Asebter amenzawi
Ikayaden iɣelnawen llan-d « deg tegnatin yelhan »
LEZZAYER – Taneɣlaft n ussegmi aɣelnaw, Nouria Benghebrit, tenna-d ass n letniyen deg Lezzayer Tamaneɣt d akken ikayaden iɣelnawen n useggas-a llan-d « deg tegnatin yelhan », ula ma llant-d kra n liḥalat « tuɛzilin » n lexdeɛ.
« S umata, ikayaden llan-d deg tegnatin yelhan, ula ma tella-d tḥemla ur yesɛin tamtilt deg yiẓeḍwan inmettiyen yerna llant-d kra n liḥalat tuɛzilin n lexdeɛ », ɣef wakken ay d-tenna Massa Benghebrit deg usarag aɣelnaw n yinemhalen n ussegmi ay d-yellan i lmend n uqeyyem n yikayaden iɣelnawen.
Taneɣlaft tebder-d « kra n lexṣaṣat d wuguren » isnegmanen d wussnanen yeqqne ɣer yikayaden-nni.
Seg yidis n leḥsabat, amḍan n yimazwaren ay yettekkan deg yikayaden-a yerna s 200.000 ɣef leḥsab n useggas yezrin, ɣef wakken ay d-tenna tneɣlaft, yerna tger-d tamawt d akken aseggas-a ttwakksen yikayaden n uqḍaɛ deg tgara n tezrawin timenza d yikayaden n umnaṛ i wid ara yesɛeddin lbak. Ikayaden-a llan ttilin-d yal aseggas deg 8 n yiseggasen-a ineggura.
Aseggas-a maci am sin n yiseggasen ineggura deg ay srewlen isental ɣer beṛṛa yerna yella-d lexdeɛ d ameqran, ɣef wakken ay d-tenna Massa Benghebrit. D acu kan, taneɣlaft tenna-d d akken kra n yinelmaden sqedcen tiknussniwin timaynutin i lexdeɛ (ladɣa taknussna tamaynut n 3G [tasuta tis 3] deg lbak), yerna tenna-d tneɣlaft d akken yessefk ad ttwaqedcent teknussniwin-a « i yimenɣi mgal lexdeɛ ay izerɛen ass-a deg umaḍal ».
Taneɣlaft tger-d tiɣri i yimḍebbren n uḥric n ussegmi akken « ad ddmen iḥezziben n lqanun deg yiswiren yemgerraden », yerna tenna-d d akken imdanen ay yettekkan deg lexdeɛ yessefk ad ttwaɛaqben ama s ubrid usrid, ama s ubrid arusrid.
Dima deg wayen yerzan lexdeɛ, taneɣlaft tenna-d d akken iswi-nnes amezwaru netta d assaki n yimeqranen ur d-yecligen ara neɣ fkan afus mi ara ttekkin yigerdan deg lexdeɛ.
Taneɣlaft tesmekti-d d akken tefka azal d ameqran i ussefɛel n urkawal n tezdeg n ṣṣenɛa d urkad n uḥric n ussegmi « war leɛḍil ».
Taneɣlaft tger-d daɣ tiɣri i uskasi ɣef uɣerbaz adzayri s uttekki n wakk wid ay ixeddmen deg uḥric n tesnegmit, am wakken ay d-tḥettet d akken yessefk ad d-yettili « umciweṛ ɣef wamek ara d-ttwaheyyayen yisental n yikayaden ».
« Ta d tamsalt ayɣef yezmer ad d-yili uskasi deg tɣimiyin n ussegmi ara d-yilin ayyur ay d-yetteddun », ɣef wakken ay d-tenna Massa Benghebrit.
Taneɣlaft tfuṛes tagnit n umyager-a akken ad d-tḥettet d akken yessefk ad yili umɛiwen i ussewjed n tuqqla taɣurbizt ay d-yetteddun, yerna ccɣel-a ad d-yebdu seg wayyur n Yulyu d asawen akken ad d-bdunt tezrawin (leqraya) ass amezwaru n tuqqla.
Dɣa i lmend n waya, tenna-d d akken ad d-ssidfen aṭas n yixeddamen imaynuten, ladɣa inemhalen n yiɣerbazen d yimaswaḍen deg wakk iswiren n ulmud.
Timlilit-a tella-d deffir tewwura imedlen i lmend n uqeyyem n yikayaden iɣelnawen d temsal yeqqnen ɣer tuqqla ɣer uɣerbaz d ussidef n yixeddamen imaynuten.
