ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⵎⵜⴰⵡⴰ ⵏ ⵜⴼⴻⵍⵍⴰⵃⵜ ⴳⴰⵔ ⵜⴷⵓⴽⵍⵉ ⵜⵓⵕⵓⴼⵉⵜ ⴷ ⵎⴻⵕⵕⵓⴽ: ⵛⵛⵕⴻⵄ ⵏ ⵜⴷⵓⴽⵍⵉ ⵜⵓⵕⵓⴼⵉⵜ ⴰⴷ ⴷ-ⵢⴻⵏⵟⴻⵇ ⵍⴻⵃⴽⴻⵎ-ⵏⵏⴻⵙ ⵖⴻⴼ ⵓⵛⵛⴻⵜⴽⵉ ⵏ ⵢⵉⵚⴻⵃⵔⴰⵡⵉⵢⴻⵏ « ⵙⴻⴳ-ⴰ ⵖⴻⴼ ⴽⵔⴰ ⵏ ⵡⴰⵢⵢⵓⵔⴻⵏ »
ⴱⵉⵔ ⵍⴻⵃⵍⵓ - ⵛⵛⵕⴻⵄ ⵏ ⵜⴷⵓⴽⵍⵉ ⵜⵓⵕⵓⴼⵉⵜ ⵢⴻⵙⵙⵓⴽⴽ-ⴷ ⵜⵉⵟ, ⴰⵙⵙ ⵏ ⵜⵜⵍⴰⵜⴰ, ⵖⴻⴼ ⵓⵛⵛⴻⵜⴽⵉ ⴰⵢ ⴷ-ⵜⴳⴰ ⵜⴻⵔⵏⵉ ⵏ ⵒⵧⵍⵉⵙⴰⵔⵉⵧ ⵖⴻⴼ ⵓⵎⵜⴰⵡⴰ ⵏ ⵜⴼⴻⵍⵍⴰⵃⵜ ⴰⵢ ⴷ-ⵢⴻⵍⵍⴰⵏ ⴷⴻⴳ ⵓⵙⴻⴳⴳⴰⵙ ⵏ 2000 ⴳⴰⵔ ⵜⴷⵓⴽⵍⵉ ⵜⵓⵕⵓⴼⵉⵜ ⴷ ⵎⴻⵕⵕⵓⴽ, ⵢⴻⵔⵏⴰ ⵍⴻⵃⴽⴻⵎ ⵖⴻⴼ ⵜⴻⵎⵙⴰⵍⵜ-ⴰ ⴰⴷ ⴷ-ⵢⴻⴼⴼⴻⵖ ⵙⴻⴳ-ⴰ ⵖⴻⴼ ⴽⵔⴰ ⵏ ⵡⴰⵢⵢⵓⵔⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵢⵉⵡⴻⵏ ⵏ ⵓⵍⵖⵓ ⵏ ⵓⵖⵍⵉⴼ ⴰⵚⴻⵃⵔⴰⵡⵉ ⵏ ⵓⵙⵙⴻⵍⵖⵓ, ⴰⵢ ⴷ-ⵢⴻⵡⵡⴹⴻⵏ ⴰⵙⵙ ⵏ ⵍⴰⵕⴻⴱⵄⴰ ⵖⴻⵔ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ.
ⵖⴻⴼ ⵍⴻⵃⵙⴰⴱ ⵏ ⵓⵍⵖⵓ-ⵏⵏⵉ, « ⵢⴻⵍⵍⴰ-ⴷ ⵓⵙⴽⴰⵙⵉ ⵉⴵⴻⵀⴷⴻⵏ ⴷⴻⴳ ⵜⵖⵉⵎⵉⵜ-ⵏⵏⵉ ⴰⵢ ⵢⴻⴹⴹⴼⴻⵏ 9 ⵏ ⵜⵙⴰⵄⵜⵉⵏ. ⵙⴰⴽⴽⵉⵏ, ⵙⵄⴻⴷⴷⴰⵏ ⵜⴰⵎⵙⴰⵍⵜ-ⴰ ⵖⴻⵔ ⵓⵎⵛⵉⵡⴻⵕ ⵢⴻⵔⵏⴰ ⵍⴻⵃⴽⴻⵎ ⴰⴷ ⴷ-ⵢⴻⴼⴼⴻⵖ ⵙⴻⴳ-ⴰ ⵖⴻⴼ ⴽⵔⴰ ⵏ ⵡⴰⵢⵢⵓⵔⴻⵏ ».
ⴷⴻⴳ ⵓⵙⴻⴳⴳⴰⵙ ⵏ 2000, ⵜⴰⴷⵓⴽⵍⵉ ⵜⵓⵕⵓⴼⵉⵜ ⵜⴳⴰ ⴰⵎⵜⴰⵡⴰ ⵏ ⵜⵉⴷⴷⵓⴽⵍⴰ ⴷ ⵎⴻⵕⵕⵓⴽ ⵉ ⵓⵙⵏⴻⵔⵏⵉ ⵏ ⵓⵎⴱⴰⴷⴷⴻⵍ ⴷⴻⴳ ⵜⴼⴻⵍⵍⴰⵃⵜ ⴷ ⵜⵎⵓⵔⴰ ⵏ ⵜⴷⵓⴽⵍⵉ ⵜⵓⵕⵓⴼⵉⵜ. ⴰⵎⴰⴳⵔⴰⴷ ⵡⵉⵙ 2 ⵏ ⵓⵎⵜⴰⵡⴰ-ⴰ ⵢⴻⵏⵏⴰ-ⴷ ⴷ ⴰⴽⴽⴻⵏ ⴰⵎⵜⴰⵡⴰ-ⴰ ⵢⴻⵙⵙⴻⴼⴽ ⴰⴷ ⵉⵇⴰⴷⴻⵔ ⵉⵣⴻⵔⴼⴰⵏ ⵏ ⵓⵎⴷⴰⵏ ⴷ ⵓⵔⴽⴰⵡⴰⵍ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ.
« ⴷ ⴰⵛⵓ ⴽⴰⵏ, ⴰⵎⵜⴰⵡⴰ-ⴰ ⵢⴻⵜⵜⵡⴰⵙⵙⴻⴼⵄⴻⵍ ⵡⴰⵔ ⵎⴰ ⵜⵜⵡⴰⵇⴰⴷⵔⴻⵏ ⵢⵉⵣⴻⵔⴼⴰⵏ ⵏ ⵓⵎⴷⴰⵏ ⴰⵢ ⴷ-ⵢⴻⴱⴷⴻⵔ: ⵎⴻⵕⵕⵓⴽ ⵜⴻⴱⵏⴰ-ⴷ ⵜⴰⴼⴻⵍⵍⴰⵃⵜ ⵏ ⵓⵙⵙⵉⴵⴻⵡ ⵖⴻⵔ ⵜⵎⵓⵔⴰ ⵜⵉⴱⴻⵕⵕⴰⵏⵉⵢⵉⵏ, ⴷ ⵜⴰⴼⴻⵍⵍⴰⵃⵜ ⵉⵜⵜⴻⴽⵍⴻⵏ ⵖⴻⴼ ⵢⵉⴷⵔⵉⵎⴻⵏ ⵓⵕⵓⴼⵉⵢⴻⵏ ⴷ ⵢⵉⵎⴻⵕⵕⵓⴽⵉⵢⴻⵏ, ⵢⴻⵔⵏⴰ ⴰⵙⵙⵉⴵⴻⵡ ⴰⵎⴻⵇⵔⴰⵏ ⵏ ⵙⵙⴻⵍⵄⴰ ⵢⴻⵍⵍⴰ-ⴷ ⵎⴳⴰⵍ ⵏⵏⴼⴻⵄ ⵏ ⵢⵉⵎⴻⵣⴷⴰⵖⴻⵏ ⵉⵚⴻⵃⵔⴰⵡⵉⵢⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⴻⵖⴱⴰⵍⵓⵜ-ⴰ.
« ⵉⵙⵡⵉ ⵏ ⵚⵚⴻⵏⴼ-ⴰ ⵏ ⵜⴼⴻⵍⵍⴰⵃⵜ ⵏⴻⵜⵜⴰ ⴷ ⴰⵙⵙⵉⴷⴻⴼ ⵏ ⵡⵓⴳⴰⵔ ⵏ ⵢⵉⴷⵔⵉⵎⴻⵏ ⵉ ⵜⴽⴻⴱⴱⴰⵏⵉⵢⵉⵏ ⵜⵓⵕⵓⴼⵉⵢⵉⵏ ⴷ ⵓⵙⵙⴻⴵⵀⴻⴷ ⵏ ⵜⵓⴹⴹⴼⴰ ⵜⴰⵎⴻⵕⵕⵓⴽⵉⵜ (ⴷⴻⴳ ⵓⵏⴻⵥⵔⵓⴼ ⵓⵜⵔⵉⵎ) ⵙ ⵓⵍⵇⴰⴹ ⵏ ⵍⴻⵖⵔⴰⵎⴰ ⴷ ⵓⵙⵙⴻⵇⴷⴻⵛ ⵏ ⵢⵉⵅⴻⴷⴷⴰⵎⴻⵏ ⵉⵎⴻⵕⵕⵓⴽⵉⵢⴻⵏ. ⵉⵙⵡⵉ ⵏ ⵜⵉⴷⴻⵜ ⵏⴻⵜⵜⴰ ⴷ ⴱⴻⵏⵏⵓ ⵏ ⵜⴷⴰⵎⵙⴰ ⵢⴻⴼⴼⵖⴻⵏ ⵉ ⵓⴱⵔⵉⴷ, ⴷ ⵜⵉⵏ ⴰⵔⴰ ⵢⴻⴵⴵⴻⵏ ⵜⵓⴹⴹⴼⴰ ⵜⴰⵙⴻⵔⴷⴰⵙⵉⵜ ⵜⴰⵎⴻⵕⵕⵓⴽⵉⵜ ⴰⴷ ⵜⴽⴻⵎⵎⴻⵍ ⴷⴻⴳ ⵓⵏⴻⵥⵔⵓⴼ ⵓⵜⵔⵉⵎ ⵙ ⵢⵉⵡⴻⵏ ⵏ ⵡⵓⵔⴰⵔ ⵏ ⵓⵙⵙⴻⵀⵔⴻⵙ (ⴰⵙⵜⴻⵄⵎⴻⵕ) ⴰⴷⴰⵎⵙⴰⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵙⵙⴻⴼⵀⴻⵎ ⵓⵏⴻⵖⵍⴰⴼ ⴰⵚⴻⵃⵔⴰⵡⵉ ⵏ ⵓⵙⵙⴻⵍⵖⵓ.
ⵙ ⵡⴰⵢⴰ, ⵜⵉⵔⵏⵉ ⵏ ⵒⵧⵍⵉⵙⴰⵔⵉⵧ, ⴰⵢ ⵢⴻⵛⵛⴻⵜⴽⴰⵏ ⵉ ⵛⵛⵕⴻⵄ ⵏ ⵜⵓⵕⵓⴼⵜ « ⵢⴻⴼⴽⴰ ⴰⵣⵔⴻⴼ ⵉ ⵢⵉⵎⴰⵏ-ⵏⵏⴻⵙ ⴰⴽⴽⴻⵏ ⴰⴷ ⴷ-ⵢⴻⴳ ⵛⵛⵕⴻⵄ-ⴰ, ⵢⴻⵔⵏⴰ ⴰⵢⴰ ⵢⴻⵜⵜⴻⴽⴽⴰ ⴷⴻⴳ ⵜⵉⴽⵍⵉ-ⵏⵏⴻⵙ ⵜⴰⵎⴰⵜⵓⵜ ⴷⴻⴳ ⴰⵔⴰ ⵢⴻⴷⴷⵓⴽⴽⴻⵍ ⵛⵛⵖⴻⵍ ⴰⵙⴻⵔⵜⵉ, ⴰⴷⵉⵒⵍⵓⵎⴰⵜⵉ ⴷ ⵓⴷⴰⴼⴻⵄ ⵖⴻⴼ ⵢⵉⵣⴻⵔⴼⴰⵏ-ⵏⵏⴻⵙ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⴹⵔⵉⵙ-ⴰ.
« ⴷ ⴰⵛⵓ ⴽⴰⵏ, (ⵜⵉⵔⵏⵉ ⵏ ⵒⵧⵍⵉⵙⴰⵔⵉⵧ) ⵜⴻⵙⵃⴰⵙⵙⴻⴼ ⵉⵎⵉ ⴰⵙⵙⵓⵜⴻⵔ-ⵏⵏⴻⵙ ⵉ ⵓⵎⵛⵉⵡⴻⵕ ⵓⵙⵔⵉⴷ ⴷ ⵓⵙⴻⵇⵇⴰⵎⵓ ⵓⵕⵓⴼⵉ ⴷ ⵜⵙⴻⵇⵇⴰⵎⵓⵜ ⵜⵓⵕⵓⴼⵉⵜ ⵓⵔ ⵢⴻⵜⵜⵡⴰⵇⴱⴻⵍ ⴰⵔⴰ ⴰⵔ ⴰⵙⵙ-ⴰ, ⵢⴻⵔⵏⴰ ⵜⵡⴻⴽⴽⴻⴷ-ⴷ ⴷ ⴰⴽⴽⴻⵏ ⵜⴻⵡⵊⴻⴷ ⴰⴽⴽⴻⵏ ⴰⴷ ⵜⴻⵎⵛⵉⵡⴻⵕ ⵙⴻⴳ ⵡⵓⵍ ⵢⴻⵚⴼⴰⵏ ⴷ ⵜⵙⵓⴷⴰ ⵜⵓⵕⵓⴼⵉⵢⵉⵏ. ⵎⴰⵛⴰ, ⵙⴽⵓⴷ ⵓⵍⴰⵛ ⵍⴻⵎⵛⴰⵡⵕⴰⵜ ⴰⵎ ⵜⵉ, ⴷ ⵜⴰⵖⴷⴻⵎⵜ ⴰⵔⴰ ⵜⵜ-ⵉⴷ-ⵢⴻⴼⵔⵓⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵖⵍⵉⴼ.
ⵜⵉⵔⵏⵉ ⵏ ⵒⵧⵍⵉⵙⴰⵔⵉⵧ « ⵜⴻⴱⵏⴰ ⴰⴽⴽ ⵍⴻⵛⵖⴰⵍ-ⵏⵏⴻⵙ ⵖⴻⴼ ⵍⵇⴰⵏⵓⵏ ⴰⴳⵔⴰⵖⵍⴰⵏ. ⴷ ⵡⵉⴷ ⴰⵢ ⵉⴱⴻⴷⴷⴻⵏ ⴷⴻⴳ ⵡⵓⴷⴻⵎ ⵏ ⵍⵇⴰⵏⵓⵏ ⴰⴳⵔⴰⵖⵍⴰⵏ ⵙⴻⴳ 1975 ⴰⵔⴰ ⵉⵅⴻⵚⵔⴻⵏ ⵉⵎⴻⵏⵖⵉ ⴰⵙⵙ-ⴰ ⵏⴻⵖ ⴰⵣⴻⴽⴽⴰ. ⴰⵙⵙⴻⵀⵔⴻⵙ ⵜⵄⴻⴷⴷⴰ ⵜⴰⵍⵍⵉⵜ-ⵏⵏⴻⵙ ⵢⴻⵔⵏⴰ ⵢⴻⵙⵙⴻⴼⴽ ⴰⴷ ⴷ-ⵜⵉⵍⵉ ⵜⵙⴻⴼⵔⴰⵏⵜ ⵉ ⵓⴳⴳⵓⵛⵛⴻⵍⵎⴰⵏ ⵖⴻⴼ ⵣⵉⴽ ⵍⵃⴰⵍ », ⵖⴻⴼ ⵡⴰⴽⴽⴻⵏ ⴰⵢ ⵜⵜ-ⵉⴷ-ⵢⴻⵅⵜⴻⵎ ⵓⵍⵖⵓ-ⴰ.
