣ iɣarimen ay la yettnaɣen mgal yiḥutiyen, ma d imenɣi deg Ɛaden, Taɛez d temnaḍin niḍen rnan deg teqseḥ, yerna tagnit-a ala d « Lqaɛida d tegrawt n Uwanak Islaman ay d-yesfaydin seg-s ».
Aseqqamu agraɣlan n Umidag Azewwaɣ yenna-d d akken tagnit talsan n tmurt-a tigellilt tewweḍ ɣer « uxeṣṣar ».
« D timerwin n medden ay la yettmettaten yal ass. Isbiṭaren qqlen ur d-ttkafin ara i uqabel n wanect ay la d-yettawḍen d imejraḥ », ɣef wakken ay d-yenna yiɣef n temhal n Ugmuḍ Alemmas n Useqqamu Agraɣlan n Umidag Azewwaɣ, Robert Mardini.
Ɣef leḥsab n yiwen n leḥsab n UNICEF, 279 n yigerdan ay yettwenɣen, ttwajerḥen 402 deg 10 n ledwaṛ tineggura, yerna amḍan-a yerna s 4 n tikkal ɣef leḥsab n useggas n 2014. Ugar n 9 n yimelyunen n yigerdan ay yeḥwaǧen lemɛawna seg gar 26 n yimelyunen n yimezdaɣen ay tesɛa tmurt-a.
Sɣur Narimane BELHACENE
