Asebter amenzawi
Ad d-yili uṣeggem deg uḥric n umesni n lkiṛan
LEZZAYER TAMANEƔT – Aneɣlaf n umesni Boudjemaa Talai iger-d tiɣri ass n letniyen akken ad iɛawed ad tettwaṣeggem umesni n temdinin d temnaḍin ay d-yezzin fell-asent (ETUS) akken ad tefru tegnit-a n « twaɣit » n umesni n lkiṛan deg Lezzayer.
« Nuḍen seg umesni n tmacint d umesni agenwan, maca amesni n lkiṛan d tawaɣit (…) » ɣef wakken ay d-yenna Mass Talai deg yiwet n temlilit d yinemhalen n umesni n twilayt d wid n yiɣsuren n umesni n temdinin d temnaḍin ay d-yezzin fell-asent, am wakken ay d-yenna uneɣlaf d akken ugur-a yekka-d seg lqella n ussuddes d lexṣaṣ n yilugan n uḥkim.
« Greɣ tamawt d akken yal tamehla n umesni n twilayt tessuddes lecɣal-nnes akken ay as-yehwa, aseqqamu-nnes n tedbelt ur yesɛi ara ahil yerna ulac assemyuddes gar tmehliwin yemgerraden », ɣef wakken ay d-yenna uneɣlaf.
Ɣef leḥsab n tkebbaniyin ay iḥedṛen deg temlilit-a, assuddes n tmehliwin-a ur d-yettqam ara akken ad yeḥkem amḍan ameqran n tkebbaniyin ay la ixeddmen deg uḥric-a.
I lmend n waya, aneɣlaf iger-d tiɣri akken ad ɛawdent ad ttwassuddsent tmehliwin n umesni n twilayt d yiɣsuren n umesni n temdinin d temnaḍin ay d-yezzin fell-asent akken ad iɛawed ad d-yerfed uḥric-a iman-nnes yerna ad yettekki deg usselhu n ukatar n tmeddurt n uɣerman d tneflit n tdamsa n tmurt.
« Deg tazwara, ad neɛreḍ ad d-neg yiwen n ussuddes i wakk timehliwin n umesni n twilayt yerna ad asen-nesdukkel lecɣal-nsent, aslagen-nsent agensi d tsekkirin-nsent akken ad nezmer ad d-naf ayen deg xuṣṣent d wuguren-nsent n tidet », ɣef wakken ay d-yenna Mass Talai.
« Ma nessaweḍ ad nefru ugur n ussuddes, igmaḍ ad d-banen dindin (…). Seg yidis niḍen, llant kra n tɣawsiwin tiḥerfiyin ara neg yerna zemrent ad aɣ-ǧǧent ad nefru 50% seg wuguren s uḍfar n yibeddilen-a akken iwata », ɣef wakken ay d-yenna.
Mass Talai yenna-d daɣ d akken yessefk ad d-yili yili umahil (axeddim) deg teɣbalut i lmend n ferru n wugur n tukci n yizirigen n umesni, imi izirigen la ttwafraqen s « urway » imi ay ulac aɣawas aɣelnaw n umesni, yerna yessefk daɣ ad yefru wugur n tukci n ttesriḥat n tenhaṛt, am wakken ara ttwareẓmen yiɣerbazen imaynuten n usselmed n tenhaṛt.
Arẓam n yiɣerbazen n tenhaṛt d win ay d-iḥuza lqanun 12-110 n 6 Meɣres 2012 ay d-yesbeyynen ccuruḍ n ussuddes d ussefqed n yiɣerbazen n tenhaṛt ay yettḥettimen isefraken n yiɣerbazen-a ad sɛun turagt neɣ ad d-ssidfen asdawan akken ad yexdem deg ṣṣenɛa-a.
Amur ameqran seg yigensasen n yiɣerbazen n tenhaṛt ugin lqanun-a ay yettwasfeɛlen deg Meɣres yezrin.
Ɣef leḥsab n uneɣlaf, arẓam n uɣerbaz n tenhaṛt yeḥwaǧ assileɣ deg unrar-a yerna maci d agerdas kan asdawan ur yesɛin ara assaɣ d ṣṣenɛa-a, dɣa ɣef waya ay yessefk ad d-yili uɛawed n tmuɣli deg tsekkirt-a, ɣef leḥsab-nnes.
Tukci n ttesriḥat i yiṭaksiyen d ussileɣ n yinehhaṛen n lkiṛan (ladɣa wid n umesni uslig) d sin n yinurar ay yeḥwaǧen aṣeggem ɣef leḥsab n wakken ay d-iḥettet.
Amesni n temdinin d temnaḍin ay d-yezzin fell-asent deg Lezzayer xeddment deg-s 90% seg tkebbaniyin tuzzigin n umesni ɣer yidis n yiɣsuren n umesni n temdinin n twilayt, ɣef leḥsab n yisefka ay d-yefka uneɣlaf deg temlilit-a.
Ṣṣenf-a n umesni d win deg rwint tɣawsiwin, ladɣa deg wayen yerzan afraq n yizirigen n umesni, imi ulac aɣawas aɣelnaw n umesni, dɣa ɣef waya ay ččuṛen kra n yizirigen deg wakud deg kra niḍen xuṣṣen-ten lkiṛan.
Seg yidis niḍen, lqanun yellan deg lfeɛl imir-a ala aḥric seg-s ay yettwasfeɛlen imi ay xuṣṣen kra n yiḍrisen n ussefɛel, yerna d aya ay iḥebsen taneflit n ṣṣenf-a n umesni, ɣef wakken ay d-sfehmen.
Nnig waya, ula d tidumṣukiwin n ummager n yimsiklen (am teɣsar n lkiṛan) xuṣṣent, yerna lkiṛan ay la yetteddun deg tmurt d tiqburin. Timsal-a akk sqedcen fell-asent deg umyager-a.
