ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵍⴻⵣⵣⴰⵢⴻⵔ ⵜⴻⴼⵕⴻⵃ ⵉⵎⵉ ⴰⵢ ⴷ-ⴱⵔⴰⵏ ⵉ 3 ⵙⴻⴳ ⵢⵉⵅⴻⴷⴷⴰⵎⴻⵏ ⵏ ⵜⵇⴻⵏⵚⵓⵍⵉⵜ ⵏ ⵜⵓⵏⴻⵙ ⴷⴻⴳ ⵍⵉⴱⵢⴰ
ⵍⴻⵣⵣⴰⵢⴻⵔ –ⴰⵏⴻⵟⵟⴰⵇ ⵏ ⵓⵖⵍⵉⴼ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ, ⴰⴱⴷⴻⵍⴰⵣⵉⵣ ⴱⴻⵏⴰⵍⵉ ⵛⵀⴻⵔⵉⴼ, ⵢⴻⵏⵏⴰ-ⴷ ⴷ ⴰⴽⴽⴻⵏ ⵢⵓⵎⴰⵔ (ⵢⴻⴼⵕⴻⵃ) ⴰⵙⵙ ⵏ ⵍⴻⵅⵎⵉⵙ ⵉⵎⵉ ⴰⵢ ⴷ-ⴱⵔⴰⵏ ⵉ 3 ⵙⴻⴳ ⵢⵉⵏⴰⵡⴰⵔⴻⵏ ⵏ ⵜⵇⴻⵏⵚⵓⵍⵉⵜ ⵜⴰⵎⴰⵜⵓⵜ ⵏ ⵜⵓⵏⴻⵙ ⴷⴻⴳ ⵍⵉⴱⵢⴰ, ⵢⴻⵔⵏⴰ ⵢⴻⵙⵙⴰⵔⴰⵎ ⴰⴷ ⵔⵏⵓⵏ ⴰⴷ ⴷ-ⴱⵔⵓⵏ ⵉ ⵢⵉⵎⴰⵙⵍⴰⴹⴻⵏ ⵏⵉⴹⴻⵏ ⵏ ⵜⴼⴻⴽⴽⴰ ⵜⴰⴷⵉⵒⵍⵓⵎⴰⵜⵉⵜ ⵜⴰⵜⵓⵏⵙⵉⵜ ⴰⵢ ⵢⴻⵜⵜⵡⴰⴽⵙⴻⵏ ⵓⵙⵙⴰⵏ-ⴰ ⴰⵢ ⵢⴻⵣⵔⵉⵏ.
ⴷⴻⴳ ⵢⵉⵡⴻⵜ ⵏ ⵜⵙⴻⵖⵔⵓⵜ ⴰⵢ ⴷ-ⵉⴳⴰ ⵉ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ ⵙⴷⴻⴼⴼⵉⵔ ⵎⴰ ⴱⵔⴰⵏ-ⴷ ⵉ ⴽⵔⴰⴹ-ⵏⵏⵉ (3) ⵏ ⵢⵉⵎⴰⵙⵍⴰⴹⴻⵏ ⵏ ⵜⵇⴻⵏⵚⵓⵍⵉⵜ ⵜⴰⵎⴰⵜⵓⵜ ⵏ ⵜⵓⵏⴻⵙ ⴷⴻⴳ ⵟⵔⴰⴱⵍⴻⵙ (ⴰⵢ ⵢⴻⵜⵜⵡⴰⵅⴻⴹⴼⴻⵏ ⴰⵙⵙ ⵏ 12 ⵢⵓⵏⵢⵓ), ⵎⴰⵙⵙ ⴱⴻⵏⴰⵍⵉ ⵛⵀⴻⵔⵉⴼ ⵢⴻⵛⴽⴻⵕ-ⴷ « ⴰⵙⵓⵔⵉⴼ ⵢⴻⵍⵀⴰⵏ » ⴰⵢ ⴷ-ⵢⴻⵍⵍⴰⵏ ⵢⵉⵡⴻⵏ ⵡⴰⵙⵙ ⵓⵇⴱⴻⵍ ⵔⴻⵎⴹⴰⵏ, ⴰⵎ ⵡⴰⴽⴽⴻⵏ ⴰⵢ ⵢⴻⵙⵙⴰⵔⴰⵎ ⴰⴷ ⵔⵏⵓⵏ ⴰⴷ ⴰⵙⴻⵏ-ⴷ-ⴱⵔⵓⵏ ⵉ ⵢⵉⵎⴻⵕⵀⴰⵏ ⵏⵉⴹⴻⵏ ⴰⴽⴽⴻⵏ ⴰⴷ ⵇⵇⵍⴻⵏ ⵖⴻⵔ ⵜⵡⴰⵛⵓⵍⵉⵏ-ⵏⵙⴻⵏ ⴷⴻⴳ ⵍⴰⵎⴰⵏ.
ⵎⴰⵙⵙ ⴱⴻⵏⴰⵍⵉ ⵛⵀⴻⵔⵉⴼ ⵢⴻⵙⵙⴰⵔⴻⵎ « ⴰⴷ ⵜⴼⴰⴽ ⵜⴻⵎⵙⴰⵍⵜ-ⴰ ⵙ ⵡⴰⵢⴻⵏ ⵢⴻⵍⵀⴰⵏ ⵢⴻⵔⵏⴰ ⵖⴻⴼ ⵣⵉⴽ ⵍⵃⴰⵍ », ⴰⵎ ⵡⴰⴽⴽⴻⵏ ⴰⵢ ⵉⵄⴰⵡⴻⴷ ⵉⵡⴻⴽⴽⴻⴷ-ⴷ ⵜⴰⵎⵙⴻⵜⵍⴻⵍⵜ-ⵏⵏⴻⵙ « ⵖⴻⵔ ⵢⵉⴷⵉⵙ ⵏ ⵜⵡⴰⵛⵓⵍⵉⵏ ⵏ ⵢⵉⵏⴰⵡⴰⵔⴻⵏ ⴰⵢ ⵢⴻⵜⵜⵡⴰⵅⴻⴹⴼⴻⵏ ⴷ ⵓⵏⴰⴱⴰⴹ ⴷ ⵓⵖⵔⴻⴼ ⵏ ⵜⵓⵏⴻⵙ ⵜⴰⵡⴻⵍⵜⵎⴰⵜ ».
ⵎⴰⵙⵙ ⴱⴻⵏⴰⵍⵉ ⵛⵀⴻⵔⵉⴼ ⵉⴳⴻⵔ-ⴷ ⵜⵉⵖⵔⵉ ⵉ ⵡⴰⵢⵜⵎⴰⵜⴻⵏ ⵉⵍⵉⴱⵉⵢⴻⵏ ⴰⴽⴽⴻⵏ « ⴰⴷ ⴼⵔⵓⵏ ⴰⵢⴻⵏ ⴰⵢⵖⴻⴼ ⵎⴳⴻⵔⵔⴰⴷⴻⵏ ⵢⴻⵔⵏⴰ ⴰⴷ ⴷⴷⵓⵏ ⵖⴻⵔ ⵙⴷⴰⵜ, ⴷⴻⴳ ⵓⴱⵔⵉⴷ ⵏ ⵓⵎⵙⵓⵖⴰⵍ ⴷ ⵓⵎⵛⵉⵡⴻⵕ ⴰⴽⴽⴻⵏ ⴰⴷ ⴷ-ⴰⴼⴻⵏ ⵜⵉⴼⵔⴰⵜ ⵜⴰⵙⴻⵔⵜⵉⵜ ⵉ ⵜⴰⵍⵓⴼⵜ ⵢⴻⵔⵏⴰ ⴰⴷ ⵔⴻⴳⵍⴻⵏ ⴰⴱⵔⵉⴷ ⵉ ⵔⵔⴻⴱⵔⴰⴱ ⴷ ⵙ ⴽⵔⴰ ⵏ ⵡⵉⵏ ⴰⵔⴰ ⵢⴻⴱⵖⵓⵏ ⴰⴷ ⵢⴻⵜⵄⴻⴷⴷⵉ ⵖⴻⴼ ⵍⵉⴱⵢⴰ, ⵖⴻⴼ ⵜⴷⵓⴽⵍⵉ ⵏ ⵓⵖⵔⴻⴼ-ⵏⵏⴻⵙ ⴷ ⵜⵓⵎⵎⴷⴰ ⵏ ⵡⴰⴽⴰⵍ-ⵏⵏⴻⵙ ».
