Asebter amenzawi
Uraren igrakalen n lebḥeṛ: Lezzayer ad tettekki deg Pescara
Timlilit n Tfidiṛaliyin tinaddalin tiɣelnawin deg uxxam n Useqqamu ulimpi azzayri i ussemyuddes d uxebber
LEZZAYER TAMANEƔT – Lezzayer ad tettekki deg teẓrigt tamezwarut n wuraren igrakalen n teftist (cceḍḍ n lebḥeṛ) ara d-yilin deg Ṭṭalyan gar 28 Ɣuct d 6 Ctembeṛ, yerna attekki n Lezzayer d win ara yilin « s tɣara », ɣef wakken ay d-yenna uselway n ussewjed ulimpi, Amar Brahmia, ass n lḥedd deg Lezzayer.
« Nnig yidis n umsizwer ara yesɛu ttiɛad-a n Pescara, attekki n Lezzayer deg-s yesɛa azal d ameqran, imi uqbel ma bdan wuraren-a, Aseqqamu n Wuraren Igrakalen ad yefren anta ay d tamurt deg ara d-ilin wuraren igrakalen n 2021, yerna Wehṛan ters-d d tamazwart deg tefrant-a », ɣef wakken ay d-ixebber Brahmia deg yiwet n temlilit n ussemyuddes d uxebber n Tfidiṛaliyin tinaddalin tiɣelnawin ay d-yellan deg uxxam n Useqqamu Ulimpi Anaddal Adzayri.
Deg wuraren igrakalen n teftist, Lezzayer ad tettekki deg 8 n waddalen: takurt tamafagt n teftist, aqeddef, takurt n ufus n teftist, tiɣilt, akwaṭlun (aɛumu d temsizzelt), aɛumu s tafriwin (fin-swimming), atinis n teftist d tkurt n uḍar n tefsirt.
Tamagla tadzayrit ad ilin deg-s azal n 100 n medden yerna ad ddun ass n 25 Ɣuct ɣer Pescara akken « ad d-fken tugna icebḥen ɣef tmurt-nneɣ yerna ad d-sseknen d akkennebɣa mliḥ ad nemmager uraren igrakalen n 2021 deg Lezzayer » ɣef wakken ay d-yenna ugensas n Useqqamu Ulimpi Adzayri, am wakken ay d-yerna d akkenisem n temdint ara yemmagren uraren-a deg 2021 ad yettwassen ass n 27 Ɣuct.
Tamdint n Wehṛan tewjed ad temmager « akken iwata yerna deg tegnatit timxeyyrin tadyant-a tagrakalt. Tamdint-a tesɛa tizemmar d timeqranin akken ad temmager tadyant n uswir unnig », ɣef wakken ay d-twekked yiwet n teɣbalut iqerben ɣer temsalt-a.
Ass n laṛebɛa yezrin, i lmend n terzi-nnes ɣef twilayt Wehṛan, aneɣlaf amenzu, Abdelmalek Sellal, yesseqsa ɣef wanda ay ssawḍen lecɣal n ussewjed n Wehṛan akken ad temmager uraren igrakalen n 2021, ladɣa imi tamdint-a la tetteg timsizzelt d texṣimt-nnes tatunsit n Sfaqs.
