Asebter amenzawi
Tamɣunt tis 2 n Mobilis: Khezzar, asleɣmay amaynu n CA Lbuṛǧ Buɛṛiṛiǧ yebɣa ad yessali aswir
LBUṚǦ BUƐṚIṚIǦ – Asleɣmay amaynu n CA Lbuṛǧ Buɛṛiṛiǧ, El Hadi Khezzar ay d-yeqqlen deg umkan n usleɣmay Abdelkrim Bira (yettaxren), yebɣa ad tesɛu teɣlamt-nnes aswir yelhan deg Temɣunt tis 2 n Mobilis yerna « iswi netta d alluy ɣer Temɣunt Tamezwarut deg tgara n tsemhuyt ».
Asleɣmay yenna-as i Tnegga n Yisalan n Lezzayer ass n lḥedd, deg yijifeṛ n ustenyi n leɛqed n useggas d teɣlamt-a, d akken « yefṛeḥ aṭas » imi ay d-yeqqel ɣer teɣlamt n CABBA. I usmekti, Khezzar yexdem yagi d asleɣmay n teɣlamt-a deg 2009-2010.
« Ssneɣ mliḥ taɣlamt-a yerna usiɣ-d akken ad tt-ssiwḍeɣ ad d-teqqel ɣer Temɣunt 1ut », ɣef wakken ay d-yenna Khezzar, am wakken ay d-iwekked d akken ur yettcuḥḥu ara i tzemmar-nnes akken ad yaweḍ ɣer yiswi-a yerna ad yessumar (ad yessefṛeḥ) imfeṛṛǧen n teɣlamt-a ay yuklalen ad sɛun taɣlamt n uswir unnig.
Deg wayen yerzan imariren, asleɣmay amaynu yenna-d d akken ad yejmeɛ 13-nni n yimariren ay d-yefren usleɣmay aqbur, imi, ɣef leḥsab-nnes, Bira « yella yessen mliḥ tagrawt-a yerna yessaweḍ ad yessen azal n yal amarir am wakken ara iḥakeṛ ayen teḥwaǧ teɣlamt ».
D acu kan, El Hadi Khezzar la yessefray ad d-yernu 6 n yimariren niḍen: yiwen n uɛessas n yiswi yesɛan ttejṛiba, adisan azelmaḍ, amḥaddi alemmas, azegnemḥaddi d sin n yilemmasen imenṭagen, am wakken ara d-yessali 3 n yimariren niḍen deg teɣlamt n ussirem.
Asleɣmay n CABBA yenna-d daɣ d akken yebɣa ad yejmeɛ ixeddamen itekniyen yellan xeddmen d Abdelkrim Bira, yerna iḥudd-d ass n 28 Yunyu i tuqqla ɣer usleɣmu uqbel ma yella-d wannan amezwaru i uheyyi n tfekka, deg Lbuṛǧ Buɛṛiṛiǧ, d annan ara d-yilin deg tgara n Remḍan, yerna ad d-tili deg-s ula d timlilit tammidwant.
Sdeffir wannan-a, taɣlamt n Lbuṛǧ Buɛṛiṛiǧ ad teddu ɣer Ɛin Ddṛahem deg Tunes akken ad teḍfer din annan wis sin ara yeḍḍfen 15 n wussan, d win deg ara theyyi iman-nnes seg yidis atekni-ataktiki, yerna ad turar, deg tallit-nni, 6 n temliliyin timmidwanin, ɣef wakken ay d-yenna Khezzar.
