ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⴰⵎⵖⵓⵏⵜ ⵜⵉⵙ 2 ⵏ ⵎⵧⴱⵉⵍⵉⵙ: ⴽⵀⴻⵣⵣⴰⵔ, ⴰⵙⵍⴻⵖⵎⴰⵢ ⴰⵎⴰⵢⵏⵓ ⵏ ⵛⴰ ⵍⴱⵓⵕⴵ ⴱⵓⵄⵕⵉⵕⵉⴵ ⵢⴻⴱⵖⴰ ⴰⴷ ⵢⴻⵙⵙⴰⵍⵉ ⴰⵙⵡⵉⵔ
ⵍⴱⵓⵕⴵ ⴱⵓⵄⵕⵉⵕⵉⴵ – ⴰⵙⵍⴻⵖⵎⴰⵢ ⴰⵎⴰⵢⵏⵓ ⵏ ⵛⴰ ⵍⴱⵓⵕⴵ ⴱⵓⵄⵕⵉⵕⵉⴵ, ⴻⵍ ⵀⴰⴷⵉ ⴽⵀⴻⵣⵣⴰⵔ ⴰⵢ ⴷ-ⵢⴻⵇⵇⵍⴻⵏ ⴷⴻⴳ ⵓⵎⴽⴰⵏ ⵏ ⵓⵙⵍⴻⵖⵎⴰⵢ ⴰⴱⴷⴻⵍⴽⵔⵉⵎ ⴱⵉⵔⴰ (ⵢⴻⵜⵜⴰⵅⵔⴻⵏ), ⵢⴻⴱⵖⴰ ⴰⴷ ⵜⴻⵙⵄⵓ ⵜⴻⵖⵍⴰⵎⵜ-ⵏⵏⴻⵙ ⴰⵙⵡⵉⵔ ⵢⴻⵍⵀⴰⵏ ⴷⴻⴳ ⵜⴻⵎⵖⵓⵏⵜ ⵜⵉⵙ 2 ⵏ ⵎⵧⴱⵉⵍⵉⵙ ⵢⴻⵔⵏⴰ « ⵉⵙⵡⵉ ⵏⴻⵜⵜⴰ ⴷ ⴰⵍⵍⵓⵢ ⵖⴻⵔ ⵜⴻⵎⵖⵓⵏⵜ ⵜⴰⵎⴻⵣⵡⴰⵔⵓⵜ ⴷⴻⴳ ⵜⴳⴰⵔⴰ ⵏ ⵜⵙⴻⵎⵀⵓⵢⵜ ».
ⴰⵙⵍⴻⵖⵎⴰⵢ ⵢⴻⵏⵏⴰ-ⴰⵙ ⵉ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ ⴰⵙⵙ ⵏ ⵍⵃⴻⴷⴷ, ⴷⴻⴳ ⵢⵉⵊⵉⴼⴻⵕ ⵏ ⵓⵙⵜⴻⵏⵢⵉ ⵏ ⵍⴻⵄⵇⴻⴷ ⵏ ⵓⵙⴻⴳⴳⴰⵙ ⴷ ⵜⴻⵖⵍⴰⵎⵜ-ⴰ, ⴷ ⴰⴽⴽⴻⵏ « ⵢⴻⴼⵕⴻⵃ ⴰⵟⴰⵙ » ⵉⵎⵉ ⴰⵢ ⴷ-ⵢⴻⵇⵇⴻⵍ ⵖⴻⵔ ⵜⴻⵖⵍⴰⵎⵜ ⵏ ⵛⴰⴱⴱⴰ. ⵉ ⵓⵙⵎⴻⴽⵜⵉ, ⴽⵀⴻⵣⵣⴰⵔ ⵢⴻⵅⴷⴻⵎ ⵢⴰⴳⵉ ⴷ ⴰⵙⵍⴻⵖⵎⴰⵢ ⵏ ⵜⴻⵖⵍⴰⵎⵜ-ⴰ ⴷⴻⴳ 2009-2010.
« ⵙⵙⵏⴻⵖ ⵎⵍⵉⵃ ⵜⴰⵖⵍⴰⵎⵜ-ⴰ ⵢⴻⵔⵏⴰ ⵓⵙⵉⵖ-ⴷ ⴰⴽⴽⴻⵏ ⴰⴷ ⵜⵜ-ⵙⵙⵉⵡⴹⴻⵖ ⴰⴷ ⴷ-ⵜⴻⵇⵇⴻⵍ ⵖⴻⵔ ⵜⴻⵎⵖⵓⵏⵜ 1ⵓⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴽⵀⴻⵣⵣⴰⵔ, ⴰⵎ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⴷ ⴰⴽⴽⴻⵏ ⵓⵔ ⵢⴻⵜⵜⵛⵓⵃⵃⵓ ⴰⵔⴰ ⵉ ⵜⵣⴻⵎⵎⴰⵔ-ⵏⵏⴻⵙ ⴰⴽⴽⴻⵏ ⴰⴷ ⵢⴰⵡⴻⴹ ⵖⴻⵔ ⵢⵉⵙⵡⵉ-ⴰ ⵢⴻⵔⵏⴰ ⴰⴷ ⵢⴻⵙⵙⵓⵎⴰⵔ (ⴰⴷ ⵢⴻⵙⵙⴻⴼⵕⴻⵃ) ⵉⵎⴼⴻⵕⵕⴵⴻⵏ ⵏ ⵜⴻⵖⵍⴰⵎⵜ-ⴰ ⴰⵢ ⵢⵓⴽⵍⴰⵍⴻⵏ ⴰⴷ ⵙⵄⵓⵏ ⵜⴰⵖⵍⴰⵎⵜ ⵏ ⵓⵙⵡⵉⵔ ⵓⵏⵏⵉⴳ.
ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵉⵎⴰⵔⵉⵔⴻⵏ, ⴰⵙⵍⴻⵖⵎⴰⵢ ⴰⵎⴰⵢⵏⵓ ⵢⴻⵏⵏⴰ-ⴷ ⴷ ⴰⴽⴽⴻⵏ ⴰⴷ ⵢⴻⵊⵎⴻⵄ 13-ⵏⵏⵉ ⵏ ⵢⵉⵎⴰⵔⵉⵔⴻⵏ ⴰⵢ ⴷ-ⵢⴻⴼⵔⴻⵏ ⵓⵙⵍⴻⵖⵎⴰⵢ ⴰⵇⴱⵓⵔ, ⵉⵎⵉ, ⵖⴻⴼ ⵍⴻⵃⵙⴰⴱ-ⵏⵏⴻⵙ, ⴱⵉⵔⴰ « ⵢⴻⵍⵍⴰ ⵢⴻⵙⵙⴻⵏ ⵎⵍⵉⵃ ⵜⴰⴳⵔⴰⵡⵜ-ⴰ ⵢⴻⵔⵏⴰ ⵢⴻⵙⵙⴰⵡⴻⴹ ⴰⴷ ⵢⴻⵙⵙⴻⵏ ⴰⵣⴰⵍ ⵏ ⵢⴰⵍ ⴰⵎⴰⵔⵉⵔ ⴰⵎ ⵡⴰⴽⴽⴻⵏ ⴰⵔⴰ ⵉⵃⴰⴽⴻⵕ ⴰⵢⴻⵏ ⵜⴻⵃⵡⴰⴵ ⵜⴻⵖⵍⴰⵎⵜ ».
ⴷ ⴰⵛⵓ ⴽⴰⵏ, ⴻⵍ ⵀⴰⴷⵉ ⴽⵀⴻⵣⵣⴰⵔ ⵍⴰ ⵢⴻⵙⵙⴻⴼⵔⴰⵢ ⴰⴷ ⴷ-ⵢⴻⵔⵏⵓ 6 ⵏ ⵢⵉⵎⴰⵔⵉⵔⴻⵏ ⵏⵉⴹⴻⵏ: ⵢⵉⵡⴻⵏ ⵏ ⵓⵄⴻⵙⵙⴰⵙ ⵏ ⵢⵉⵙⵡⵉ ⵢⴻⵙⵄⴰⵏ ⵜⵜⴻⵊⵕⵉⴱⴰ, ⴰⴷⵉⵙⴰⵏ ⴰⵣⴻⵍⵎⴰⴹ, ⴰⵎⵃⴰⴷⴷⵉ ⴰⵍⴻⵎⵎⴰⵙ, ⴰⵣⴻⴳⵏⴻⵎⵃⴰⴷⴷⵉ ⴷ ⵙⵉⵏ ⵏ ⵢⵉⵍⴻⵎⵎⴰⵙⴻⵏ ⵉⵎⴻⵏⵟⴰⴳⴻⵏ, ⴰⵎ ⵡⴰⴽⴽⴻⵏ ⴰⵔⴰ ⴷ-ⵢⴻⵙⵙⴰⵍⵉ 3 ⵏ ⵢⵉⵎⴰⵔⵉⵔⴻⵏ ⵏⵉⴹⴻⵏ ⴷⴻⴳ ⵜⴻⵖⵍⴰⵎⵜ ⵏ ⵓⵙⵙⵉⵔⴻⵎ.
ⴰⵙⵍⴻⵖⵎⴰⵢ ⵏ ⵛⴰⴱⴱⴰ ⵢⴻⵏⵏⴰ-ⴷ ⴷⴰⵖ ⴷ ⴰⴽⴽⴻⵏ ⵢⴻⴱⵖⴰ ⴰⴷ ⵢⴻⵊⵎⴻⵄ ⵉⵅⴻⴷⴷⴰⵎⴻⵏ ⵉⵜⴻⴽⵏⵉⵢⴻⵏ ⵢⴻⵍⵍⴰⵏ ⵅⴻⴷⴷⵎⴻⵏ ⴷ ⴰⴱⴷⴻⵍⴽⵔⵉⵎ ⴱⵉⵔⴰ, ⵢⴻⵔⵏⴰ ⵉⵃⵓⴷⴷ-ⴷ ⴰⵙⵙ ⵏ 28 ⵢⵓⵏⵢⵓ ⵉ ⵜⵓⵇⵇⵍⴰ ⵖⴻⵔ ⵓⵙⵍⴻⵖⵎⵓ ⵓⵇⴱⴻⵍ ⵎⴰ ⵢⴻⵍⵍⴰ-ⴷ ⵡⴰⵏⵏⴰⵏ ⴰⵎⴻⵣⵡⴰⵔⵓ ⵉ ⵓⵀⴻⵢⵢⵉ ⵏ ⵜⴼⴻⴽⴽⴰ, ⴷⴻⴳ ⵍⴱⵓⵕⴵ ⴱⵓⵄⵕⵉⵕⵉⴵ, ⴷ ⴰⵏⵏⴰⵏ ⴰⵔⴰ ⴷ-ⵢⵉⵍⵉⵏ ⴷⴻⴳ ⵜⴳⴰⵔⴰ ⵏ ⵔⴻⵎⴹⴰⵏ, ⵢⴻⵔⵏⴰ ⴰⴷ ⴷ-ⵜⵉⵍⵉ ⴷⴻⴳ-ⵙ ⵓⵍⴰ ⴷ ⵜⵉⵎⵍⵉⵍⵉⵜ ⵜⴰⵎⵎⵉⴷⵡⴰⵏⵜ.
ⵙⴷⴻⴼⴼⵉⵔ ⵡⴰⵏⵏⴰⵏ-ⴰ, ⵜⴰⵖⵍⴰⵎⵜ ⵏ ⵍⴱⵓⵕⴵ ⴱⵓⵄⵕⵉⵕⵉⴵ ⴰⴷ ⵜⴻⴷⴷⵓ ⵖⴻⵔ ⵄⵉⵏ ⴷⴷⵕⴰⵀⴻⵎ ⴷⴻⴳ ⵜⵓⵏⴻⵙ ⴰⴽⴽⴻⵏ ⴰⴷ ⵜⴻⴹⴼⴻⵔ ⴷⵉⵏ ⴰⵏⵏⴰⵏ ⵡⵉⵙ ⵙⵉⵏ ⴰⵔⴰ ⵢⴻⴹⴹⴼⴻⵏ 15 ⵏ ⵡⵓⵙⵙⴰⵏ, ⴷ ⵡⵉⵏ ⴷⴻⴳ ⴰⵔⴰ ⵜⵀⴻⵢⵢⵉ ⵉⵎⴰⵏ-ⵏⵏⴻⵙ ⵙⴻⴳ ⵢⵉⴷⵉⵙ ⴰⵜⴻⴽⵏⵉ-ⴰⵜⴰⴽⵜⵉⴽⵉ, ⵢⴻⵔⵏⴰ ⴰⴷ ⵜⵓⵔⴰⵔ, ⴷⴻⴳ ⵜⴰⵍⵍⵉⵜ-ⵏⵏⵉ, 6 ⵏ ⵜⴻⵎⵍⵉⵍⵉⵢⵉⵏ ⵜⵉⵎⵎⵉⴷⵡⴰⵏⵉⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴽⵀⴻⵣⵣⴰⵔ.
