Asebter amenzawi

Amtawi n talwit di Mali : Le Drian yesnemmer tabdammast Tazzayrit i wemtawi n taluft n Mali

PARIS – Aneɣlaf afṛansawi n temḥaddit, Jean-Yves Le Drian, yenemmer ass n lḥedd azal n tebdammast tazzayrit deg usurrif n talwit di Mali, u yenna belli Fṛansa ad tefk afud i uṛeṣṣi n wemtawi n talwit yettwasenyan di Bamako sɣuṛ anabaḍ amali akk d uzaraz imussuten n Uzawad (CMA).

"yella uxeddim amuqqṛan ddaw n tebdammast tazzayrit i ilaq ad nesnemmer dagi", id-yenna Mas Le Drian. "Amtawi yettwasenyan iḍelli ad yekcem deg umezruy", id-yerna yenna uneɣlaf di ṛṛadyu Europe 1.

Azaraz imussuten Uzawaḍ (CMA) yessenya ass n ssebt di Bamako amtawi n talwit d wemṣalaḥ di Mali, ɣer yessaweḍ usurrif n Lezzayer. Amtawi n talwit di Mali yettwasenya ass n 15 mayu yezrin sɣur anabaḍ amali, tirebbuyaɛ timselḥin n tɣerɣart akk d terbaɛt n tebdammast tageraɣlant i tesselḥa Lezzayer.

Asuddim n tegrayin n udiwenni yerzan aṛeṣṣi n wemtawi n talwit d wemṣalaḥ di Mali akk d yiwen ukaram anda d-rsen imsefhimen n laman deg ugafa n tmurt ttwasenyan ass n 5 yunyu di Lezzayer sɣur wid yellan deg udiwenni amali.

Aneɣlaf n ddewla, aneɣlaf n tɣawsiwin n wezɣaṛ akk d umɛiwen ageraɣlan, Ramtane Lamamra yella yenna-d ussan-a belli mi ara yettwasenyi wemtawi-yagi, tabdammast tageraɣlant deg udiwenni ger yimaliyen, i tesselḥa Lezzayer ad tuɣal d taseqqamutt n weḍfaṛ.