Asebter amenzawi

Tamsalt n Khalifa: leḥkem ad d-yeffeɣ ass n ttlata deg ccṛeɛ n tejrimin n Leblida

LEZZAYER – Axxam n ccṛeɛ n tejrimin n Leblida ad d-yessuffeɣ leḥkem n temsalt n Khalifa ass n ttlata, d leḥkem yerzan 71 n yimetthumen, gar-asen Rafik Abdelmoumene Khelifa, ametthum agejdan deg temsalt n uflas n Tbanka n Khalifa.

Agensas n useqqamu amatu n yimwekklen, Mohamed Zerg Erras, yessuter leḥkem s lḥebs i lebda mgal Abdelmoumene Khelifa, gar 15 d 20 n yiseggasen n lḥebs i yimɛawnen-nnes uqriben, 18 n wayyuren n lḥebs d lexḍeyyat i yimetthumen-nni niḍen.

Leḥkam-a swehmen ibugaṭuten n temḥaddit, gar-asen Akerwa Miloud Brahimi d Ukerwa Khaled Bourayou, yerna walan-ten « d tiɣezfanin » ɣef leḥsab n wid ay d-yeffɣen deg ccṛeɛ n 2007 ay d-yellan war ma yeḥdeṛ umetthum agejdan ayɣef ḥekmen s lḥebs s uɣabi.

Mass Khelifa ḍḍfen-as ladɣa n « ussebded n tegrawt i ussefsed, lexdeɛ s laman, adɣal n lekwaɣeḍ n tedbelt d tbanka d usseqdec-nsen, tukci n tjuɛal, asseqdec n tmussniwin i ussefsed d uflas n tkellax ». D acu kan, Mass Khelifa ur yeḥbis ara seg udafeɛ ɣef yiman-nnes yerna yenna-d, sdat lqaḍi Antar Menouar, d akken ur igi acemma n diri.

S kra yekka ccṛeɛ-nni, Mass Khelifa iwet akken ad yenkeṛ ayen ayyes yettwatthem, ladɣa deg wayen yerzan adɣal n leɛqudat n uṛhan n wayla yebnan, imi ay yettwatthem iga-d lekwaɣeḍ n uṛhan n tkellax akken ad as-d-reḍlen idrimen ayyes ara d-yessebded Tabanka n Khalifa.

Ma d imetthumen niḍen (70 n yimdanen), 21 seg-sen atni yagi deg lḥebs, yerna akken ma llan ɛerḍen ad dafɛen ɣef yiman-nsen s unkaṛ n wayen ayyes ay ttwattehmen, yerna ibugaṭuten-nsen nnan-d daken ttehmat ayyes ttwattehmen « ur sɛint llsas ».

Mass Khelifa yenkeṛ d akken tagrawt-nnes tefles, yili Tabanka n Khalifa ufan-tt d akken xuṣṣen-tt 3,2 n yimelyaṛen n yidinaṛen deg usenduq-nnes agejdan. Nnig waya, Mass Khelifa yenna-d d akken asmi ay yeffeɣ seg Lezzayer deg 2003, yeǧǧa-d tikebbaniyin-nnes deg tegnit yelhan.

Ɣef leḥsab-nnes, tabanka-nnes tella tesɛa 97 n yimelyaṛen n yidinaṛen deg usenduq-nnes agejdan. Ma d takebbanit-nnes n waffug, Khalifa Airways, tella tesɛa lfayda n 7 n yimelyunen n wuṛuten.

Imetthumen ay d-yesɛeddan lḥebs ay asen-yettwaḥekmen deg ccṛeɛ n 2007 usan-d ḥedṛen deg ccṛeɛ n useggas-a d inagan, yerna deg ccṛeɛ-a, ayen d-cehden ɣef Abdelmoumene Khelifa yemgerrad ɣef wayen ay d-nnan fell-as uqbel. Ala anemhal n usenduq agejdan, Akli Youcef, ur ibeddlen ara cchada-nnes.

Aneggaru-a yenna-d d akken aselway-anemhal amatu aqbur, Abdelmoumene Khelifa, d netta ay d ssebba n lexṣaṣ-nni n yidrimen yerna yefka-d ttbut s 11 n lekwaɣeḍ n tbanka ay d-yellan gar tneggiwin n Tbanka n Khalifa yerna beyynen-d d akken Mass Khelifa yettekka deg waya.

D imelyaṛen n yidinaṛen ay iɛerqen

Timesliwt n wakk imetthumen tekcef-d kra n tɣawsiwin yeffren yeqqnen ɣer uflas n tegrawt n Khalifa, d aflas ay yesṛuḥen idrimen d imeqranen i waṭas n tkebbaniyin tinagdudin ay yessersen idrimen-nsen deg Tbanka n Khalifa yerna ur ten-id-rrint ara.

Tikebbaniyin-a ssersent idrimen-nsent deg tbanka-a acku taneggarut-a tella tettakf lfayda d tameqrant, ɣef wakken ay d-nnan yimḍebbren n tkebbaniyin-a.

Akka ay as-teḍra i Usenduq aɣelnaw n yimastaɣen (wid yettaɣen lantrit) ay yessersen 12 n yimelyaṛen n yidinaṛen deg Tbanka n Khalifa, yerna yessaweḍ ad d-yerr kan 8 n yimelyaṛen seg-sen, ɣef wakken ay d-yenna yiwen seg yinagan.

Asenduq aɣelnaw n usenkid n trebbawt (CNAC) yessers 1,8 d amelyaṛ n yidinaṛen. Ma d Asenduq n uḍman n yismaden imeẓyanen yessers gar 500 d 600 n yimelyunen n yidinaṛen, yerna isenduqen-a ssawḍen ad d-rren aḥric d ameẓyan seg wayen ssersen.

Imḍebbren d yikataren n Tnarit n usmal d ussefrek aṣukan (OPGI) ssawlen-d ula d nitni ɣef yidrimen imeqranen ay ssersen d wamek ay mmeččen.

Ma d Moncef Badsi, win ay yessenzen ayla n Tbanka n Khalifa i lmend n teɣdemt, yenna-d d akken lemmer d ay tesris Sonatrach 400 n yimelyaṛen n yidinaṛen deg tbanka-a, tili ad d-tili « twaɣit d tameqrant » deg tmurt.

Aṭas n yinagan ay d-icehden deg ccṛeɛ-a, yerna kra seg-sen yettunefk wazal ameqran i cchadat-nsen imi ay llan ḍḍfen imukan d unnigen (kra seg-sen mazal-iten ar ass-a ḍḍfen imukan s wazal-nsen).

Yiwen seg yinagan-a d Anebbaḍ n Tbanka n Lezzayer, Mohamed Laksaci, ay d-yennan d akken Tabanka taqburt n Khalifa tuweḍ ɣer uswir deg « ur tesɛi ara idrimen » deg 2003, yerna aya yebɣa ad d-yini d akken ur telli ara tezmer ad txelleṣ ayen ay tettwalas, dɣa d aya ay yeǧǧan Tabanka n Lezzayer ad as-tessebṭel ttesriḥ-nnes i Tbanka n Khalifa.

Ma d Mohamed Djellab, anedbal aqbur n tbanka yerna d aneɣlaf aqbur n tedrimt, yenna-d d akken Tabanka n Khalifa « tella treḍḍel idrimen war ma tura-ten, ur telli ara tesɛa taseqqamut i urḍal n yidrimen yerna ur tesɛi ara ikaramen ɣef yireḍḍalen-nni », dɣa d aya akk ay yeswaɣen tadrimt n Tbanka-a.

Ali Aoun, aselway-anemhal amatu n tegrawt n Saidal, yenna-d, seg yidis-nnes, d akken netta d yiwen seg 3 n yinemhalen (seg gar 25) n tegrawt n Saidal « ay yugin » ad ssersen idrimen deg Tbanka n Khalifa yerna Saidal tessaweḍ ad d-terr 59,6 n yimelyunen n yidinaṛen s yiwet n tteknit n ussefrek ay d-iga netta s timmad-nnes, d tin umi isemma « ussekki n tserwasin ».

Seg yidis-nnes, aneɣlaf aqbur n umahil (axeddim), Aboudjerra Soltani, yenna-d d akken « ur t-xebbren ara », deg 2001, ɣef ussersi n 1000 n yimelyaṛen n yisantimen n Usenduq aɣelnaw n yisenkiden inmettiyen (CNAS) deg Tbanka taqburt n Khalifa.

D lexṣara tameqrant

Cchadat n yineɣlafen iqburen n tedrimt Mourad Medelci d Mohamed Terbache, anemhal amatu aqbur n Lxezna, Karim Djoudi d umatu amatu n Tdukli tamatut n yixeddamen idzayriyen (UGTA), Abdelmadjid Sidi Said, yeɣra-tent-id akk lqaḍi Antar Menouar.

Deg cchada-nnes, Mass Medelci yenna-d d akken ur yelli ara akk yesɛa kra n wassaɣ » d tbankiwin d ussefqed-nsent sdeffir ma sɛeddan lqanun amaynu ɣef yidrimen d usmad.

« Iṛabulen ay d-theyya Tbanka n Lezzayer bedren-d tiɣawsiwin s umata, xuṣṣen deg ttfaṣil yerna llan sɛan tuccḍiwin, acku heyyan-ten-id yixeddamen ur yesɛin ara aswir iwatan », ɣef wakken ay d-yenna Mass Terbache.

Deg wussan wis 26 d 27 n ccṛeɛ-a, ugar n 100 n yigensasen n yimcetkiyen ay d-iɛeddan sdat lqaḍi akken ad d-ssiwlen ɣef lmaḍerra ay ten-iḥuzan asmi ay tefles Tbanka n Khalifa.

Kra seg-sen nnan-d d akken ur ssawḍen ara ad d-rren akk idrimen ay ssersen deg tbanka-nni imi ay llan xuṣṣen yidrimen deg tneggiwin-nnes, ma d kra niḍen qqlen-asen-d cwiṭ n yidrimen mi yenza wayla n Tbanka n Khalifa, maca ayen ay asen-d-yeqqlen cwiṭ maḍi ɣef leḥsab n wayen ay ssersen (azal n 5%).