Asebter amenzawi

Lɣella n yirden d temẓin terna s 20% deg Lezzayer (aneɣlaf)

QSENṬINA – Afares n yimendi (irden d temẓin) ad yernu aseggas-a s 20% ɣef leḥsab n useggas ay yezrin, ɣef wakken ay d-yenna ass n ssebt deg Qsenṭina uneɣlaf n tfellaḥt d ufares n tmurt, Abdelkader Kadi.

Aneɣlaf ay yefkan lumiṛa akken ad tebdu tḥemla n tmerga d usserwet deg yiwet n lfirma deg tɣiwant n Ɛin Ɛbid (40 n yikilumitren deg unẓul-agmuḍan n Qsenṭina), yenna-d d akken ula ma tagnit n tegnewt texṣer aseggas-a, lɣella n yimendi ad taweḍ ɣer 43 n yimelyunen n yiqenṭaren, yili aseggas yezrin lɣella tefka-d 35 n yimelyunen n yiqenṭaren.

Mass Kadi yesmekti-d d akken asnefli n lɣellat n tfellaḥt n llsas d « tuzwirt n unabaḍ », yerna iḥettet-d d akken « asselhu n tuddsa d ussemyuddes gar yicriken yemgerraden n uḥric-a ad yernu ad yessemɣer » lɣellat.

Taḥemla n tmegra d usserwet n useggas-a ad d-tḥaz 3,3 n yimelyunen n yiqeṭṭaren gar-asen 1,5 d amelyun n yiqeṭṭaren i yirden iquranen, amelyun n yiqeṭṭaren n temẓin, 600.000 n yiqeṭṭaren n yirden ileqqaqen d 100.000 n yiqeṭṭaren n uẓekkun, ɣef wakken ay d-yenna seg yidis-nnes yimḍebber n teɣwalt deg uɣlif n tfellaḥt, Djamel Berchiche, i Tnegga n Yisalan n Lezzayer.

Deg wayen yerzan tawilat n Qsenṭina, afares n yimendi i useggas-a « ur d-yettili ara ddaw n wanect ay as-ssefran yerna ad taweḍ lɣella ɣer 1,5 d amelyun n yiqenṭaren, ula ma xuṣṣen waman imi ur d-iwit ara aṭas n unẓar gar wayyuren n Yebrir d Mayu yezrin », ɣef wakken ay d-yenna unemhal adigan n uḥric-a, Yacine Ghediri, i Tnegga n Yisalan n Lezzayer, am wakken ay d-yenna d akken akal deg temnaḍt n ugafan n twilayt ijemmeɛ aman yerna yettaǧǧa imɣan ad d-mɣin akken iwata.